Мазмұнға өту

Жаңа

Болмысымнан өзгеше көрінбеуге тырысамын

Қоғам қайраткері, тележүргізуші, продюсер Аружан Сайын үшін өзіңе ұнаған нәрсемен айналысу шын бақыт. Бірақ көп адам бақытты байлықпен шатастырады.


Аружан басқаларды қуантқысы кеп тұратын ізгі қасиетке ие жан. Соңғы жылдарда ол «Балаларға өмір сыйла» шараларын ұйымдастырып, күрделі аурумен ауырған талай отандастарымыздың балаларын емдеуге көмектесті.Өзгенің басындағы қиын жағдайға бейжай қарамауы осы игі істермен айналысып жүрген, тұла бойы позитивке тұнған қызды басқадан айрықшаландырып тұрады. Оның басшылығындағы «Мейірімділік» ерікті қоғамы қорына Елбасының өзі қолдау көрсеткені әлі есімізде. Көптеген қазақстандықтар Аружанның шынайылығы мен өз ісіне адалдығына сенім білдіргендіктен оның мүгедектер мен балаларға көмектесуге қол ұшын беруді мақсат тұтқан қорына қаражаттарын салды. Талай науқас балаларға көмектесуді алдына мақсат етіп қойған ол, ойын жүзеге асыру барысында барлық ұтымды жолдарды іздейді. Қайырымдылық саласындағы мүгедектерге көмектескені үшін «Алтын Жүрек» қоғамдық премиясына да ие болды. 
Жылдар жылжып өтіп жатса да Аружан әрдайым ізгілікті қалпында. Оның жасандылықсыз шынайы бейнесін көрермен бірден байқайды. Саяхаттауды және тігіншілікті жақсы көретін ол ешқашан да өзі туралы пікір қалыптастыру мақсатында әрекет еткен емес. «Болғаныңнан өзгеше көрінбе, мені қымбат киім мен пікір қалыптастыру үшін қолданылатын ұсақ-түйек заттар шын мәнінде бақытты ете алмайды. Түпкі мақсатым байлық емес», - дейді ол. Оның түсінігінде нағыз табыс – адамдарға, еліңе пайдалы болу, қажет болу және материалдық байлық адамзат игілігіне пайдаланылуы керек. Әңгіме барысында ол адамзат тарихындағы көптеген даңқты, табысты тұлғалардың материалдық байлықсыз-ақ бақытты өмір сүргенін мысалға келтірді. 
Табысқа жету жолында оның айналасындағы әртүрлі пиғылдағы адамдар тоқтатып, өзіне сенімсіздік туғызуға тырысып жатты. Талай адам мақсатына жетер жолда күмән туғызбақ болды. «Әрекет түбі – берекет» дейді Аружан. «Қимылдауға күмәнданып, қорқып отыра берсең ешқандай жақсы өзгеріссіз өмір сүре бересің. Беліңді бекем бу да мақсатыңа кірісіп кет», - дейді ол. 
Аружанды ата-анасы 6 жасында балетке берді. Өнердің бұл түрімен ол ҚР еңбек сіңірген артисі Н.В.Викентьевада 15 жасқа дейін айналысты. Содан кейін заманауи «Дивертисмент» балетімен айналысуға қызықты. Осы «Дивертисмент» балетімен өте көп іс-шараларда биледі. Оның өміріндегі үлкен бетбұрыс алғаш рет Қазақстан телеарнасының 1994 жылы «Таңшолпанға» шақыруымен байланысты болды. Осы кезде Аружанды байқаған режиссерлар оны таңғы дене шынықтыруды жүргізуге ұсыныс білдірді. 
Шынықсаң шымыр боласың. Аружанның алғашқы денені ширату жаттығулары музыкалық бейнебаян секілді шыққаны әлі есінде. Осы жылы «Аружан мен Компания» продюсерлік орталығын ашып шығармашылықпен айналысуын басқа арнада жалғастырды. Ол өзін тележүргізушілік саласында сынап көрмек болды. Бұдан соң 31 арнада «Дәмді әрі тез...», кейін «Еркем-ай» сияқты жобалар жалғастығын тауып кетті. Тәжірибе жинай келе өз жанына ұйымдастырушылық, менеджерлік жақын екенін түсініп, қазіргі кезде ірі жобалармен айналысуда. «Марат мен Жанна» атты 50 сериялы халықаралық форматқа сай фильм түсірілді, өзі де бұған дейін екі фильмге түскен еді. Бірақ актриса ретінде киноға түсуге әзір нақты жоспары жоқ. Әрі қарай болашақтың жоспарында романтикалық комедия жанрында кино түсіру ойларында бар. 
Аружан Сайын жаны жұмсақ, іскер, табысты отандастарымыздың бірі. Ол алдына игілікті істермен айналысуда мақсат етіп қойды. Сол жолда абыроймен еңбек етіп жүре беруіне тілектеспіз. 

