Мазмұнға өту

Жаңа

Жауыр болған мәселе болса да!

Қоқыс.Қоқыс.Қоқыс. Әрине жауыр болған мәселе. Оны қозғай беріп не қажеті бар. Бірақ мен көрген оқиғамды жазғым келеді. Бұл біз қалаға көшкеннен басталды. Кішкене ауылда өскен мен алғашқыда үйімді көргенде көшеме мән бермеппін. Әлде адам баласы уақыт өте келе байқай ма? Сондықтан басында көшемнің ластығына мән бермеппін. Қай жерге қарасаңда ненің екенін білмейтін қоқыстар. Солай күндер өтіп жатты. Көктем болды, көктемнен кейін қыс келді, қыстан кейін күз келді. Міне солай уақыт өте берді. Қоқысты тазалап жатқанда, не болмаса оған мән беретін бір де бір жан жоқ. Солай бір күні мен сабақтан қайтқанымда бозбаланы кездестірдім. Өзімен тіл қатысым, әңгіме дүкен құрмасам да, оның ісіне мән бере бастадым. Ол жаңа ғана дүкеннен қайтқан болу керек, қолында наны мен бананы болды. Асыққан да жоқ, тек бананды қалай тез жеп бітіремін деген ой ғана болған сынды. Солай қабығын ашып жегеннен кейін, алды да бананың қабығын көше бойына тастай салды. Бұл бір түк нәрсе емес сынды көрінуі мүмкін. Бірақ егер әр бозбала мен бойжеткеніміз осындай қылық танытатын болса қалай болғаны. Біз оларды осы үшін тәрбиеледік пе? Оларға берген тәрбиеміз қайда? Әлде "Қызым үйде қылығы түзде" болғаны ма?

0
0
538

Қазақтың көзін ашқан «Қазақ» газеті

Жақында Алаш ұлдарына 100 жыл толуына орай конкурс ұйымдастырылды. Міне төмендегі эссе де соның жемісі. Келешекте керек болар деген ниетпен осында сақтадым.

Осыдан жүз жыл бұрын елім, жерім деген азаматтар ұлт үшін құрбан болды. Олардың есімі әрбір қазақ баласының есінде. Алаш алыптарының есімдерін білгенмен, олардың ел мүддесі үшін қосқан үлестерінен хабардар болмауымыз мүмкін. Осы орайда «Қазақ» газеті туралы сөз қозғағым келеді. Қазақтың тұңғыш басылымының негізін қалаушы Ахмет Байтұрсынов. Газеттің жарыққа шығу жолы өте күрделі болғаны тарихтан аян. Көптеген оқыған, көзі ашық зиялы қауым халқымыздың маңдайалды басылымын шығаруға өз үлестерін қосты, сол замандағы өзекті мәселелерді басылым беттеріне жариялап отырды. Алаштың алып азаматтары басылымның алғашқы бетіне газеттің не үшін керектігін халыққа түсіндіріп, сыртқы хабарлармен қоса, ішкі мәселелерді де қамтып тұрды. Дін мәселесі де қарастырылып, дамыған Еуропа мен оның тарихына да тоқталып өткен. Сонымен қатар сол жылдардағы елдің ішіндегі тонау сияқты қылмыстар да жазылған.

