Мазмұнға өту

Жаңа

И.Тасмағамбетов: ЭКСПО-2017 көрмесін ұйымдастыру мен өткізу тәуелсіз Қазақстанның барлық жетістіктерін паш етуі тиіс айтты

ҚР Премьер-Министрінің орынбасары Иманғали Тасмағамбетов ЭКСПО-2017 көрмесіне дайындық және оны өткізу мәселелері бойынша кеңес өткізді.

Кеңес жұмысына Астана қаласының әкімі Әсет Исекешев, ҚР мәдениет және спорт министрі Арыстанбек Мухамедиұлы және «Астана ЭКСПО-2017» ҰК» АҚ басқарма төрағасының бірінші орынбасары Марат Омаров қатысты, деп хабарлады pm.kz.

Астанада өтетін көрменің маңыздылығын айта келе, И. Тасмағамбетов ЭКСПО-2017 көрмесін ұйымдастыру және өткізу тәуелсіз Қазақстанның барлық жетістіктерін және елорданың келбетін паш етуі тиіс екендігін баса айтты. Осыған орай, шараны өткізуге және қонақтарды қабылдауға елорда инфрақұрылымының дайындығын қамтамасыз ету, сондай-ақ, көрме қонақтары және қатысушыларының қауіпсіздігі, олардың қызықты әрі барынша жайлы орналасуы үшін бүкіл шаралар қабылдануы қажет.

«Мемлекет басшысының тапсырмасын сапалы орындау мақсатында Мәдениет және спорт министрлігіне Астана қаласының әкімдігімен және «Астана ЭКСПО-2017» ҰК» АҚ бірлесіп көрме өтетін кезеңдегі мәдени бағдарламаны ұйымдастыру мәселелері жөніндегі үйлесімді жұмысты күшейту қажет. Сонымен қатар, делегаттар мен қонақтардың келуі бойынша ұйымдастырушылық сұрақтардың орындалуын қамтамасыз ету маңызды», - деп ерекше атап өтті И. Тасмағамбетов.

Еске сала кетейік, бүгінгі таңда ҚР Мәдениет және спорт министрлігі Астана қаласының әкімдігімен, «Астана ЭКСПО-2017» ҰК» АҚ бірлесіп арнайы кешенді бағдарлама әзірледі. Ол әртүрлі жанрлық бағыттағы мәдени іс-шаралар өткізуді қарастырады. Атап айтқанда, қазақтың дәстүрлі өнерін көрсету, театрлық-бұқаралық шаралар, халықаралық жобалар, көрмелер, спорттық және ағартушылық-тақырыптық шаралар.

Вице-премьер атап көрсеткендей, қалалық құрылымдар алдында жоғары деңгейде қызмет көрсету мәселесі тұр. Ұйымдастыру жұмысы аясында ЭКСПО көрмесі нысандарының, жалпы Астана қаласындағы көліктік инфрақұрылымның қалыпты қызметі мәселесі байыппен шешуді қажет етеді. Көлік-логистикалық жүйені жетілдіру, қоғамдық көліктің бағдарлық желісін оңтайландыру, көлік ағымын басқарудың жаңа жүйесін енгізу жұмысына ерекше көңіл бөлінуі қажет.

Бұл орайда, кеңес барысында вице-премьер бірқатар тапсырмалар берді. Астана қаласының әкіміне жұмыс штабымен бірлесіп елорданың инженерлік-көліктік инфрақұрылымын егжей-тегжейлі зерделеу тапсырылды. Дәлірек айтқанда, жолдағы жүктемені азайту мақсатында көлік ағымын модельдеу бойынша қолайлы нұсқаларды есептеу, қонақтардың келу және олардың қауіпсіз орналасуы бойынша ұйымдастырушылық сұрақтарды пысықтау, сондай-ақ, мәдени-бұқаралық іс-шаралардың жоғары деңгейде өтуін қамтамасыз ету.