Мақала «100 табыс тарихы» ұлттық жоба аясында Қазақстан Республикасы Дін істері және азаматтық қоғам министрлігінің тапсырысы бойынша «Әлем» Волонтерлықорталығымен дайындалған

0
0
701

Ғалымдық – үлкен мақсат нәтижесі

«Біздің бақытымыздың оннан тоғызы денсаулығымызға байланысты» демей ме, неміс ойшылы А.Шопенгауэр. Денсаулығы нашар адамға табыс та, байлық та, марапат та, мансап та қажет болмай қалады. Өйткені ол мазасыз тірлік кешіп, ең басты байлығынан айырылған жан.


Шынында, табиғаттың ең қымбат жемісі – дені сау адам. Еліміздің денсаулық сақтау саласында талай тәжірибелі, дарынды, жаңашыл, білімді кәсіби мамандар қызмет етіп жүр. Олардың арасында әкелі-балалы дәрігерлер де бар. Солардың бірі Әділжан. Оның алғашқы ұстазы, кеңесшісі, бағыт берушісі, тәжірибесімен бөлісуші өз әкесі торакальдық хирург Бауыржан Әлбазаров. 
Хирургия саласының ішіндегі сан тармақты бағыттарды зерттей келе ол торакальді (латын сөзінен аударғанда «кеуде клеткасы» мағынасын береді) хирургиямен айналысуды қалады. Бұл бағыт еліміздің медицинасындағы енді-енді күш алып дами бастаған бағыттардың бірі. 
Әділжан 2000 жылы С.Д.Асфендияров атындағы Қазақ мемлекеттік Медицина университетін тәмамдаған кезде бұл салада мамандардың жеткізіліксіз болғаны да рас. Астанадағы «Ұлттық Ғылыми медициналық орталықтың» кардиолог дәрігері Әділжан Әлбазаров әртүрлі жүрек ақауларына қан жолы тетігін орнату, әрқилы формадағы жүрек кеселдерін хирургиялық емдеу, қолқа қақпақшасы мен негіздерін қайта жасауда бірнеше операцияларды сәтті жасаған маман. Бұл жетістікке ол талай ізденістермен жетіп отыр. АҚШ-тың Мериланд Университетінде білім жетілдіріп келген соң, әлі де медицина ғылымы саласында алмақ асулары бар екенін түсінді. Сөйтіп ол 2003-2007 жылдары Мәскеудің А.Н.Бакулев атындағы жүрек-қан тамырлар ғылыми Хирургия орталығында аспирантурада оқып, медицина ғылымының докторы, профессор М.М.Алшибаяда кандидаттық еңбегін қорғап шықты. 
Бұл жауапкершілікті талап ететін, адам бойындағы ең күрделі де, маңызды жүректің дәрігері болуға да өзіңе сенімділік қажет. «Табыстың бәрі байлыққа әкелмейді. Байлықты басыңдағы жинаған білімің деп түсінемін. Оны ешкім тартып та, ұрлай да алмайды», - деді дәрігер. 
Әділжанның әріптес оннан аса шәкірттерінің бірқатары аймақтарда кардиоорталықтардың жетекшілері. «Мен үшін қызметіңе адалдық, еңбекке қабілеттілік, жауапкершілік өте маңызды», - дейді дәрігер. Әділжан бала кезінде космонавт болып, шексіз ғаламға саяхаттауды армандады. Өсе келе әкесі секілді дәрігер боп, айналасындағы адамдарға көмектесуді маңызды деп түсінді. Бос уақытын дүниежүзі тарихын оқып, тану қызығушылығына арнайды. Ал арманына келсек, ол да ізгілікке негізделіпті. Болашақта жүрек кеселдерін емдеуге жәрдемдесетін қор ашып, қайырымдылық іс-шараларымен айналысу... 
Күрделі де өзектілігі әрдайым жоғары салада өзіне деген сеніммен қызмет етіп жүрген Әділжан әлі талай жүректерді емдемек.