Алаш азаматтарын қатты толғандырған жайттың бірі ­- сол жылдардағы тіл мәселесі. Қазақтың тарихын зерделейтін адамдардың жоқтығы айтылып,  өз елі туралы білетін аңыз-әфсанаар мен қазақтың біртума дара тұлғалары туралы мәліметке қанық жандар болса, «Қазақ» газетіне жазуды да сұраған. Сондай-ақ, «Қазақ» газетінің алғашқы бетінде халықтың сауатын ашуға бағытталған материалдар да шығып тұрған.  Онда қазақ балалары оқыса, өзге елдердей тереземіз тең болып, ұрпағымыз ноғай, сарт медреселерінде оқымай, өз медреселерінде білім алар еді деген сынды мәселелер қозғалған. Осы мәселе төңірегінде кей ауылдарда медресенің жоқтығы да айтылып, ондағы оқыған  бай азаматтарға бір медресе салып берсе деген үндеу іспеттес  мақалалар жарияланды. Сонымен қатар, сол жылдарда несиеге оқып жатқан балаларға қарыздарын сұрамай, тегін көмек беру жағдайы да айтылды. Одан әрі сол жылдары Қытайға қоныстанған қазақ жайы мен оқу мәселесі, ондағы қазақтарға арналған медреселердің жоқтығы сөз болған. Бұл ғана емес, сол кезеңдердегі қазақ жеріндегі қазақ кітаптарының аздығы, кейбір орыс және төте жазуын оқыған қазақтардың жайы айтылған. Олардың өз ана тілінде сөйлеуді ұят санамау керектігі мысал етілген. Оны 1913 жылы  2 ақпанда №1 саны шыққан «Қазақ» газетінің бетінен көре аламыз. Онда былай делінген.

- «Мұнан былай да осы бетімізбен жүре берсек, ықтисадта қазақ тілі азып-тозып, бірте- бірте тұтынудан шығып, әуелі қазақша жазу ұят көріне, онан әрі не болары белгілі».

Оған қоса, газет беттерінде қазақ жеріне қоныстануға барған өзге ұлт өкілдеріне үлестірілген жер мәселесі де тілге тиек етілген. Қазақ өз жерінен айрылып, өзге елдермен араласып кетсе, біздің жоғалып кетуіміз мүмкін деген пікірлер де бар. Бұл туралы да газеттің ілкіде айтқан санында келтірілген. Ондағы Оренбург, 10 феурал деп аталатын мақалада.

- «Ауғанға шейін тұтас тұрған халық едік. Арамызға әр түрлі хан кіріскенде, солармен қатар, атымыз жоғалмай, қазақ ұлты болып тұра аламыз ба? Осы – бізді төсекте дөңбекшітіп ұйқымыздан бұзатын нәрсе. Басқа жұртпен араласқанда өз алдына ұлт болып, өз алдына тілі бар, өз тілінде жазылған сөзі (әдебиет) бар жұрттар ғана тұрады».

Газет редакциясына тұс-тұстан жолданған хаттармен қоса, қазаққа алғысын білдіретін өлең шумақтары да келіп тұрған. Соның ішінде кейбірі газетаның шыққанына қуанып, сүйінші сұраса, кей хаттарда қазақ оқу-білімді, хат тануды қажет етпейді деп жазған хаттар да болған. Сонымен қатр, сол жылдардағы шығып тұрған, шығарылып жатқан басылымдарға жазылу жағы айтылып, кейбіріне көмек те сұраған. Жақында шыққан кітаптар мен оларды қай жерден алуға болатындығы да көрсетілген.  Мысалы, Уральск қаласында он шақты нөмері шығып тоқтаған «Қазақстанның» жаңадан шыға бастағандығымен қоса, Троицкіде шығатын «Айқап» журналы туралы да айтылған. Дәл солай «Қазақ» газетіне жазылу дәптері де келтірілген.

«Қазақ», 1913, №1. 2 ақпанда шыққан санында:

- «Қазақ» газетасының мақсаты: жұрттың пайдасына көз, құлақ болу. Елдің қандай мұң-зары Һәм мұқтажы барлықты білдіріп тұру. Қазақ арасына ғылым таралуға, өнер жайылуға басшылық ету. Дүниенің Һәрбір халінен хабар беріп, басқа халықтармен қазақты таныстыру.

Дәл осындай нұсқамен жазылған қазақ газетіндегі қазақ алыптары ел болуды армандаса да, сол кездері сауатсыздықтың кесірінен ел болуға әзір емес еді. Ондағы Ахмет Байтұрсынұлы, Міржақып Дулатұлы, Әлихан Бөкейханов, Мұстафа Шоқай, Мұхамеджан Тынышбайұлы секілді бірқатар қазақ зиялылырының газетке қосқан үлесі көп еді. Олар өз тілін, дінін, жерін қорғап қалуды арман етті. Ал біз сол арманның жемісіміз. Қолда бар алтынның қадірін бағалайық.

