Мазмұнға өту

Жаңа

«Тарих толқынында»

«Жортуылда жолындағының бәрін жайпайтын, дала дауылындай екпінді де тегеурінді Кенесары хан ешбір бөгет алдында кідірмейтін, қайта кездескен кедергі оның қайрат-жігерін жанып, өршелендіріп жіберетін». Әскери қолбасшы, қазақ халқының 1837-1847 жылғы ұлт-азаттық қозғалысының көсемі Кенесары хан туралы орыс тарихшысы Н.Н.Середа өз зерттеулерінде осылай деп жазды.

Кенесарының тұлғалық бейнесі туралы «Тарих толқынында» бағдарламасын 19.00-де Ұлттық арнадан тамашалаңыздар.

0
0
252

Гүлнұр Ерболова Универсиадада қола жүлдені жеңіп алды

Қазақстандық спортшы Гүлнұр Ерболова (52 кг) Қазан қаласында өтіп жатқан Универсиададағы белбеумен күресте қола медальді жеңіп алды, деп хабарлайды Bnews.kz.

Үшінші орынға тартыста қазақстандық спортшы Украина өкілі Людмила Матюшенконы шаң қаптырып кетті – 9:2.

Еске сала кетсек, кеше дәл осы жарыста Димаш Молдашев (75 кг) Қазақстан қоржынына күміс жүлдені салса, Аян Ермекбаев (82 кг) қола медальді иеленді

 
0
0
424

7 алтын! Қазақтар Азияны бағындырды!


Бүгін Иордания астанасы Амманда бокстан ересектер арасындағы Азия чемпионаты аяқталды.  Құрлық мықтыларының басын қосқан бәсекеде Қазақстан құрамасы 6 алтын алып, Азиядағы алып бокс державасы екенін дәлелдеуде. Одан бөлек, бір күміс жүлде бар. Сегізінші жүлденің тағдыры енді шешіледі.

Алдымен ең жеңіл салмақтағы үмітіміз Теміртас Жүсіпов үндістандықДевендро Лайшрамды жеңді. Төрешілердің екеуі Теміртасты жеңімпаз деп тапса, біреуі өз даусын үндіске беріпті. Алғашқы алтын!

60 келідегі Берік Әбдірахмановтың да тынысы енді ашылғандай. 2012 жылы өткен Қазақстан чемпионатына дейін отандық бокс жанкүйерлеріне белгісіз болып келген Берік Азия чемпионатының финалында тайландтық Арди Сайломды 2:1 есебімен тізе бүктірді. Екінші алтын!

64 келідегі Мерей Ақшалов та жерлестерінің жеңісті жолын жалғастырды. Ақтық айқаста Моңғолия құрамасының мықты боксшыларының бірі  — Уранчимег Мунгх-Эрденді 3:0 есебімен бет қаратпай жеңді. Үшінші алтын!

69 келідегі команда капитаны Данияр Елеусінов бабына енді енгендей. Лондон сәтсіздігінен соң жарқын жеңісімен қуанта алмаған Елеусінов Аммандағы финалда үндістандық Мандип Жанраны 3:0 есебімен ұтты. Төртінші алтын!

75 келідегі Жәнібек Әлімханұлы финалда тәжік боксшысы Навроз Жафоевқа айла қалдырмай, Азия чемпионы атанды. Бесінші алтын!

Өкінішке қарай, 81 келідегі Әділбек Ниязымбетовке алтын бұйырмады. Лондон Олимпиадасының күміс жүлдегері финалда өзбек боксшысы Ойбек Мамазулуновтан жеңіліп қалды.

91 келідегі Антон Пинчук пен шаршы алаң қожайыны Ихаба Алматбули арасындағы айқас та біздің жерлесіміздің жеңісімен аяқталған. Алайда, осы жекпе-жектен соң жергілікті жанкүйерлер шу шығарып, төрешілер залдан шығып кетті деген хабар таратты Вконтакте желісіндегі «Қазақстан боксы» парақшасы.

Осыған байланысты, аса ауыр салмақтағы Иван Дычко мен өзбек Изатулла Иргашев арасындағы жекпе-жек уақытша тоқтатылған. Алайда, қайта жалғасқан бәсекеде Иван Дычко жетінші алтынды қоржынға салды!

Жоғарыдағы мәліметтер Вконтакте желісіндегі «Қазақстан боксы» парақшасынан алынды.

 
0
0
572

Федерер соңғы 10 жылда бірінші рет ATP рейтингісінде 5-орынға төмендеді

Швейцариялық Роджер Федерер Уимлдонда сәтсіз өнер көрсетуіне байланысты әлемдік ATP рейтингісінде екі саты төмендеді.