2
0
570

Өнерге жанкештілік қажет

Жеке орындаушы, жеке биші болу бір басқа да, ұжыммен бірігіп жұмыс жасау, ансамбльге жетекші боп, оған әртүрлі билерді қою дегеніміз бір басқа.


Би қоюшы хореограф немесе балетмейстер кәсібі шексіз қиял мен бойдағы таусылмайтын шабыттың көзін білім, тәжірибемен шығармашыл ұштастыра білдіруді талап етеді. Осындай өнер иесі қызылордалық Гүлбану Мырзабаеваның хореографиялық еңбегін халықаралық конкурстардың талай жүлдегері болған «Томирис» би ансамблінен көруге болады. Ол еліміздегі «Үздік хореограф», аймақтық «Жылдың үздік балетмейстері» және тағы басқа көптеген марапаттарға ие өз ісіне берілген кәсіби маман. 
Облыстық филармонияның «Томирис» ансамбліне биыл 15 жыл толып отыр. Ибрашева Сәрсенкүл құрған ансамбль төрт бишіден басталып, бүгінгі күні 25 бишіге дейін толысып отыр. Бай репертуарында әлем халық билері бар ансамбль негізінен қазақ билерін насихаттайды. Мәселен, биыл наурыз айында түркітілдестердің мерекесіне орай Ыстамбұлда және Нью-Йорк пен Вашингтонда апталап қазақ биін насихаттады. Тәттімбет күйіне қойылған «Аққу-қыз, гәкку-саз» және «Тұран» фольклорлық ансамблінің музыкасына қойылған «Дала қызы» композициялары шетелік көрерменін тәнті етті. 
- маған Еділ Құсайыновтың ғасырларға тереңірек бойлап жасаған дыбыстық ізденістері, аспап бояулары ұнайды. Шығармашылығымда осындай музыкалық туындыларға стилизацияға, яғни жаңаша көркемдеу жасауға жақынмын, - дейді Гүлбану Елубайқызы. 
Бұл бағытта Гүлбанудың «Сақ арулары», Е.Құсайынов күйіне қойылған Желтоқсан оқиғасына арналған «Қайран қазақтың қыздары-ай» жиі сұранысқа ие. Гүлбанудың шығармашылық қадамдары ескерусіз қалмай, еленіп жүр. «Томирис» Ш.Жиенқұлова атындағы қазақ биінің республикалық конкурсында «Қазақ биін жаңаша көркемдеу» номинациясының иегері. Сонымен бірге қытай, корей, испан, армян, грузин, өзбек, ұйғыр билерін сахналап жүрген ансамбль сәуір айында Гүлжан Талпақованың 1-республикалық конкурсында моңғол биі үшін 2-орынға ие болды. Халықаралық жастар «Шабыт» фестивалінде «Ғасырлар үні» би композициясы үшін лауреат болды. 
Бойында туабітті көшбасшылық қабілет бар, бастаған істі мәресіне дейін жеткізуді жөн көретін хореограф «соңында жүргім келмейді» дейді. Осындай ұстанымымен тоқсаныншы жылдары қоғамдағы күрделі өзгерістерге қарамастан «Томиристі» аяққа тұрғызу керек болды. Би десе ішкен асын жерге қоятын жетекші жанкештілікпен көп еңбек етті. Бишілер әр күні суық залдарда дайындықтар жүргізді. Ал, өз атына банктен несие алып Қытайға барып, ансамбльге костюм тіккізгені өз алдына бір әңгіме. 
