Мазмұнға өту

Жаңа

Қандай такси қызметіне жүгінген жөн?

Қала өмірін таксисіз елестету мүмкін емес. Қазір Астанада қызмет көрсететін такси жүйелері көп. Бірақ қарапайым халық үшін олардың қайсысы тиімді?

Бүгінде такси қызметінің бірнеше түрі бар: жол-жөнекей ала кететіндер, интернет желісі арқылы тапсырыс қабылдайтын және арнайы қоңырау шалу арқылы шақырылатын ресми таксилер.

Бұл жазбада қоғам арасында кең қолданысқа ие «inDriver» мобильді қосымшасына толығырақ тоқталайық.

InDriver – қалааралық, жолаушылар және жүк тасымалдау қызметін жүзеге асыруға мүмкіндік беретін интернет-агрегатор. InDriver-ге қосылу оңай – ұялы телефон, смартфоныңызға қосымшаны жүктеп, тіркелуден өтсеңіз болғаны. Аталмыш мобильді қосымша Android, IPhone, Windows Phone пайдаланушыларына қол жетімді.

Елімізде бұл жүйе жылдам таралды. Бастапқыда inDriver-мен елордалықтар ғана қолдана алса, қазіргі уақытта оны 15-тен аса қаланың тұрғындары пайдаланады. Осы орайда "InDriver-дің артықшылығы неде?" деген сұрақ туындайды.

Біріншіден, inDriver таксилерінің бағасы төмен. Қызмет құнын өзіңіз белгілейсіз. Дәстүрлі такси қызметін пайдаланумен салыстырғанда, ақшаңызды 30-50%-ға дейін үнемдейсіз.

Екіншіден, уақытты үнемдеу. Интернет арқылы тапсырыс жасаған соң картада жақын маңайдағы көліктер шығады. Онда жүргізушінің аты-жөні, машина маркасы, рейтингі көрсетілетін болады. Өзіңізге керегін таңдап, жүргізушімен тікелей байланысқа шығасыз. Такси қызмет көрсету орталықтарына хабарласып, бос көлік іздеудің, диспетчердің қоңырауын күтудің еш қажеті жоқ.

Үшіншіден, қосымшаның көп функционалдығы. Машинада автокресло, кондиционердің болуы, жолдан басқа жерге соғу, жүк тасымалдайтын көлік немесе микроавтобус жалдау, қаларалық тасымал және т.б. Тапсырыс беру барысында өзіңізге қажетті критерийлерді белгілей отырып, межеленген жеріңізге ыңғайлы да, жылдам жетесіз.

(Суреттер ВКонтакте әлеуметтік желісіндегі InDriver-дің ресми парақшасынан алынды)

InDriver-дің ең басты артықшылығы - қауіпсіздік. Сіз жүргізушінің аты-жөнін, жасын, машинасының маркасы мен нөмірін, жасаған тапсырыстар санын көре аласыз. Сондай-ақ, басқа да жолаушылардың берген бағасына қарай  таксистті таңдау мүмкіндігіне ие боласыз.

InDriver-ді смартфоныңызға жүктеп, алаңдамастан қолдана беріңіз. Ол тексерілген, әрі тиімді такси жүйесі. Бас қаламыздағы басқа да такси жүйелері жайлы келесі жазбаларда.

 
1
0
2082

Солтүстік Қазақстан облыстық сотында қылмыстық процестегі медиацияның ерекшеліктерін талқылады

Солтүстік Қазақстан облыстық сотында «Қылмыстық процестегі медиация» тақырыбында «дөңгелек үстел» өткізілді.

«Дөңгелек үстел» жұмысына прокуратура, ішкі істер департаменті, адвокатура, үкіметтік емес ұйымдардың өкілдері, медиаторлар қатысты.

Облыстық соттың төрағасы Ерлан Айтжанов іс-шараны ашып, қылмыстық істерді заңда бекітілген жағдайда татуластырумен, әсіресе медиация тәртібімен тоқтату көп жағдайда қылмыстық процестегі екі тараптың – қылмыстық құқық бұзушылықты жасаған тұлғаның және жәбірленушінің мүддесіне сәйкес келетінін атап өтті.

Статистикалық деректерге сәйкес Солтүстік Қазақстан облысының соттары қараған қылмыстық істердің жалпы санынан үштен бір бөлігі сотталушылардың жәбірленушімен татуласуына байланысты қылмыстық жауапкершіліктен босатумен аяқталған. Сонымен бірге татуласумен тоқтатылған қылмыстық істердің жалпы санының жартысы бойынша тараптар медиация тәртібімен  татуласқан.