«Қазақ» газеті,  1913 жыл,  №1, 2 ақпан.

-«Жұрт үшін шығарылған нәрсе жұртқа жақын болуы тиіс. Аспандағанмен жерден алыс кете алмаспыз, артылдық дегенмен, елден артық кете алмаспыз».

 
0
0
1524

Ақын тағдырына арқау болған спектакль

 

Кеше Мұхтар Әуезов атындағы академиялық драма театрында «Театр көктемі – 2017» фестивалі басталды. КСРО және Қазақстанның халық артисі, КСРО Мемлекеттік сыйлығының лауреаты, профессор Хадиша Бөкееваның 100 жылдығына арналған биылғы фестиваль «Ақан сері Ақтоқты» трагедиясымен ашылды.

Қазақ драматургиясы саласындағы шоқтығы биік туындылардың бірі    «Ақан сері мен Ақтоқты» пьесасы десек артық айтқандық болмас. Әйгілі У.Шекспирдің «Ромео-Джульеттасымен» қатар тұратын Ғ.Мүсіреповтің бұл туындысы – ұлттық драматургияның інжу-маржаны ретінде бірауыздан мойындалғаны баршаға мәлім. Осы ретте, әдеттегідей сүйікті театрымнан көптен күткен спектаклді тамашалаудың сәті түскен болатын.

Пьесаны белгілі актер әрі режиссер Қуанышбек Адылов сахналапты. Қазақ классикасының інжу-маржаны жаңа режиссердің қолтаңбасымен өзгеше бояумен берілгені көрініп тұр. Қазақтың халық жазушысы, драматург Ғ.Мүсіреповтың бұл шығармасы Ақан сері мен Ақтоқты арасындағы махаббат жайында баяндалады. Қойылымда ізгілік пен зұлымдық, ескі мен жаңаның тартысы, махаббат үшін күрес көрініс тауып, қазақ ән өнерінің ақиық ақыны Ақан бейнесі жан-жақты ашылған.

Махаббат болған жерде қызғаныш та қатар жүретіні анық. Спектаклді көру барысында сегіз қырлы бір сырлы Ақан Сері мен ақылына көркі сай ару Ақтоқтының қайғымен аяқталған махаббатының куәсі болдым.

Театр сахнасында сал-серілердің падишасы, ақиық ақын Ақан серінің рөлін ойнау Қазақстан "Серпер" Жастар одағы сыйлығының лауреаттары Алмас Шаяхметовке бұйырыпты. Талай асуларды бағындырып жүрген талантты актердің өнеріне баға беріп жатудың өзі артық. Ақан әндері мен күйлерінің арқауына айналған ару Ақтоқты бейнесін Қазақстан "Серпер" Жастар одағы сыйлығының лауреаты Ләззат Қалдыбекова өз деңгейінде жеткізе алды. Дарынды актриса Ақтоқтының болмысын өзінше тануға тырысқанын аңдамау мүмкін емес. Ақ өлеңмен айтылатын әр сөзінің сәулесін сезінуге тырысатыны көңіліме қуаныш ұялатты.

Сонымен қатар, Науан хазірет пен Жалмұқан, Қорамса мен Қоңқай, Балта мен Жылкелді секілді айшықты образдарды ашу барысында нағыз таланттар бой көрсетті. Сал серілер заманына тән сипатты режиссер қолдан келгенше сетінетуге тырысқаны сахна шымылдығы ашылған сәттен-ақ белгілі болды. Мұндағы Ақан қыз көзі көзі жайнайтын, қызық қуған Ақан емес, теңдік үшін, әділет үшін шырылдап жүрген азаматтық үні басым күрескер.