Осыдан жиырма үш жыл бұрын Қорқыт Ата университетінің хореография кафедрасын ашқанда жұмысқа орналасқан Гүлбану қазір кафедра меңгерушісі, доцент. Мұнда да «Дидар» халықтық би ансамблін ұйымдастырды. Ғылыми-тәжірибелік зерттеулері «Қазақтың сахна биі» оқу-әдістемелік басылым боп жарыққа шықты. Г.Мырзабаева өзін ең алдымен ұстаз санайды. Өйткені, осы облыс пен қалада, аудандарда ең табысты еңбек етіп жүргендер өзінің шәкірттері. 
Кәсіби өмірінде табысқа жетуде ылғи түсіністікпен қолдаған жолдасы Жанатбектің ролі зор болды. Ол да өнер адамы, дизайнер. Ансамбльмен конкурстарға, шетелдік гастрольдерге сапарға шыққанда Жанатбек балаларға қарап, ешуақытта аяғына тұсау болған жоқ. «Өзіме хореографиядан басқа мамандықты елестете алмаймын. Мектепті 4-5-ке бітіріп, бишілікке оқимын дегенде анам қарсы болды. «Бұлай секеңдеп жүре беремісің» деп. Менің қайтпайтын шешімімді көрген соң ғана рұқсатын берген еді», дейді ол. 
Тақыр жерге гүл өспейді. Гүлбануға бишілік өнер нағашы әжесі Ізімкүлден дарыған. Әжесі ән айтып, би билеген, Күләш, Шаралар секілді өз ортасының сәні, әсем адам болыпты. Бірақ жолдасы рұқсат етпеген соң мәдениет үйлеріне, клубтарға өнерін көрсетуге бара алмапты. «Әжем ылғи бізге ән салғызып, би билеткізетін», - дейді Гүлбану балалық шағын еске алып. Биге құмар мектеп оқушысы үйірмеге қатысып, алғашқы би сабағын Т.В.Угай деген ұстаздан алады. Ол биле, оқы, сенен жақсы маман шығады деп өнер жолына бағыт береді. Сол арманы жетелеп, оқуды Жезқазған мәдени-ағарту училищесінде бастаған жас қыз Шымкентте жоғары оқу орнын осы мамандықтан бітірді. Алған білімін оқу мен өнер саласында тең ұстап үйренгенін тәжірибеге ұтымды ұластырып жүрген нағыз кәсіби өнер иесі. 
Өнерсіз қыздан без демей ме, Гүлбану Елубайқызы бойындағы ерекше қабілетімен елінің руханиятының өркендеуіне үлесін қосып жүрген өнерлі жандардың бірі.

0
0
914

Медицинадағы жаңа бағыттың жаршысы

Ол Ақтөбедегі медициналық университеттің травматология бөліміне оқуға түскенде нағашысы Жалмұрат сынықшы сияқты халықтың адамы болуды армандаған еді. Сол жылдарда нейрохирургия елімізде дамымаған медицина саласының бірі болды. Бірде Ақтөбеге мәскеулік нейрохирург А.Н.Коновалов келіп осы бір жаңа бағытқа қызығушылығын оятты.