Қазіргі күні Солтүстік Қазақстан облысында Қазақстан халқы ассамблеясының жанындағы Медиация орталығы және аудан әкімдіктері мен жекелеген селолық округтерінің жанында 67 медиация кабинеті жұмыс істейді.

«Дөңгелек үстел» барысында облыстық соттың судьясы Рамазан Хасенов соттардың медиация тәртібімен жәбірленушімен татуласу арқылы қылмыстық істерді тоқтатуының кейбір мәселелері туралы айтып берді. Облыс прокуратурасының сот актілерінің заңдылығын қадағалау жөніндегі басқармасының басшысы Салтанат Дарбаева жиналғандарды сотқа дейінгі және сот ісін жүргізу барысында жүргізілетін медиация ерекшеліктерімен таныстырды.

Сондай-ақ іс-шараға қатысушылар медиация тәртібімен татуласуға байланысты қылмыстық жауапкершіліктен босату сот практикасын зерделеп және қылмыстық сот ісін жүргізу барысында медиацияны жүргізу тәртібі мен шарттарын талқылады.

«Дөңгелек үстел» соңында құқық қолдану қызметінде туындайтын проблемалық мәселелерді шешу үшін бірыңғай жолдар табу жөніндегі ұсынымдар қабылданды.

http://sud.gov.kz/kaz/news/soltustik-kazakstan-oblystyk-sotynda-kylmystyk-procestegi-mediaciyanyn-erekshelikterin

0
0
468

Құқық қорғау қызметін бағалаудың басты критерийі – халықтың сенімі

А.ж. 14 қазанда Көкшетау қаласының ішкі істер басқармасында жергілікті полиция қызметімен «Сыбайлас жемқорлықтың алдын алудың жаңа тетіктері туралы» тақырыбында кездесу өтті.

Іс-шараның мақсаты – сыбайлас жемқорлық мәдениетін және және құқық бұзушылықтың барлық түрлеріне «мүлдем төзбеушілік» қағидатын қалыптастыру.

Кездесу барысында М. Ахметқалиев: «Тек сыбайлас жемқорлықтан бойын аулақ ұстайтын құқық қорғау органдары азаматтардың құқықтарын, қоғам мен мемлекеттің мүдделерін тиімді қорғауға қабілетті»,  –  деп өз ойымен бөлісті, ал,  А. Жаналинов сыбайлас жемқорлықпен күрес Қазақстанның мемлекеттік саясатының негізгі басымдығы екенін атап өтті.

Іс-шараға Ақмола облысы бойынша Мемлекеттік қызмет істері департаментінің, жергілікті полиция қызметінің қызметкерлері қатысты.

Кездесу соңында Департаменттің өкілдері сыбайлас жемқорлыққа қарсы заңды қолдануға қатысты қойылған сұрақтарға жан-жақты жауап берді.

Іс- шараға 60  адам қатысты.

Департамент госслужбы

0
0
895

Студенттер бір күнде 20 тонна көкөніс жинады

"Серпін" бағдарламасы бойынша оқып жүрген  20 студент Павлодар ауданының Черноярка ауылында фермерлерге күзгі өнімді жинауға көмектесуде. Павлодар Мемлекеттік Педагогикалық Институтының  студенті,серпіндіктер арасында бизнес және жастарды жұмысқа орналастыру  жөніңдегі сардар Оразалы Байманов белсенділік танытты.

Оразылы өзінің қатарластарын жұмысқа шақырып, демалыс күндерінде бірге еңбектенді. Ауарайының жауын-шашынды болуына байланысты жастар шаруа қожалықтарына өз көмектерін ұсынған. Фермерлер студенттерге тиісті еңбекақы төлейді. Айта кетерлігі, Павлодар ауданының фермерлеріне күзгі өнімді дер кезінде жинау үшін жұмысшылар саны жеткіліксіз болған. Осыған орай, студенттер екінші апта демалыс күндері тыңбай еңбектенуде.

 

Жастар бастамаларын дамыту орталығы ақпараттық техникалық бөлімінің жетекшісі Дархан Шуреновтың айтуынша, жастар ауыр жұмыстан қашпай, керісінше көмектерін беруге әзір.