Осындай ауқымды шараны өткізу шағын және орта бизнестің дамуына және жаңа технологияларды меңгеруге айрықша серпін беретіні анық. Көрме елорданың инфрақұрылымы мен нысандарының құрылысына жеке инвестиция тартуға ықпал етеді. ЭКСПО-2017 ұзақ мерзімді әлеуметтік-экономикалық дамуға оң әсер ететін еліміздің туристік тартымдылығын көтеруге бағытталған имидждік жоба.

Ақпарат көзі: strategy2050.kz

0
0
566

Н. Жолдасбеков: Сотқа өмірлік тәжірибесі бар дайын адамдар келуі тиіс

«100 нақты қадам» ұлт жоспарын іске асыру шеңберінде, № 17 қадамға сәйкес судья болуға үміткерлерге қойылатын біліктілік талаптары бір жылдық тағылымдама мен сынақ мерзімінен өту арқылы қатаңдатылады, деді ҚР Жоғарғы Сотының судьясы Нұржан Жолдасбеков Strategy2050.kz АА берген сұхбаты барысында.

«Ұлт жоспары қадамдарының бірі № 17 қадам – судья болуға үміткерлерге қойылатын біліктілік талаптарын қатаңдату болып табылады. Осы қадамға сәйкес, міндетті норма арқылы сот органдарында міндетті еңбек өтілінің болуы енгізілген, судья болуға үміткерлер стипендия төлеумен сотта бір жылдық тағылымдамадан өтеді, тағылымдама аяқталғаннан кейін судья бір жылдық сынақ мерзімінен өтуі тиіс», - деп мәлімдеді ол.

Оның пікірі бойынша, осы қадам судьяға үміткерлерді іріктеуді жетілдіруге, судьяға қойылатын біліктілік талаптарын қатаңдатуға бағытталған.

«Сотқа практикалық тәжірибесі ғана емес, сонымен қатар өмірлік тәжірибесі де бар, жұмыс дағдыларын, соттың және сот органдарының жұмыс ерекшелігін білетін дайын адамдар келуі тиіс», - деп атап өтті ол.

Судья атап өткендей, келесі қадам барлық сот процестерінің аудио және бейне жазбаларын міндетті тәртіпте енгізу болып табылады.

«Осы қадамға сәйкес, республикамыздың барлық соттарында сот істерін қараудың аудио және бейне жазба жүйесін 100% пайалану қамтамасыз етілуде, осы ретте судья жазбаны тоқтату немесе материалдарды редакциялау мүмкіндігі болмайды. Сондай-ақ, осы қадам әділ сот жүйесін жетілдіруге де бағытталған және менің ойымша, бұл дұрыс шешім, себебі бұл судьяларды ғана емес, сонымен қатар, істің басқа да қатысушыларын тәртіпке салады. Одан басқа, ол судьялардың, іске қатысушылардың үстіне түсетін шағымдардың, сондай-ақ сот ісін қарау барысына түсетін ескертулер мен шағымдардың азаюына әкеледі», - деп қосты судья.

Ақпарат көзі: strategy2050.kz

0
0
539

Жамбыл облысында Еврей мәдениетінің күндері өтті

Жамбыл облысының Байзақ ауданында «Үлкен ел – Үлкен отбасы» жалпыұлттық жобасының шеңберінде еврей мәдениетінің күндері болып өтті.

Оны аудандық ішкі саясат бөлімі мен «Қоғамдық келісім» мекемесінің қолдауымен «Шиват Цион» еврей мәдени орталығы ұйымдастырды. ушылар ымен Оқушыларды еврей халқының мәдениеті мен Қазақстанның өркендеуіне қосқан үлесмен таныстырды.