Ұлттық драматургиямыздың жауһарына айналған бұл пьеса қай кезеңде де, қай ғасырда да өзекті болары даусыз. Қысқаша айтқанда, қойылымнан ерекше сезіммен оралдым. Сіз де көріңіз, оқырман. Бәлкім, сіз де өз сауалдарыңызға жауап тауып қайтарсыз. Кім білсін?...

P.S. Сөз соңында, барша театр майталмандарын төл мерекесімен құттықтай кетуді жөн көріп отырмын.  Көрермен көңілін нұрға, жүректерін жырға бөлеп, халқымыздың ұлттық құндылықтарын ұлықтап, өнерсүйгіш ұрпағымызды тәрбиелеу жолындағы игілікті еңбектеріңіздің жемісін көріңіздер, ұлтымыздың саф өнерін жандандырып, биік белестерден көріне беріңіздер деген жылы лебізімді білдіргім келеді. Фестиваль құтты болсын!

 

.

 
0
0
3038

Жайдарманның жайы

 

Сатирик Сейіт Кенжеахметұлының "Күлдіре білу - өнер, күле білу - өмір, күлкіге қалу - өлім" деген күлкі туралы та­уып айтқан сөзі бар. Расымен, халыққа күлкі сыйлау, қоғамдағы ке­леңсіз жайттарды сынға алып, әзілмен жеткізу кез келген жанның қолынан келетін іс емес. Талант пен тап­қырлықты қажет ететін өнерге әркімнің-ақ та­ласы бар. Дей тұр­ғанмен, киелі өнерді өлтір­мей­тін, отын өшірмейтін өнерпаз болу басты мәселе екенін ескергеніміз жөн. Осы орай­да, қалың жұртты өнерімен тәнті ет­кен қазақ әзілінің алғаш­қы қарлы­ғаш­ы "Та­маша" әзіл-сықақ теа­тры, қо­ғам­­дағы кө­рініс­терді шымбайыңа бата­тын тікенді тіркестер арқылы әзіліне сый­дырған "Шаншар", "Алдараспан" секілді шоқтығы биік өнер топтарының орны қашанда ерекше. Бүгінгі күні әзілдерінің әрлеуі аталмыш өнер ұжымдарының деңгейіне жетпесе де, бір терінің пұш­пағын илеп, қалып­тасып келе жатқан жаңа толқын әзіл­кештер жетерлік.

Солардың қатарында қоғам сұра­ны­сына ие жайдарманшылардың да бар екені жасырын емес. Тіпті жайдарман ар­қылы танылып, өзіндік имиджін қалып­тас­тырып үлгерген жастардың қатары қалың. Бұл, әрине, қуантарлық жайт. Мұн­дай көңілді тапқырлардың кейде сәтті, кейде сәтсіз шыққан туындыларын сіз бен біз көріп жүрміз. Алайда, өнер бар жерде сын мен сапаның қатар жүретіні секілді, кемшілік атауы да қылаң беретіні анық. Бүгінгі әзіл-қалжың көрермен кө­ңілінен шығады ма? Кемшіліктері мен жеткен жетістіктері қандай? Осы тұста бүгінгі Сыр өңірі жайдарманының жай-күйін саралап көрелік.

Жайдарман десе ішкен асын жерге қойып, тағатсыздана күтетін көрерменнің көп болуы сапалы әзіл мен жақсы ойын­шы­ға байланысты. Жайдарман ойында­рын­да жайдары жақсы әзілімен көрер­мен­дердің көзайымына айналған құрама қатарында Сыр саңлақтары да баршы­лық. Бұл соңғы 10 жыл көлемінде қарқын­ды атқарылған жұмыстың, қызу дайын­дықтың болғандығын айқындайды. Әзіл ала­ңында "Қызықорда", "Тұңғыш Ас­та­на", "Қорқыт құрамасы", "Аралас" секілді ко­мандалардың топ жаруы өңірлік жай­дар­ман үшін үлкен жетістік деп айтуға болады. Бүгінде республикалық деңгейде өнер көрсетіп жүрген "Қармақшы құра­масы" да мақтануға тұрарлық.