- Таңертеңгі сағат сегізден бастап кешкі төртке дейін жастар алқаптарда картоп пен сәбіз жинайды. Осы жолы 20 тоннаға дейін көкөністерді бір күннің ішінде жинап үлгерді. Фермерлер болса, студенттердің әр қайсына 3000 теңге төлеп, қосымша жатаханаларына көкөністер берілді,-дейді Дархан Шуренов.

 
0
0
1739

«ШАПАҒАТ» халықтық жобасы

"Шапағат" - халықтық жоба!
Бұл шара бізде бір күндік, бір сәттік акция емес. Бұл тұрақты түрде, үздіксіз жалғасатын партияның бірегей жобасы. "Шапағат" - халықтық жобасы мейірімділік пен ізгілікке үндейтін, біздің Солтүстік Қазақстан облысының мұқтаж адамдарын анықтап, оларға көмек қолын созған жомарт жандардың тапсырған заттарын үлестіріп қана қоймай олардың қал жағдайын біліп түрып, көмек көрсетеді.

Көмек қолын созам деген жомарт жандарға біздің есігіміз әрдайым ашық. Мекен-жайымыз Солтүстік Қазақстан облысы, Петропавл қаласы, Е.Бөкетов к-сі 30, Солтүстік Қазақстан "ҚКХП" облыстық комитетінің офисі, тел.8/7152/ 365-916.

2
0
1205

Жастар орталығы марапатталды!

Қайырлы күн АЛАШ жұрты! Аптаның алғашқы күнінен бастап  Жастар бастамаларын дамыту орталығында  тағы бір жеңіс! Осы жолы ұжым LEADER OF THE BRANCH 2016 («Сала қөшбасшысы 2016») қабырға медалімен марапатталды. Бұл марапат рейтингтік зерттеулер нәтижесінде анықталған экономика көшбасшыларына тапсырылатын халықаралық марапат. Медаль орталықтың  экономикалық көрсеткіштері және көшбасшылық мәртебесінің растауы болып табылады.

Сондай-ақ Жастар бастамаларын дамыту орталығының ақпараттық кеңестік бөлімінің жетекші Айтбаев Төлеген Жұмабекұлы мүлтіксіз ресми беделі, бастамашылдығы және міндеттерді орындаудағы тиімділігі, ұжымдық құндылықтарды ұстанғаны үшін BENE MERENTI DE PROFESSIONE  («Кәсіби қызметі үшін») медалімен марапатталды.

Павлодар облысы жастар саясаты мәселелері жөніндегі басқармасының  «Жастар бастамаларын дамыту орталығы»  КММ-сінің бас есепшісі Матенова Умсынай Қайырбекқызы кәсіпорынның қаржылық-экономикалық тұрақтылығын қамтамасыз ету және жоғары біліктілігі, ынтасы үшін EMPLOYEE OF THE YEAR 2016 FOR ACCOUNTING AND AUDIT («қаржы және аудит» саласындағы 2016 жыл маманы) халықаралық сертификатына ие болды.

Естеріңізде болса осы 2016 жылдың наурыз айында Жастар бастамаларын дамыту орталығының директоры Садықова Айгүл Абылайханқызы және орталық директорының орынбасарлары Жүсіпбаев Саят Бейбітұлы, Тұрарова Салтанат Жұмабекқызы, есепші Сейсембаева Роза Темерханқызы дәл осындай марапат медальдеріне қол жеткізген болатын.

 
0
0
1498

Арман Тосканбаев: Нөлден басталған бизнес – ең жақсы бизнес

50 жас кәсіпкер жобасының демеушісі — еліміздегі сайт, мобильді қосымша, IT платформалар мен бағдарламалар жасайтын IT холдинг — Bugin Group компаниясы.

Арман ТосканбаевАрман Тосканбаев. ©SZH.kz

Кішкентай кезімнен жақсы өмір сүруге, жақсы киінуге, тамақтануға деген талпыныс болды. Себебі, қарапайым отбасында тудым. Анам аспаз, әкем күзетші болды. Туыстарымыз да бай болған жоқ. Жоқшылықты көрдік. Ақша жетпей қалатын. 4-сынып оқып жүргенде елмен бірге темір өткізіп, азын-аулақ ақша таба бастадым. Қазір ойласам, бизнеске деген қабілеттілік бойымда сол кезде пайда болған екен.