Уимблдон жарысының өткен жылғы жеңімпазы Федерер осы жылы жарыстың екінші айналымында украиндық Сергей Стаховскийге жеңіліп, жарыс жолын аяқтауға мәжбүр қалған болатын. Нәтижесінде швейцариялық теннисші алдына испандық Давид Феррер мен Рафаэль Надальді жіберіп, рейтингте 3-тен 5-орынға төмендеді. Соңғы рет Федерер осындай көрсеткішке 2003 жылы ие болған еді.

Сонымен қатар, Уимлдонның жартылай финалисті аргентиналық Хуан Мартин дель Потро француз теннисшісі Жо-Вильфрид Цонгті рейтингтің 7-нен 8-орынға жылжытты.

АТР рейтингісі. 8 шілде күні шыққан нұсқа:

1 (1). Новак Джокович (Сербия) — 12310 ұпай,

2 (2). Энди Маррей (Ұлыбритания) — 9360,

3 (4). Давид Феррер (Испания) — 7220,

4 (5). Рафаэль Надаль (Испания) — 6860,

5 (3). Роджер Федерер (Швейцария) — 5785,

6 (6). Томаш Бердых (Чехия) — 4865,

7 (8). Хуан Мартин дель Потро (Аргентина) — 4500,

8 (7). Жо-Вильфрид Цонга (Франция) — 3480,

9 (9). Ришар Гаске (Франция) — 3045,

10 (10). Станислас Вавринка (Швейцария) — 2915…

Дайындаған: Ерғали Елдос

Сурет: rambler.ru

 
0
0
255

«Арсенал» Суареске 30 миллион фунт ұсынды

«Арсенал» клубы «Ливерпуль» шабуылшысы Луис Суареске 30 миллион фунт ұсынды, бірақ ұсыныс қабылданбады, дейді Daily Telegraph.

Басылымның хабарлауынша, екі клуб арасындағы байланыс өткен аптада болған.

Ақпарат көзіне сенер болсақ, «Ливерпуль» 26 жастағы уругвайлық ойыншыны өз командасы сапында ұстап қалуға ниетті және тек 40 миллион фунт шамасындағы қаражатқа қана клубты Суаресті сатуға ойландыруы мүмкін.

Айта кетсек, Луис қазір Конфедерация Кубогінен соң демалуда және «Ливерпуль» сапына ай соңында қосылады. Бұдан бұрын Суарес Англиядан кету жайлы ниет білдірген болатын.

Дайындаған: Ерғали Елдос

Сурет: sport-xl.net

 
0
0
372

Былтыр спорттық шараларға 3 млн 200 мың адам қатысты

Былтыр спорттық шараларға 3 млн 200 мың адам қатысты

2012 жылы спорттық шараларға 3 млн 200 мың адам қатысты. Бұл туралы бүгін Үкімет отырысы барысында ҚР Дене шынықтыру және спорт агенттігінің төрағасы Ерлан Қожағапанов мәлім етті, деп хабарлайды BNews.kz тілшісі.

«Бұқаралық спортты дамыту мәселесіне келетін болсақ, жыл сайын өткізілетін бұқаралық спорттық шаралардың саны артып келе жатқанын атап өткен жөн. Өңірлерде халықтың бос уақытын спортпен шұғылдануға арнауға қажетті шарттарды жасауға назар көбірек бөлініп отыр. 2011 жылы 7 мыңға жуық бұқаралық спорттық шара өткізелген болса, 2012 жылы болған бұқаралық спорттық шаралар саны – 18 мың. Ал ол шараларға 3 млн 200 мың адам қатысты. Дене шынықтыру және спортпен айналысатын халық көрсеткіші — 21,6%», — деді Қожағапанов.

Диана ҚҰЛМАҒАНБЕТОВА

0
0
440

«Назарбаев. Live» — фильм өз PR-үмітін ақтай алмады.

Республикалық телеарналардан жарнамалаған фильмнен күткенім көп еді. Оның үстіне Елордамыздың 15-жылдық мерейтойы. Фильм Елбасының жаңа қырларын ашып, еліміз үшін жасалған реформалар мен оның бүгінгі күнмен қалай астасып келе жатқандығы, Бірінші Президенттің сіңірген еңбегін қалың қауымға жаңа деммен, жаңаша формамен жеткізуі тиіс еді.

Менің ойымша, Тәуелсіздігіміздің бет-бейнесін айшықтау үшін фильм мемлекеттік тілде түсірілуі қажет. Одан әрі оны аудара ма, әлде қосымша орыс тіліндегі нұсқасын түсіре ме, ол қосалқы мәселе.