 

Жайдарман ойындарының жандана түсуі көпшілікке оң көзқарас қалып­тас­ты­рып, жастардың қызығушылығын жыл өт­кен сайын арттыруда. Дегенмен, сан­нан гөрі сапаның болғаны маңыздырақ. Се­бебі, жиылған халық пен әділ бағасын берер төрешінің де күтетіні ой салар ас­тарлы әзіл, қағытпа қал­жың. Жү­йе­сіз сөз, арзан күлкі, дарақы қы­лық, құр айқай-шу осын­дай тізбекпен елге күлкі сый­ладым деп, өзі күлкіге қа­лып жа­та­тын жай­дар­ман топтары жоқ емес. Бұл жөнінде "Қазақстан КВН Одағы" рес­публикалық жастар қоғам­дық бір­лестігінің Қызыл­орда КВН фи­лиа­лы­ның директоры Әлі­би Басаров ойын бы­лайша жет­кіз­­ді:      - Жұлдызды жай­дар­ман­шылар мау­сымы аяқ­талды. Сондықтан біз жаңа жай­дарман командасын жарыққа шы­ғару­дамыз. Әрине, бұл үшін жұ­мыс­тар атқарылуда. Жайдарманға қызы­ғу­шы­­лығы басым болғанымен, сахна төріне бірінші рет шығып тұрған қыз-жігіттер де арамызда бар. Екіншіден, ойындағы орын алмасу да әзілдің кө­шіріліп, қайтала­нуы­на әсерін тигізіп отыр. Бұл уақытша ғана, алдағы уақытта ай­тылған кемшіліктер түзеледі,- деп түйіндеді сөзін.

Ал, көпшілік қауымның жайдарман жайлы ойын сұрап, берер бағасын біл­ге­ні­мізде түрлі пікірлерді естідік. Бірі әзіл­дердің көңіл көншітпейтінін айтса, бірі жайдарман ойындарының жаңарып жатқандығына тоқталды. Ойыншылар көпшілік көрерменнің көзқарасы мен сұранысына құлақ асса, өткір әзілдерімен көзге түсу үшін командаларға көп ізденіс керек. Осы тұста әзілдері сапалы "БУ құрамасы", "Әл-Фараби құрамасы", "Жас new" сынды жас жайдарман топтары көрермендердің қошеметіне ие екендігін бай­қадық. Ал, жайдарманның аға тол­қынының бірі Нұрлыбек Асанбаев:

- Қызылорда жайдарманының жетіс­ті­гі жаман емес. Дей тұрғанмен, жайдар­ман саласында жүрген жастарды жан-жақты сауаттандыру керек сияқты, ме­ніңше. Сонда ғана сапалы әзіл, қызу ойын көрінісі көпшілік назарына ұсынылады. Көш жүре түзеледі. Алдағы уақытта аға буын өкілдерінің жолын жалғар жай­дар­ман­шылар шығады деген үміттемін,- дейді.

Жас жайдарманшы қауым қоғамдағы өзекті мәселені көбірек сынға алып, ел ес­керер есті әзілдерді халық назарына ұсын­са сабырлы еңбектің құны салмақты бол­мақ. Қарапайым көрерменнің де, осы сала­дағы мамандардың да пікірін білдік. Әрі қарай ой таразысына салып, тұщым­ды әзіл ойнай білу жайдарманшылардың, ал оны саралау көрерменнің өз еншісінде.

 
2
0
900

Өткен апталарда барлық жаңалық сайттарын шулатқан жанат естіріңізде ме? Ол оралды!