6-сыныпта оқып жүргенде ешқандай ерекшелігім жоқ екенін түсіндім. Құрдастарымның біреуі әнші, біреуі суретші, біреуі математик еді. Менің қолымнан түк келмейтін. Сабақты да орташа оқимын, дене шынықтыруда саптың ең соңында тұрамын (күліп). Біреу футболды жақсы ойнаса, мен оны да білмейтінмін. Сосын «Неге мен өзгеше емеспін?», «Неге талантсызбын?», «Неге бір нәрсе үйренбеймін?» деген ой келді. Сол кезде маған Жадыра Мұратханқызы деген информатика пәнінің мұғалімі жол сілтеп, компьютерлердің тілін меңгеруге бағыт-бағдар берді. Ол кісі оқу ісінің меңгерушісі болатын. Мені информатика сыныбына кіргізіп, «Міне, үйрен»,-деп қалдырып кететін. Компьютерлердің ана жерін бір, мына жерін бір шұқылап жүріп, үйреніп алдым. 9-сыныпта жүргенде мұғалімдердің, құрдастарымның, Қарағанды қаласының біраз жерінде компьютер жөндеп, ақша табатын болдым. Олар ақысына 200-500 теңге береді. Ол кезде бұл кәдімгідей ақша еді ғой (күліп). Сөйтіп ақшаның құнын түсіне бастадым.

«Алғашқы миллионымды 17 жасымда таптым»

10-сыныпта өзімнің ең бірінші бизнесім – компьютер сататын орталығымды аштым. Ол кезде «Валют-Транзит банк» банкротқа ұшырап жатты. Мен оның компьютерлерін 4 мың теңгеден сатып алдым да, жөндейтінін жөндеп, істейтін бөлшектерін құрастырып, бір компьютерді 20 мың теңгеге саттым. Ол үшін таңғы 6-да тұрып, қалада хабарландыру жабыстырамын. Онда компьютердің фотосы, сипаттамасы, бағасы, байланыс телефондары жазылып тұрады. Сол арқылы біраз адамдар хабарласты. Аптасына 4-5 компьютер сатып, айына 100-150 мың теңге тауып жүрдім. Жазда әкем екеуіміз ауылдық жерлерге шыға басадық. Бірақ ауыл адамдарында ақша жоқ. Сондықтан бір компьютерді екі қойға айырбастадық. Ол кезде екі қойдың бағасы 30 мың теңге еді. Малды қалаға алып келіп, тағы саттық. Оның ақшасын доллармен беретін. Солай 17 жасымда ең бірінші бір миллионымды таптым. Оны қалай санағаным әлі күнге дейін есімде (күліп).

Арман Тосканбаев©SZH.kz

11-сыныпта ҰБТ-дан нашар бал жинап қалып, университетке түсе алмадым. Бір бал жетпей қалды. Сондықтан бір жыл тағы да компьютер саттым. Келесі жылы Ресейдің Томбы қаласындағы университетке «Ұшу динамикасы мен ракета құрастыру» факультетіне грантқа түстім. Ол жақта да босқа жүрмей, достарыммен бірге құрылыс ағаштарын саттық. Орман шаруашылығы бар қытай жігітпен серіктес атандық.

Арман ТосканбаевАрман Тосканбаев: Қызық жайт болды. Новосібірден бір орыс ағаш сатып алуға келді. Бізді көрді де, тоқтамай күле береді. «Не болды?»,-деп сұрасақ, «Маған, орысқа, -дейді, орыстың Сібірінде қытай мен қазақ ағаш сатып отыр»,-дейді (күліп). Сөйтсек, олардың бизнесін қазақтар мен қытайлар жаулап алыппыз. ©SZH.kz

Университетте оқып жүргенде, әрдайым ізденісте жүретінмін. Шетелде гидропоникалық технологияларды қолданатынын естіп, бірден «Неге вертикальді жылыжай жасамасқа?» деген ой келді. Ол ойымды сол кездегі ауыл шаруашылығы министрі Асылжан Мамытбековтің блогына жолдадым. Министр мені Қарағандының ауыл шаруашылық басқармасына жіберді. Олар ешқандай көмек берген жоқ, тек «Жарайсың! Жасап жатқаның жақсы. Оқуыңды бітіргеннен кейін кел, қолдау көрсетеміз»,-деді. Соның өзі маған үлкен мотивация берген еді.