Байзақ ауданының жас жеткіншектері алдында «Шиват Цион» Жамбыл облыстық еврей мәдени орталығының төрайымы Людмила Корнилина, «Қоғамдық келісім» КММ басшысы Рано Убайдуллаева мен аудандық әкімдіктің ішкі саясат бөлімінің басшысы Махан Махамбетов сөз сөйлеп, берекелі елімізде бейбітшілік пен келісімді сақтап қалу үшін  Елбасымыз Нұрсұлтан Назарбаевтың үлесі зор екенін атап өтті. Бүгінде облысымызда 100-ге жуық өзге ұлт өкілдері тұрып жатса, 74 этномәдени орталықтар жұмыс істеуде, олардың ішінде еврей этномәдени орталығы ең алдыңғылардың бірі болып құрылған деп айтуға болады.

Ақсақалдар кеңесінің төрағасы Михаил Бунин қазіргі заманғы Қазақстанымыздың аумағына еврей халқының қашан және қалай келгені туралы баяндап берді. Олар орта ғасырда Ұлы Жібек жолымен саудагерлер қатарында жүріп өткен. Кейінірек 1825 жылы Семей округінде 12 адамнан тұратын «иудей діни сеніміндегі» қауым тұрақтайды. Ұлы Отан соғысының алғашқы жылдарында КСРО-ның европалық бөлігінен Қазақстанға 100 мыңнан астам еврейлер күштеп қоныс аударылды.

Олардың көбі әр жылдары біздің еліміздің мәдениеті мен экономикасына орасан зор үлес қосты. Мысалы, Борис Гиммельфарб деген ғалым Қаратау таулы қыраттарында фосфориттік кендерді тапқан гелогиялық зерттеулердің тобын басқарды, музыкатанушы және композитор, өнертану ғылымының докторы Борис Ерзакович қазақ музыка фольклорын зерттеп жинақтаған, халық ақындары жайлы кітаптар   шығарған, қазақ музыкасының белгілі өкілі, композитор Евгений Брусиловский қазақ операсының, симфониясының, кантата, сюита, өлеңдер мен романстарының авторы ретінде танылған.

Осындай елге танымал, белгілі кісілердің қатарында біздің жерлестеріміз, көп жылдар бойы Жамбыл ГРЭС-ін басқарған Михаил Кукуйді, Социалистік Еңбек Ері, Қазақ ССР-нің ең алдыңғы қатарлы «Трудовой пахарь» (қазіргі Түймекент ауылы) колхозының төрағасы болған Александр Нахмановичті байзақтықтар жақсы біледі және әрдайым естерінде сақтайды. Тәуелсіз Қазақстанымыздың өркендеуіне бүгінгі күні жастарымыз да атсалысып келеді. «Машхана» жастар қанатының мүшелері еврей этномәдени бірлестігі мен өңірлік ассамблеяның барлық іс-шараларына белсенді түрде араласады. Бүгінгі іс-шарада олар Тараз қалалық №2 және №16 орта мектептерінің оқушыларымен бірлесіп ауыл тұрғындарына үлкен концерттік бағдарлама дайындап келді. «Хава нагила», «Атамекен», Құрманғазы күйі, хорезм биі және басқалары көрермендердің көзайымына айналып, кошеметіне бөленді.

Кездесу соңында қоғамдық бірлестіктің белді мүшелері мен оқушыларға «Қоғамдық келісім» КММ мен «Шиват Цион» еврей этномәдени орталығының атынан мақтау қағаздары табыс етілді.

Ақпарат көзі: strategy2050.kz

0
0
739

Тағы да мемлекеттік көрсетілетін қызметтерді тұтынушылардың құқықтары жайында

А.ж. 18 қазанда Ақмола облысы бойынша мемлекеттік қызмет істері департаменті Қоғамда сыбайлас жемқорлыққа қарсы мәдениетті қалыптастыруға бағытталған қызметті ұйымдастыру жөніндегі 2016 жылға арналған кешенді жоспардың шеңберінде «Қазақстан» РТРК» АҚ Ақмола филиалының арнасында,  «Актуальная тема» телехабарында  білім және әділет салаларында көрсетілетін мемлекеттік қызметтердің сапасын жақсарту мәселелері жөнінде «Мемлекеттік көрсетілетін қызметтерді тұтынушылардың құқықтары туралы» тақырыбындағы тікелей эфир ұйымдастырды.