Бірнеше апта бұрын барлық жаңалықтарда жас алматылық отбасының пәтеріне шайқағыш жанат (!) еніп, асүйлерінде ыдыс жуғаны туралы бейнебаян әлеуметтік желілерде, тіпті көрші Ресей, Қырғызстан, Беларусь, Молдова, жалпы – ТМД-да көптеген пікір жинады. Жолақ түндік қонақ қылығы жайлы роликті бірнеше миллион адам көріп шықты, бүкіл халық таң қалуда...

Ал бүгін барлық БАҚ-тарға баспасөз хабарламасын... Каспи банк жіберіп, одан қызық жүндес жануар Kaspi.kz-тегі дүкеннің ауқымды жарнама науқанының қатысушысы әрі актері болғандығы анықталды.

Каспи банк түнгі ыдыс жуу оқиғасы ақыры немен аяқталатының көрсететін роликтің толық нұсқасын жариялады. Шынында... Дегенмен, өзіңіз пост соңындағы жаңалық репортажын тамашалаңыздар. Өзімнің тәжірибелі рекламист ретінде жанаттың жарнама майданындағы дебюті сәтті өткеніне күмәнім жоқ. Мүмкін, Каспи банк алматылық шайқағыштың актерлік дарынына әлі талай рет жүгінетін шығар?

Посттың орысша түпнұсқасы

 
1
0
1425

Қатерлі өткел

Тағы да Ілияс Есенберлин. Бірақ бұл жолы "Қатерлі өткел" кітабы. "Адасқан ақын" мен "Алтын құс" атты екі шығармадан тұрады. Екі туындыда да бір - біріне ұқсамайтын кейіпкерлері мен оқиғалары бар. "Адасқан ақында" Ақан мен оның жолын қуған ақын жігіттер өмірі суреттеледі. Дұрыс жолдан адасқан Бүркіт және оның ел тағдырын көріп дұрыс жолға бастаған жолдастары. Әсіресе көп көмегін тигізген Хасен болды. Оның ақындық жолында шығармаларын шығаруға көп көмегін тигізді. Ел жұртының жаңа өмірге бастаған талай күндерін көріп, басынан өткерді. Халықпен бірге болып, олардың жанын түсінді. Қай жерде болмасын жағымсыз кейіпкерлер, ойы мен түсінігі бөтен адамар кездесіп жатады. Соның бірі Әкпар еді. Әкесі жері мен билігінен алынғаннан кейін, бәріне Россияға қосылған елінен көріп, қасында бірге бола тұра, өзімен аяғына дейін бірге болмаған жолдастары мен қарсы шыққан адамдардан кегін алуды ойлайды. Өшін алады да. Бірақ ол үшін жазықсыз жандар жапа шегеді. Ал "Алтын құсқа" келетін болсақ. Бұнда жасы елуге келіп қалған Сабырдың әлі күнге өшпеген махабаты туралы айтылады. Оның алтын құсы Ақбаян. Жиырма бес жыл өткеннен кейін бір - бірін көреді. Сабыр ата - анасының қараймын деп, оқуға бармай шахтаға түсіп жұмыс жасайды. Одан кейін соғыс басталады, солай ол Ақбаянынан мәңгіге айырылады. Ақбаян басқаның жары атанады. Сабыр болса сезімі өшесе де басқа жанға қосылып жаны тынышталады. Жарынан айырылғанна кейін медсестра Бәтиманы жолықтырады. Отыздарға келсе де әлі тұрмыс құрмаған қыз да Сабыр ағасына деген сезімі бар болатын. Шахтер ағаның да Бәтимаға сезімі оянғандай.  Бірақ Ақбаянға деген сезімі де әлі өше қоймаған. Солай күндердің күнінде Ақбаянның оны жақсы көретінін білсе де, оның жанынын кәзір мүлде басқа екендігін біледі. Келе келе адамдар өзгереді ме? Әлде тағдыр солай болды ма? Алтын құс туралы аңыз есіне түсіп, шығарма соңы құсының жез болып шығуы да мүмкін деген тұжырымға келеді.