Ресейдегі оқуымды 2-курста тастап кеттім. Оқып жатқан салам қызық емес еді. Қазақстанға келгенде балмен, консалтингтік жұмыстармен айналыстым. Менде бір бизнес бастасам, оның ең жоғарғы табысына қол жеткізіп, 180 градусқа өзгеретін қасиет бар. Солай болды. Жинаған білімім жетіспейтінін түсіндім. Даму үшін Intertel компаниясына техник болып жұмысқа кірдім. Бір жылдан кейін техникалық директор болдым, одан кейінгі жылы 21 жасымда директордың міндетін атқарушы болдым. Ол 1997 жылдан бері жұмыс істеп келе жатқан интернет және телефон байланыстарымен  айналысатын Қарағандыдағы өте үлкен компания еді. Қол астымда 10 шақты адам жұмыс істеді.

«Гидропонды технологиямен жеті күнде 165 килограмм шем-шөп алуға болады»

Арада 3-4 жыл өткен соң гидропонды технологияға қайтып келдім. Әкем екеуіміз ең бірінші тәжірибелерді жасадық, құрылғыларын таптық. Бұл технологияны ауыл шаруашылығында қолдануымыздың өзіндік себебі бар. Қазақстанда еттің бағасы неге қымбат? Өйткені, малдың азығы қымбат. Соны арзандату үшін осы технологияны қолдануға болады. Бұл негізі Мысырда ойлап табылған, екі мың жылдық тарихы бар әдіс. Біз оны Қазақстанның экологиясына бейімдедік. Сол арқылы 33 кг арпадан 165 кг жасыл шөп алуға болады. Бірінші күні арпаны сеуіп шығасыз, жетінші күні ұзындығы 20-25 см жасыл шөп өсіп шығады. Бұл жерде басты рөлді температура ойнайды. Ол 18-22’С градустан жоғары болуы керек. Көбі бұларды жылыжайда қолданады деп ойлайды. Жоқ, жылыжай керек емес. Оны жертөледе немесе гаражда өсіре беруге болады. Күннің көзін арнайы шамдар алмастырады. Топырақ қажет емес, тек су ғана қолданылады. Тұқым себілгенде қалыңдығы 3 мм-ден аспауы керек. Сол сияқты түрлі технологиялық нюанстары бар. Оларды сақтасаңыз, өсу жылдамдығы артады да, өнім мол болады. Бір қателік кетсе, барлық тұқымды мүк басып кетеді.

Арман ТосканбаевБір құрылғы 2 сиырға немесе 400 тауыққа немесе 20-50 қоян басына жететін өнім береді.

Қазіргі күнде 30-дан астам шаруа қожалығы біздің құрылғыны қолданады. Олар Алматы, Ақмола, Оңтүстік Қазақстан облыстарында орналасқан. Маңғыстау облысымен келіссөздер жүргізіп жатырмыз. Жуырда Қарағанды облысындаға үш мың бас малы бар үлкен шаруа қожалықтары біздің технологияны орнатады.

Қарқынды түрде дамып келеміз. Бәсекелестеріміз өте аз, Қазақстанда 2-3 компания ғана осы салада жұмыс істейді. Оларға қарағанда біздің сапамыз жоғары, бағамыз төмен. Мысалы, ресейлік аналогтың бағасы 325 мың теңге, біздікі 135 мың теңге тұрады. Сіз оны Ресейден алып келсеңіз, жеткізу үшін көлік жалдайсыз және 12%  қосылған құн салығын төлейсіз. Сондықтан, біздің баға тиімдірек.

Осы технологиямен үй гидропоникасын шығаруды қолға алып жатырмыз. Қазан айының басында алғашқы нұсқалары шығады. Ол арқылы түрлі көкөністерді өсіруге болады.

Басты мақсатым – елімізде осы гидропонды технологияны, тіпті менікін болмаса да, енгізсе ғой деп ойлаймын. Себебі, бізде 100 жыл бұрын малды қалай бақса, әлі солай бағып келеді. Малды жайылымға жіберіп қойып, соңынан жүреді, барлық жүйкесін құртады. Оның орнына гидропоникалық технологияны қолданса, жаз бойы шөп шауып, оны тасып, қыс бойы «Шөп жетпей қала ма?»,-деп қорықпайтын еді. Бұл құралдар жасыл шөпті сізге 365 күн бойы береді және барлық пайдалы элементтері сақталады. Соның арқасында қысты күндері етті 10%-ға, сүтті 15%-ға көбейуге болады. Сондықтан, біз құрылғыларды сатқан кезде оның қолдану тәсілін, қалай құрса, өнімділігі жоғары болатынын сатып алушыларға толығымен үйретеміз.