Хабарға Ақмола облысы білім басқармасы басшысының орынбасары В. Гамазов пен Ақмола облысы әділет департаменті басшысының орынбасары Г. Акимова қатысты. Сұхбат барысында облыс тұрғындарын көрсетілетін қызметтер сапасының негізгі көрсеткіштері туралы хабардар ету, мемлекеттік көрсетілетін қызметтер саласындағы мемлекеттік көрсетілетін қызметтерді пайдаланушылардың құқықтары туралы және оның сыбайлас жемқорлық көріністеріне ықпал ету шараларына байланысы тұрғысынан  сыбайлас жемқорлыққа қарсы шаралар туралы азаматтардың хабардар болуын арттыру мәселелері  талқыланды.
Департамент госслужбы

0
0
239

Пробация қызметі – түрмеде жаза өтеудің баламасы

Қазақстан дамыған 30 елдің қатарына кіруге ниетті екені белгілі. Осыған байланысты, елімізде экономика мен саясаттың әр түрлі секторларында үлкен жұмыс жүргізілуде. Заң үстемдігін қамтамасыз ету – екінші институционалдық реформа пробация институтын әзірлеу мен енгізуді болжайды.

Мысалы, Еуропада пробация институты 100 жылға жуық жұмыс істейді. Түрмеде жаза өтеудің тиімсіздігі туралы мәселе 19-шы ғасырда көтерілген болатын. Халықаралық қоғамдар, заңгерлер, практиктер бас бостандығынан айыру орындарын толтырып қана қоймай, сонымен қатар қылмыстың қайталануымен тиімді күресуге де мүмкіндік беретін жолдарды іздей бастады. Сарапшылардың деректері бойынша, ҚР-да қылмыстардың қайталану пайызы айтарлықтай жоғары. Қазақстанда пробация институты қазір қалай қалыптасып жатқаны туралы ҚР Ішкі істер министрлігінің Қылмыстық-атқару жүйесі комитеті төрағасының орынбасары Мейрам Аюбаев Strategy2050.kz берген сұхбатында айтып берді.

«Пробация туралы заң жобасын әзірлеу бас бостандығынан айыру орындарынан босатылған және пробация қызметінде есепте тұрған азаматтарды әлеуметтік оңалтудың тиімді жүйесін құру – Ұлт жоспарының 33-қадамына сәйкес жүргізіліп жатыр. Әлеуметтік оңалтудың кешенді стратегиясын және арнаулы әлеуметтік көрсетілетін қызметтер стандартын әзірлеу  шеңберінде сарапшылармен, үкіметтік емес ұйымдармен және мүдделі мемлекеттік органдармен үш дөңгелек үстел өткізуді қоса алғанда, үлкен жұмыс жүргізілуде. Осы айда біз заң жобасын одан әрі талқылау үшін Үкімет қарауына енгізуді жоспарлап отырмыз», - деді М. Аюбаев.

Ол 2015 жылғы 1 қаңтардан бастап жаңа Қылмыстық-атқару кодексіне сәйкес, Қазақстанда пробация қызметі құрылғанын еске салды.

«Қазақстанда пробацияның екі моделі жұмыс істейді: шартты-үкімдік пробация және постпенитенциарлық пробация. Бір жыл ішінде атқарылған жұмыстардың өзі ғана нәтиже көрсетуде, жасалған қылмыс саны 33%-ға азайған. Жаңа заңда әлемдік практикада орын алатын пробацияның төрт түрі болады: сотқа дейінгі, шартты-үкімдік, пенитенциарлық және постпенитенциарлық. Сотқа дейінгі пробация күдікті адамнан жасаған қылмыстың себептерін анықтайды. Мысалы, егер бұзушылық жасаған адам алкогольдік және есірткілік тәуелділіктен зардап шексе, онымен тиісті жұмыс жүргізілетін болады. Сот ұсынымдарды ескере отырып, нақты жаза мерзімін немесе бас бостандығынан айырумен байланысты емес жаза беру туралы шешім қабылдайды. Бұл практика әсіресе Нидерланды мен Ұлыбританияда жақсы дамыған», - деп ақпараттандырды М. Аюбаев.