Фильмде қазақтың жаны, рухы жоқ. Астананың болашағына көпшілік пессимистік көзқарас танытқанда, ел ертеңіне сенген Президент қала архитекторларынан бастап, үкімет мүшелеріне рух берген, керемет қырағылық танытып, стратегиялық батыл қадам жасаған фактілер осы фильмде айтылмағанда, қай жерде айтылады?

Негізгі салмақ мағынаға түсуі керек, өзі фильм не үшін түсірілген? Асхана, домна пешінің жанында 10 минут тұруға шыдай алмайтын Красиенко мен кино әлемінде жеңіл рөлдермен және сәнді көйлектерімен қызыл кілемде көрініп қалып жүрген Сағатованың қосымша PR-ын жасауға ма деп қаласыз...

Қалың көпшілікке пафоспен ұсынылған дүниені фильм деуге келе ме өзі?! Өз ойым, материал хронологиялық мәліметтерді судыртып оқыған журналистің күнделікті асығыс репортажын еске салады. Бәлкім жүргізуші КТК арнасы үшін кезекті сводкасын дайындап турмын деген ойдан арыла алмай қалғаны шығар. Онда, түсіністікпен қарауға болады.

Фильмде тың дүние айтылмады. Өйткені құрастырылған сұрақтар әлсіз. Сәйкесінше Президент те ашылып ештеңе айта алмады. Бүгінгі толқынға, әсіресе, айтары көп еді ғой.

Сценарий желісі қажеті жоқ асханаларға кіріп кетіп жатты. Әрине, бүгінгі көрерменнің сұранысына қарай икемделіп, Президенттің трапезасын көрсеткілері келді ғой. Қияр, ет, балық. Денсаулығын ойлайтын әр қарапайым адамның асы. Бірақ бұл сюжет те ойластырылмаған. Композициялық бірізділік жоқ. Асханадан кейін Теміртау зауытында жүрген журналист "қызық" көрінеді. 3D форматтағы бейнелер шынайылыққа қарсы шықты. Елбасының өмірбаяны сол қалпында қайталанған. Ескі фильмдерді монтаждап, сәл әшекейлеп бере салғандай. Әйтсе де, көрерменнің сұранысы жетегінде кетудің қажеті жоқ еді...

Жүргізушілер туралы әңгіме бөлек. Біріншіден, олар сәтсіз таңдалған. Сағатова фильмге кассаға сома түсу үшін шақырылды деп айтуға келмейді. Өйткені ол көркем фильм емес. Саясатқа еш қатысы жоқ екенін өзі де айтты, сәйкесінше, жазып берген сұрақтарды мүдіртпей оқып беріп отырған жансыз қуыршақты елестетті.

Фильмнің басында Әселді Ярослав ұшақтан Опра Уинфриді күткендей қарсы алатыны, бұл президент туралы фильмнің көрермені үшін қандай мағыналық/эстетикалық мәлімет беретінін ақыры түсінбедім. Бәлкім, фильм соңында Әселді ұшағына қайта отырғызып жіберсе, фильмнің салмағын еш арттырмаса да, бәлкім логикалық аяғын үйлестіріп берер ме еді...

Қазақ журналистикасында мықты майталмандар бар ғой. Ақылына көркі сай қыздарымыз да баршылық. Жаттанды сұрақтар кімге қызық?! Елбасының айтылмай жүрген ойларына қозғау салатын терең әңгіме өрбіте алмадық.

Бәлкім, дәрежесі артар деген сандырақ ой болған шығар. Бірақ елбасының қатысуымен болатын фильмге еш көркемдік боямалар керек емес.

Әрине, жақсы фильмді күтіп отырған біздің көңіліміз су сепкендей басылып қалды. Нардай тұлға туралы айтарымыз жоқтай. Елбасының аурасынан алатын ерік-жігер көре алмадым. Фильм көрерменге ой салу, мақтаныш сезімін тудыру мақсатын алға қоймаған екен әу бастан-ақ. Қайтеміз, ресей журналисінің түсірген "Линия Президента" фильмі мың есе артық. Халыққа жақын. Керемет әсер қалдырып еді. Әлі есімде. Эксклюзив деп айдар тағуға тұратындай. Ал қазақтар түсірген фильмді "Made in Kz" деп айтуға ұят.

Екі фильмнің бюджетін салыстыру керек дейтін шығар, кейбір Сатаев фильмінің жақтаушылары, бірақ идеясы мықты дүние қашан да өз-өзін ақтап шығады...

 
5
0
763