«Мемлекеттік рәміздер бейнеленген сағат сапалы болуы керек»

Менің бизнесте 10 жылдық тәжірибем бар. Сондықтан әр түрлі салаларға табысы бар екенін көрсем, қорықпай кіріп кете беремін. Қазір жасыл технологиядан өзге, патриоттық «Отан» қолсағаттарын шығарып жатырмыз. Ашылғанына бір жылдан асты. Қазір 6 түрлі сағат шығарамыз. Ең алғашқысы – «Отан» сағаттары. Бұл идея қайдан келді?

Отан сағаттары«Отан патриоты» қолсағаттары. ©SZH.kz

Бірер жыл бұрын бір бизнесім банкротқа ұшырады. Жаңа идея керек болды. Сонда «Еліміздің тәуелсіздік алғанына 25 жыл. Осыған байланысты неге патриоттық сағат шығармасқа?» деген ой келді де, отырып алып сағаттың дизайнын сыздым. Сосын оны әлеуметтік желілерде жариялап, адамдарға ұсыныс жасап көрдім. Көп адамдар сатып алатындықтарын айтып, пікір білдірді. Сөйтіп, Есенов Айбек деген серіктесім екеуіміз сағат шығаруды қолға алдық.

Менің қандай бизнес бастасам да, бәріне ортақ бір ұстанымым бар – «Нөлден басталған бизнес – ең жақсы бизнес». Сондықтан қолымда бар ақшаға қосу үшін үйдегі біраз затты ломбардқа, біраз затты былай да саттым (күлді). Айбек те қолында бар қаражатын салды. Екеуіміз зауыттармен келісім-шартқа отырдық. Алғашқы 100 сағат 2015 жылдың желтоқсан айында шықты да, бір айда толық сатылып кетті.

«Президент» қолсағаттары толығымен Маямиде құрастырылады. Алғашқыда «Отан патриоты» сағаттарын қажетті бөлшектерін Еуропадан алып келіп, Қарағандыда жинадық. Кейін оларды да Еуропада құрастыруға жібердік. Сағаттар швейцариялық, жапониялық механизммен жұмыс істейді. Әйнегі сапфир, қалыбына алтын жалатылған. Менің ойымша, мемлекеттік рәміздер бейнеленген сағаттардың сапасы төмен болмауы керек.

2017 жылы Ресей мен Түркияның нарығына шығуды жоспарлап отырмыз. Оған көмектесетін серіктестер де тауып қойдық. Ол үшін Ресей мен Түркияның елтаңбасын сағатқа саламыз. Бұл үрдіс әлем бойынша әлі дамымаған, ондай сағаттар көп емес.

Сағаттардың ең арзаны 130 мың теңгеден басталады, ең қымбаты – «Президент» деген сағат. Ол 325 мың теңге тұрады. Тұтынушыларымыз депутат, бизнесмен ағаларымыз, шетелден де тапсырыстар түседі.

Президент сағаты«Президент» қолсағаттары. ©SZH.kz

Біздің сағаттың «Кербез», «Мәдени мұра» деген көшірмелері көп. Олар Қытайдан жасап әкеліп сатып жатыр. Кішкене өзгеріс енізсе бір жөн, оюларын өзгертіп, басқа детальдар қосуға болады. Елтаңбаны салғанына қарсы емеспін. Бірақ олар біздің дизайнды толығымен қайталайды, рим цифрлары қалай орналасқан, өрнектер қалай түскен – бәрін көшіреді. Ал, бағасы 5-10 мың теңге аралығында. Оларды сотқа беруге болатын еді, алайда қытайлықтар маған: «Не жақсы сатылса, біз соны көшіреміз»,-деді. Бір жағынан ол бізге берілген баға (күліп).

Арман ТосканбаевАрман Тосканбаев: Екі бизнесімде 30 қызметкерім бар. Олардың ең төменгі еңбекақысы – 40 мың, ең көбі 675 мың теңге. Оны сауда жөніндегі мамандар алады.

Бұдан бөлек Қарағандыда «Нұр шуақ» деген 250 гектарлық агрополисіміз бар. Оған қоса, кішігірім кафем бар, туристік компаниям ашылайын деп жатыр.

Қазір жас кәсіпкерлер ассоциациясының басшысымын. Алайда, таза бизнеске кетейін деп жүрмін. Ондай жерде отыруға әлі ерте сияқты. Тағы да кішкене тәжірибе жинап алайын (күліп).