Пробацияның екінші жаңа моделі – пенитенциарлық.

Сарапшының айтуы бойынша, бізде пенитенциарлық пробация элементтері бар. Осы жүйе Біріккен Ұлттар Ұйымының жазасын өтеуші адамдармен жұмыс істеуге қатысты ең төмен стандартты қағидаларына немесе «Н. Мандела қағидаларына» негізделген.

«Қағидаларға сәйкес, жазасын өтеушілерді қайта әлеуметтендірумен айналысу қажет. Бірінші күннен бастап сотталғандарға қатысты арнайы әдістеме қолданылады, ол білім алуды, жұмыс кәсіптеріне оқытуды, азаматтық қоғамға шығуды қамтиды. Сотқа дейінгі пробация – бұл біз үшін мүлде жаңа пробация. ТМД елдерінде ол әлі енгізілмеген»,  -  деп атап өтті М. Аюбаев.

Қылмыстық-атқару жүйесі комитеті төрағасының пікірі бойынша, пробация қызметі көмек көрсетеді. Сотталғандарға анағұрлым толық психологиялық-түзету бағасы беріледі және судья көбірек ақпарат алып, кейіннен тиісті жаза бере алады.

Бұрын «Пробация туралы» дербес заңы 2019 жылы қабылданады деп хабарланған болатын.

Ақпарат көзі: strategy2050.kz

0
0
1196

ҚазАгро жыл басынан бері 8 ,3 млрд теңгенің 10 ауыл шаруашылығы кооперативін қаржыландырды

ҚазАгро жыл басынан бері 8 ,3 млрд теңгенің 10 ауыл шаруашылығы кооперативін қаржыландырды.Бұл туралы бүгінгі брифинг барысында «ҚазАгро» ұлттық басқарушы холдингі» АҚ Басқарма төрағасының орынбасары Айгүл Мұхамадиева айтты.

Ұлт Жоспары – 100 нақты қадам бес институционалдық реформасын жүзеге асыру аясында Холдинг екі қадамды іске асыруға ат салысады: 60 Қадам – сүт және сүт өнімдері өндірісін дамыту үшін стратегиялық инвесторларды тарту және 61 Қадам – етті қайтадан өңдеу мен оның өндірісін дамыту үшін  стратегиялық инвесторларды тарту.

Етті пен сүтті қайта өңдейтін және өндіретін жобаларды қаржыландыру көзі, Үкіметтің шешіміне сәйкес, Біріңғай зейнетақы жинақтаушы қорынан Холдингке бөлінетін қаржы есебінен іске асады.    Біріңғай зейнетақы жинақтаушы қорынан қаржы бөлу механизімі: Холдингтің құнды қағаздарын  10 жылға шығару және орналастыру үшін жылдық 14 процент мөлшерлеме бойынша,  15 жылға – жылдық 15 процентпен берілетін болады.

Бұдан өзге, атап өтетін жайт аталған қаржылардың құны қарыз алатын ауыл шаруашылық тауар өндірушілері үшін жылдық 19 проценттен төмен бомайды, бұл қаржының орналастырылмауына және қайтарылмауына әкеп соқтырады.

«Кредиттік ресурстардың құнын төмендету мақсатында, Холдинг тарапынан, бюджеттен тыс қаржы көзінен тартылатын қымбат қаржыларды, Республикалық бюджет қаржысы есебінен бөлінетін қаржылармен реттеудің механизмі пысықталып және бекітілді. Осылайша, соңғы қарыз алушы үшін белгіленген мөлшерлеме жылдық 11,5 проценттен аспайтын болады», -деді Айгүл Мұхамадиева.