2
0
6044

Қызылордалық полицейлер есірткі затын сату фактісін әшкереледі

2017 жылғы 28 қаңтарда полиция қызметкерлерінің жүргізген жедел ұйымдастыру шаралары барысында 2000 теңгеге 2 дана газет қиындысына оралған өзіне тән ерекше иісі бар затты сатпақ болған жерінен 1970 жылғы Сырдария ауданының тұрғыны ұсталды. Тәркіленген затқа тиісті сараптама тағайындалып, нәтижесінде 3,31 гр-ды және 4,0 гр.-ды құрайтын «кептірілген марихуана» екендігі дәлелденді.

Ұсталған азаматтың үйін тексеру барысында тағы 1 жарым килограмға жуық есірткі заты табылды. Оны күдікті үй ауласындағы жертөлеге полиэтилен пакетіне орап тығып қойған. Затқа сараптама тағайындалып, жалпы салмағы 1 кг. 260 гр.-ды құрайтын «кептірілген марихуана» екендігі белгілі болды.

Қазіргі таңда Қазақстан Республикасы Қылмыстық кодексінің 297-бабының 1-бөлігі және 296-бабының 4-бөлігі бойынша қылмыстық іс қозғалды. Күдікті Сырдария АІІб-нің Уақытша ұстау абақтасына қамаққа алынды. Тиісті сотқа дейінгі тергеп-тексеру амалдары жүргізіліп, басқа да қылмыстарға қатыстылығы анықталуда.

Дәл осындай факт 16 ақпан күні де тіркелген. Есірткі затын саудалап тұрған жерінен 1968 жылы туылған Бесарық ауылының тұрғыны ұсталды. Оқиға орнынан айғақ зат ретінде 2 дана газет қиындысына оралған жасыл түсті өзіне тән иісі бар зат алынды. Белгісіз затқа сараптама тағайындалып, 5,39 гр.-ды және 5,83 гр.-ды құрайтын «кептірілген марихуана» екендігі анықталды.

Аталған дерек бойынша Қазақстан Республикасы Қылмыстық кодексінің 297-бабы 1-бөлігі негізінде қылмыстық іс қозғалып, сотқа дейінгі тергеп-тексеру амалдары жүргізілуде.

 

Қызылорда ОІІД баспасөз қызметі

 
0
0
388

2017 жылдың ақпан айында шетелдік азаматтарға Қазақстанда жұмыс істеу үшін 2 мыңнан астам рұқсат берілді

2017 жылдың ақпан айында, жергілікті атқарушы органдар тарапы, 476 жұмыс берушіге шетелдік жұмыс күшін тарту мақсатында 2063 рұқсат беріп, олар 436,9 млн теңге көлемінде салық төлемін жасады.

Рұқсат беру бойынша мемлекеттік қызмет, тікелей жергілікті атқарушы органдармен қоса, «электрондық үкімет» порталының «бірыңғай терезе» әдісі арқылы да жүзеге асырылады.

Еске сала кетсек, 2017 жылдың 1 қаңтарынан бастап, Қазақстан Республикасына шетелдік жұмыс күшін тартудың жаңа жеңілдетілген тәртібінің енгізілуіне байланысты жұмыс рұқсаттарын беру мерзімі қысқартылды және жұмыс берушілерге қатысты әкімшілік талаптар алынып тасталды.

Бұл ерекше шарттардың орнына жұмыс беруші жергілікті бюджетке төлейтін жаңа салық алымы енгізілді. Алым мөлшерлемесі шетелдік жұмыс күшінің санаты мен саласына қарай 137 АЕК-ден 250 АЕК-ге дейінгі шамада белгіленеді, бұл  290 мың мен 530 мың теңге аралығы.

Аталған ретте жұмыс берушілерге қойылатын кадрларға жергілікті қамтылым жөніндегі шарттарды сақтау талаптары өзгермейді, яғни басшылар мен олардың орынбасарлары бойынша кемінде – 70%, мамандар мен білікті жұмысшылар бойынша кемінде – 90%.