«2017 жылы 1 млн доллар табыс табуды жоспарлап отырмыз»

Жаңа іспен айналысу, жаңа идея іздеу – маған рахат сыйлайды. Менің тұрақты кеңсем да жоқ: бизнесім Қарағанды мен Астанада, өзім Алматыдамын. Неге? Өйткені маған осындай өмір сүру образы ұнайды. Жаңа адамдармен танысамын. Мысалы, ертең үлкен бір компания басшыларымен кездесемін. Олармен бірлесе отырып, Қазақстандағы су фильтрін шығарғалы жатырмыз. Ол идея аяқ астынан келді. Мен көбінесе бәсекелесі аз, дамымаған, алайда ақшасы бар салаға ғана кіремін. Көп адамдар ондай саланы көре білмейді. Олар, керісінше, танымал болып жатқан салаларға жүгіреді. Осының арқасында 2015 жылы 500 мың доллар табысқа қол жеткіздік. 2017 жылы бұл табысты 1 млн доллардан асыруды жоспарлап отырмыз.

Арман Тосканбаев©SZH.kz

Алдағы бес жылда…

Қазақстанда импорт өте жақсы дамып келеді. Бірақ, оған ешкім кірісіп жатқан жоқ. Елімізде бос салалар өте көп. Неге тауық етін мұхиттың ар жағындағы Америкадан, қой етін Қытайдан әкеледі? Неге IT-технологиялар мен киімдер шетелден келеді? Соны елімізде дамытып, өндіруге болады. Қазір Ресейдің нарығы ашық. Оларға бұрын Еуропадан заттар әкелінсе, қазір жауып тастаған. Сондықтан, Қазақстаннан сол жаққа шығуымызға болады. Менің болжамым бойынша, алдағы бес жылда импорттық өнімдердің орнын басатын бизнестер дамитын болады.

«Өзімді дамыту үшін…»

Көп адамдармен танысамын, шетелге көп шығамын. Осы жазда алты мемлекетте болдым. Алайда, ағылшын тілін нашар меңгергенмін. Көбінесе аудармашы жалдаймын немесе Google Translate бағдарламасымен жүремін. Тіл білмейтініме ұяламын, үйренуге уақыт болмай жатыр.

Әр түрлі шараларға қатысамын. Сол арқылы жаңа идеялар алып, жаңа бизнестермен танысамын. Дамимын. Шынымды айтсам, бизнес жайлы кітаптарды оқымаймын. Оларға аса сене қоймаймын.

Арман Тосканбаевтың бір күні

Таңертең 9-да тұрамын. «Дені саудың – жаны сау»,-деп күн ара фитнеске қатысамын. Кеңсеге көп бармаймын. Менің кеңсем – компьютерім. Сол арқылы командамды толығымен қадағалаймын. Барлық жұмыс онлайн ресурстарда тіркеліп отырады: бүгін қанша сатылым болды, қанша тапсырыс түсті, қандай жұмыс істеліп-істелмей жатқанын қашықтықтан біліп отырамын.

Арман ТосканбаевАрман Тосканбаев: Ақылы мастер-кластар өткізбеймін. Бизнесте жолы болмағандар ғана өзгеге бизнес туралы лекция оқиды. ©SZH.kz

Кәсіпкерден кеңес

1. Жетістікке жеткіңіз келсе, беріліп істеу керек. 2015 жылы қандай девальвация болғанын көрдік. Ол бізге мұнайсыз өмір сүріп үйрену керек екенін көрсетті. Ертең мұнай мүлдем құлдырап немесе жойылып кетсе, экономиканы бизнес қана құтақарады. Мемлекет те орта және шағын бизнесті дамытуды қолға алды. Жастарға көп жағдай жасап отыр. Алайда, жастар оны пайдаланбайды. Олар университетті бітіре салып, еңбекақысы 150-200 мың теңге болатын жұмыс іздейді. Мен алғашқы жұмысыма кірерде: «Маған ақша керек жоқ, тәжірибе керек. Сол үшін алыңызшы»,-дедім. Бірақ бастығым: «60 мыңнан бастайсың, ары қарай тәжірибеңе қарай өсе бересің»,- деді. 2 жылдан кейін 200 мыңнан асатын еңбекақы алдым.