Холдинг компаниялар тобындағы тағы бір маңызды бағыт – ауылдық кооперативтерді дамытуды қолдау.

2006 жылдан бері Аграрлық несие корпорациясы ауылдық тұтыну кооперативтері мен ауыл тұрғындары үшін бірлескен өндірісті дамыту, дайындау мен тұтыну, сақтау, ауыл шаруашылық өнімдерін тасымалдау, тауарлы материалды құндылықтарды жабдықтау бағдарламасын жүзеге асырумен айналысады. Бұл бағдарлама бойынша 147 кооператив, жалпы сомасы 12,3 миллиард теңгеге қаржыландырылды.

2015 жылы Холдинг тарапынан астық өндіру саласындағы  ұсақ және шағын  ауыл шаруашылығы тауар өндірушілерін біріктіру үшін және оларды екінші деңгейлі банктер арқылы қыржыландыру бағытында жаңа қадам жасалды. Бұл жерде «Азық түлік келісім-шарт копорациясы» Ұлттық компаниясы» АҚ,  кооперативтерден кепілдендірілген астық сатып алу механизі арқылы шаруалардың қаржыны қайтаруына кепіл бола алады.

Биылғы жылы Ақмола, Солтүстік Қазақстан, Қарағанды және Павлодар облыстарындағы 10 осындай бірлестік қаржыландырылды. Ол жердегі 212 қатысушының егіс алқабы 726 мың гектардан аса жерді құрады. Берілген қаржы сомасы – 8,3 миллиард теңге. Кооперациялардан алынған бұндай жайлы тәжірбиені Холдинг болашақта ауыл шаруашылығының басқа да салаларында жүзеге асыруды жоспарлап отыр.

Ауыл тұрғындарын жұмыспен қамту және Агроөнеркәсіп кешеніндегі өнімдердің өндіріс көлемін жеке аула шаруашылықтарының  мүмкіндігін пайдалану есебінен арттыру мақсатында Холдингтің еншілес компаниясы  «Ауыл шаруашылығын қаржылай қолдау қоры» акциоенрлік қоғамы 2016-шы жылғы  8-ші  тамыздан бастап,  «Жұмыспен қамту 2020 жол картасы» және «Бизнестің жол картасы -2020» бағдарламаларының қаржысын пайдалана отырып, шағын несие берудегі жаңа өнімдерді жүзеге асыруға іске кірісті.

Бүгінгі күні «Ауыл шаруашылығын қаржылай қолдау қоры» ауылдық жерлердегі 90 проценттен аса шағын несие беру нарығын қаржыландырып отыр.

Ақпарат көзі: strategy2050.kz

0
0
520

Б.Майлыбаев: Қазақстан 25 жылда жаңа ұлттық экономиканы құрды

Қазақстан Президенттің төрағалығымен жаңа ұлттық экономиканы құрды, деді ҚР Президенті Әкімшілігінің жетекшісі Бағлан Майлыбаев.

«Ширек ғасырда Елбасы Нұрсұлтан Назарбаевтың төрағалығымен Қазақстан жетістікке жетер жолда ауыр жол кешіп өтті. Қазақстан халықты  бірыңғай платформада біріктіретін  дұрыс жолды тапты. Бұл - бірлік, тұрақтылық. Президент атап өткендей, «Қазақстан-2050» Стратегиясы  жолында бұл басты бағыт. Президенттің саясаты  барлығына түсінікті әрі негізгі адамзаттық сұранысқа жауап береді: отбасындағы жайлылық, балалардың білімі мен денсаулық, баспана, қауіпсіздік пен перспектива», - деді Б.Майлыбаев  саясаттанушылар мен әлеуметтанушылардың форумында.

Ол айтып өткендей, Қазақстан Президенттің төрағалығымен жаһандық сауда-экономикалық байланыстың бөлігі ретінде жаңа ұлттық экономиканы құрды.