 
0
0
315

Ұйқы сұрау

1999 жыл. Түн. Мен, ағам, әпкем "золотой граммофон" көріп жатырмыз. Інім мен әжем ұйықтап жытыр. Әжем қайта-қайта "әй, ананы өшіріңдер!" деп қояды. Өзі айналдырған екі бөлме, бірінде үлкен ағам ұйықтап жатыр, есігін жауып алып. Екіншісінде біз. Ұзыннан жерге төсек салып алып, барынша теледидардың дауысын басып қойдық. Бір кезде "Шешіңнің...." деп айқайлап інім орнынан атып тұрады. Бірнарселерді айтып, ашуланып бөлмеден шығып кетті. Менің зәрем қашып кеткен. Жата қалдым. Ағам мен әпкем күліп отыр. Әжем "Оятпаңдар, әкеліп жатқыз," деп жатыр. Әпкем жатқызды. Сонда да қоймайды, інім бірнәрселер айтып... Біраздан соң ағам: "Ана бөлмеге барып не істер екен, көру керек еді)))" дейді қалжыңдап...

Негізі сол інім жиі ұйқы сұрайтын. Бірақ екеуміз "страшно" дос едік. Қайда жүрсем де қасымнан тастамайтынмын. Бір күні басқа әпкемнің үйіне қонуға бардық. Үй дегенде жатақхана ғой. Бір бөлме. Ас үй де, зал да, жатын бөлме де сол. Тағы түн. Інім ұйықтап қалған. Екеуміз сыбырлап әңгіме айтып, сканворд шешіп, шекілдеуік (семечки) шағып отырмыз. Бір кезде))) інім ұрсып орнынан тұрды. Түсініксіз бірдеңелер айтып тұр. Біз "бісміллә-бісміллә" деп қарап отырмыз. Не болса біраз нәрсе айтып-айтып тастады да, дамбалын (трусы) шешіп тастап, жатып ұйықтап қалды. Үнсіздік. Әпкем маған қарайды. Мен оған қараймын. Ал енді күлейік... Ішек-сілеміз қатқанша күлдік. "Бұл сонда не болды? Түсінде не көрді екен?" деп сұрап қоямыз. Қазір інім ер жетіп бұл әдетінен арылды. Бірақ кейде ұйқы сұрап, келіннің зәресін алмай ма екен деп ойлап қоямын.

Негізінде ұйқы сұрау қалыпты жағдай деп жатады. Ал осыған ұқсас "айкезбе" деген ауру бар екен. Өте қорқынышты. (Оны жазбай-ақ қояйын, ғаламтордан қарарсыз, қызық болса) Сол себепті жақындарыңыз ұйқы сұрағанда қарап қойыңыз.

0
0
3514

Жергілікті полиция қызметі қатарына қабылдау жалғасуда

Ағымдағы жылдың 13 наурызында сағат 15.00-де Ақтоғай ауданындағы «Нұр Отан» партиясы филиалының мәжіліс залында «Жергілікті полиция қызметі қатарына қабылдау» тақырыбында жергілікті полиция бастығы С.Сейпадамовтың аудан бойынша өзін өзі қамтыған жастармен кездесуі өтті. Кездесуді Ақтоғай ауданындағы «Нұр Отан» партиясы филиалы төрағасының бірінші орынбасары Б.Алханов, жергілікті полиция қызметінің бастығы С.Сейпадамов және  «Ақтоғай ауданы ішкі саясат бөлімінің «Жас Қанат» жастар ресурстық орталығы» КММ директоры С.Аягановтың бастауымен ұйымдастырылды.

Кездесу барысында жергілікті полиция қатарына қызметке қабылдау тәртібі мен бос орындар туралы ақпарат берілді. Іс-шараның мақсаты өзін өзі қамтыған аудан жастарының жергілікті полиция қызметі қатарына жұмысқа қабылдау.

Алдағы уақытта да аталмыш бағыттағы жұмыс өз жалғасын табады.

0
0
1137