2. Жетістікке талпыну керек. Жастарға не болғанын білмеймін, жетістік жасауға деген талпыныс, романика жоқ (күліп). «Осы өмірде біраз жетістікке жетуім керек» деген біраз авантюризм мен романтика керек. Әйтпесе, жұмыс-отбасының арасында жүріп, жылына бір демалыс, аптасына жеті күн, жылына 365 күн, солай жетпіс жыл бір жерде жұмыс істеу деген миға сыйымсыз ғой.

Қазақстанды әлемге танытқанның бірі — Геннадий Головкин. Тура солай неге талпынбаймыз? Бизнес бір жолы ғана. Спортта да, өнерде де танымал болуға болады.

3. Серіктестермен жұмыс бастағанда барлығын алдын-ала келісіп, басын ашып алу керек. Барлығы қағазға түсетін болсын. Ауызбен айтылғанның күші жоқ. Қай компаниямен, қай серіктеспен жұмыс істесеңіз де, әрдайым келісім-шартқа қол қойыңыз. Кезінде бұл кеңесті маған айтқандар болған, мен оған құлақ аспадым. Осыным дұрыс болмаған.

4. Командасыз ештеңе өнбейді. «Жалғыздың үні шықпайды».

5. Жас кәсіпкерлерге жұмысқа тәжірибесіз адам алмау керек. Сіз өзіңіз бизнесті енді бастап жатырсыз, қалай тәжірибесіз жанды аласыз? Ол сіздің бизнесіңізді одан сайын құлдыратады. Сондықтан, өз ісін білетін кәсіби мамандармен жұмыс істеңіз.

Сұхбаттасқан Әсел Сарқыт, суреттер Дарын Шөкенов

 

2
1
2246

Жасыл желек – қала көркі

А.ж. 13 қазанда  «Ақмола облысы жастар саясаты мәселелері басқармасы» ММ негізінде «Бейбітшілік пен келісім үшін!» облыстық жастар акция-эстафетасы аяқталды.

Акция-эстафетаның негізгі мақсаты –  жастардың бойына ұқыптылық, табиғатқа деген сүйіспеншілік сезімдерін дарыту, еңбексүйгіштікке, отансүйгіштікке тәрбиелеу, халықтың экологиялық мәдениетін қалыптастыру.

Іс-шараға Ақмола облысы бойынша мемлекеттік қызмет істері департаментінің басшысы Қ. Жапақов, «Жастар мен студенттердің еңбек жасақтарының облыстық штабы»  ҚБ төрағасы В. Одинцов, «Жас Отан» ЖҚ төрайымы Ж. Жүнісова, сонымен қатар,  «Жасыл ел» экологиялық жасақтарының сарбаздары, студенттер мен жастар қоғамдық бірлестіктерінің өкілдері қатысты.

Акция-эстафета барысында Қазақстан Республикасы Тәуелсіздігінің 25 жылдығы аясында  25 жас қарағай отырғызылды.

Іс-шараға 60 адам қатысты.

Департамент госслужбы

0
0
533

Сыбайлас жемқорлыққа қарсы іс-қимыл – қоғамның мақсаты

А.ж.  13 қазанда «Ақмола облысының еңбек инспекциясы жөніндегі басқармасы» мемлекеттік мекемесінің ұжымында «Қазақстан Республикасының 2015-2025 жылдарға арналған сыбайлас жемқорлыққа қарсы стратегиясында белгіленген сыбайлас жемқорлыққа қарсы іс-қимылдың негізгі бағыттары, әдістері және шаралары» тақырыбында семинар өтті. Семинарға Ақмола облысы бойынша мемлекеттік қызмет істері департаментінің (бұдан әрі - Департамент) қызметкері А.Жаналинов қатысты.

Семинар барысында Департаменттің өкілі мемлекеттік мекеменің қызметкерлеріне сыбайлас жемқорлыққа қарсы стратегия туралы, оның алдағы он жылға есептелген басымды бағыттары мен негізгі тәсілдері жөнінде баяндады, сонымен қатар, ол қатысушыларды Департаменттің сыбайлас жемқорлықтың алдын алу бойынша атқарып отырған жұмысымен, соның ішінде сыбайлас жемқорлыққа қарсы мониторинг, сыбайлас жемқорлық тәуекелдерінің ішкі және сыртқы талдауларын жүргізу тәртібімен таныстырды.

Кездесу соңында А.Жаналинов сыбайлас жемқорлыққа қарсы заңды қолдануға қатысты қойылған сұрақтарға жан-жақты жауап берді.

Іс шараға 30 шақты адам қатысты.
Департамент госслужбы

0
0
391