«Қазақстанда  үш жаһандық экономикалық дағдарысқа қарамастан экономикалық өсім екі онжылдық бойы жалғасып келеді. Біздің ел барлығын басынан бастап, осы жылдар ішінде миллиардтаған инвестицияны елге тарта білді. Бұл біздің елге деген әлемнің сенімін арттырады», - деді Б.Майлыбаев.

«Біздің ел үшін мақтануға тұрарлық факторлардың бірі - елорда, күн сайын өсіп келе жатқан жаңа қала ел өңірлері мен шет елдерден қонақтарды қабылдап отыр. Бүгінде ел ЭКСПО-2017 көрмесін өткізуге дайындалып жатыр. Оңтайлы нәтижелер әрбір облыста байқалып отыр», - деді Б.Майлыбаев.

Сондай-ақ, ол әлеуметтік саладағы түбегейлі өзгерістер туралы айтып өтті.

«Тәуелсіздіктің 25 жылында білім беру, денсаулық сақтау, әлеуметтік қамсыздандыру саласында бірқатар өзгерістер орын алды. Білім берудің сапасын арттырған қозғаушы күш «Болашақ» бағдарламасы, Назарбаев университеті мен елдегі зияткерлік мектептердің ашылуы  болды. Соңғы  15 жылда елде  мыңдаған аурухана мен  100 мектеп, 4 мың балабақша ашылды», - деді ол.

Сарапшы айтып өткендей, Елбасының «Жалпыға бірдей еңбе қоғамы» идеясы Қазақстанның әлеуметтік дамуының негізіне айналды, ол  дамыған елдердің қатарына енуге септігін тигізеді», - деді ол.

Ақпарат көзі: strategy2050.kz

0
0
397

Каирде Абай ескерткіші ашылды

Мысыр Араб Республикасының астанасында қазақтың ұлы ақыны әрі ойшылы Абай Құнанбайұлына арналған ескерткіштің салтанатты ашылу рәсімі өтті.

ҚР Сыртқы істер министрлігінің ақпараты бойынша, мүсін Каирдің ең әдемі орталық саябақтарының бірі – «Еркіндік және достық» саябағында орнатылған.

Салтанатты рәсімде Қазақстанның Мысырдағы Елшісі әрі осы идеяның бастамашысы болған Берік Арын, Каир губернаторының орынбасары Мұхаммед Айман, сондай-ақ осы жобаның демеушісі және мүсіннің авторы сөз сөйледі.

Елші өз сөзінде Абайдың қазақ және әлемдік әдебиетке қосқан үлесіне тоқтала келіп, оның 150 жылдық мерейтойына орай ЮНЕСКО халықаралық ұйымының 1995 жылды «Әлемдегі Абай жылы» деп жариялауы ақын таланты мен еңбегінің әлемдік деңгейде мойындалуының нақты айғағы екендігін атап өтті. Қазақстанның Тәуелсіздігінің 25-жылдығына орай ұлы ойшылға арналған ескерткіштің Елордамен бауырлас Каир қаласында қойылуы – екі ел халықтары арасындағы көпжылдық достықтың беріктігін дәлелдейді деді.

Өз тарапынан Каир губернаторының орынбасары Абай ескерткішінің Мысыр астанасының орталығында ашылуы – ол мегаполис үшін қазақ және мысыр халықтарының рухани-мәдени жақындығын білдіретін айтулы оқиға екенін атап өтті. Оның айтуынша, Каир губернаторлығы қазақ халқының ұлы перзентіне ескерткіш орнату жайындағы идеяны қуана қарсы алып, оны жүзеге асыруда барынша мүмкіндіктер жасады. Кейінірек сөз алғандар Абай шығармаларындағы гуманистік идеялардың өзектілігі бүгінгі күні арта түсетіндігін айтты.

Іс-шара соңында Мысырдағы қазақстандық студенттер Абай лирикалық өлеңдерін орындады. Сонымен қатар, қонақтарға араб тіліне аударылған Абайдың «Қара сөздері» мен  өлеңдер жинағы сыйға тартылды.

Аталған ескерткіштің авторы қолтумалары Каирден басқа Мәскеу, Санкт-Петербург, Қазан және Ташкент қалаларында орнатылған белгілі мысырлық скульптор Усама Әл-Серуи болғанын атап өту қажет.

1998 жылдан бері мысырлық көшелердің бірі Абай атымен аталады, ал Астананың орталық көшелерінің біріне мысырлық белгілі жазушы және әдебиеттанушы Таха Хусейннің есімі берілген. Бүгінде қазақтың ұлы ақыны әрі ағартушысы Абайдың ескерткіштері Мәскеу, Бейжің, Ташкент, Витебск, Тегеран, Ыстамбұл және Будапештте орнатылған.

Ақпарат көзі: strategy2050.kz

0
0
840

Қоғамдық қабылдаудың ІІІ тоқсандағы жұмысының қорытындылары

А.ж. 14 қазанда «Нұр Отан» партиясының Ақмола облыстық филиалында «Қоғамдық қабылдаудың ІІІ тоқсандағы жұмысының қорытындылары» тақырыбында дөңгелек үстел өтті.

Іс-шараға Ақмола облысы бойынша мемлекеттік қызмет істері департаментінің басшысы Қ. Жапақов, Ақмола облыстық мәслихатының депутаты, облыс әкімдігінің жанындағы мемлекеттік қызметшілерді қайта даярлау және біліктілігін арттыру өңірлік орталығының директоры Ә. Баймағамбетов, мемлекеттік қызметшілер, ҮЕҰ өкілдері, жастар қоғамдық бірлестіктері қатысты.

0
0
216

Қарағанды жігіттері нағыз қазақтың қандай болатындығын көрсетті

Тамыры тереңге жайылған тарихы мен әлемдегі ең бай тілі бар қазақтай қайсар елдің ұрпағымыз. Сан ғасырлар бойы жермізді сыртқы жаулардан қорғап, қазіргі таңда жер көлемі бойынша әлемде 9 орынды иеленіп отырмыз. Әлемде шамамен 3-4 мың этнос бар, ал ұлт дәрежесіне жеткен этнос саны бар болғаны – 194. Сол ұлттардың қатарында біз де бармыз. Міне, сол үшін мен қазақ болғаным үшін мақтанамын.

Алайда 18 қазан күні Қарағанды қаласында орын алған оқиғадан кейін мен өмірімде алғаш рет қазақ болғаным үшін ұялдым. Менің сүйіп тыңдайтын Ninety One тобының концертіне келген жүздеген EagelZ бен 6-7 жігіттен құралған қарсылық білдірушілер Қарағанды циркінің алдында жиналыпты. Тоқсан бірдің қырандары плакаттарын көтеріп, топты қолдайтындығын әнмен жеткізіп, бір ауыздан топ репертуарындағы әндерді орындады. Ал әлгі псевдопатриоттар оларға күле қарап, қар лақытырып, ортаңғы саусақтарын көрсетіп, өрімдей жас қыздарды балағаттап тұрды. Бәріміз Адам ата мен Хауа ананың ұрпағымыз, яғни бірімізге аға, бірімізге іні, қарындаспыз. Бір сөзбен айтқанда бәріміз туыспыз. Сонда әлгі бейнежазбадағы жігіттердің өз қарындастарына ортаңғы саусақтарын көрсетіп, қорлап тұрғанын көргенде, шыны керек кірерге тесік таппадым.

Менің түсінгенім, келер ұрпақ осындай жігіттерден үлгі-өнеге, тәрбие алуы қажет пе? Мен бұл оқиғаны сол жігіттердің еркектігіне, ең алдымен қазақтығына сын деп есептеймін. Мен үшін олар қазақ деген ұлы атқа лайық емес, мақсатсыз, пасық адамдар.

3
1
943