Ақшолақов Серік Қуандықұлы қазір Астанадағы «Нейрохирургия ұлттық орталығының» басшысы, Халықаралық Еуразиялық нейрохирургия Академиясының академигі, отандастарымызға белгілі топ жарған дәрігер-нейрохирург. Осы орталық ашылғанға дейін жас маман талай асулардан өтті. Жалынды жастық шағын оқуға, білім игеруге арнады. «Тек қана алға жүру, тоқтамау және қандай жеңіс пен жетістікке жетсең де мастанба, кідірме» деген өмірлік ұстанымымен ол Мәскеуге аттанды. Студент кезінде өзін шақырған А.Н.Коновалов жанында он бес жыл тәжірибе жинады, танымал ғалымның жетекшілігімен докторлық жұмысын қорғады. Ең алғашқы өзінің күрделі операциясын да Мәскеуде жасады. 
Серік Қуандықұлын табысқа жетелеген жан дүниесінің білімге деген құлшынысы. Өмірлік кәсібі осы орталықпен тығыз байланыстағы дәрігер ағаның әріптестері мен шәкірттері жаңалыққа құмар жандар. Оның соңғы жылдарда тәрбиелеген 5 ғылым докторы мен 15 ғылым кандидаты қазір әрқайсысы өз жолын тауып бұл саланың дамуына үлес қосып жүр. Сонымен қатар шетелдік танымал журналдарда 100-ге жуық ғылыми мақалалары жарияланған С.Ақшолақов 13 ғылыми монографияның авторы. 
Қазақстан медицинасының нейрохирургия саласына ол алпыстан астам операция жасаудың жаңа әдістерін енгізіп, өзі ми мен омыртқаға 5000-нан астам операция жасады. Ең бастысы, отандық операцияларға микронейрохирургияны, эндоскопиялық нейрохирургияның негіздерін енгізді және нейронавигацияны алғаш қолданысқа енгізіп, эпилепсияны жедел емдеуді хирургия тәсілімен жүзеге асырды. 
Серік Қуандықұлының ғылымдағы жетістіктеріне үнемі қолдау көрсетіп отырған жұбайы да инемен емдеудің маман дәрігері. Ерлі-зайыпты дәрігерлер үнемі білімдерін шыңдап, халыққа қызмет етуді мақсат тұтқан жандар. 
- біздің орталықта күрделі операциялар жасалады. Шынында, көп адам ауруын жасырғысы келеді. Дер кезінде алдын ала емделгеннің нәтижесі өте жақсы болатынын ескермейді. Әлі де біздің халықтың денсаулыққа көзқарасы төмендеу, - деп дәрігер көкейкесті ойымен бөлісті. 
Орталық келер жылы жаңадан келген гамманайф аппаратымен емдеуді бастауды жоспарлауда. Бұл құралғы операцияның алдын алуда өте маңызды қызмет атқарады. Дертіне дауа іздеген жанның ауруын бастапқы деңгейінде күйдіріп, жойып жіберу арқылы емдейді екен. Арнайы орталықта қазір гаммонайф аппаратымен жұмыс жасайтын мамандар дайындалуда.

Мақала «100 табыс тарихы» ұлттық жоба аясында Қазақстан Республикасы Дін істері және азаматтық қоғам министрлігінің тапсырысы бойынша «Әлем» Волонтерлықорталығымен дайындалған

0
0
882

Адамзат тұйыққа тірелді ме?

Кезінде шіркеудің ауыр салығы - индульгенциядан жалтару үшін, құдайға храмсыз-ақ сыйынам деп, индивидуализм жолына түсіп, бірте-бірте өзге әлемге ориентир болған Батыс мәдениеті дегеніңіздің үміті ақталмаған сыңайлы. Коллективизмге қайта оралайын десе, ру-қауымын әлдеқашан ұмытқан.
Бір идея төңірегіне ұйысайын десе, елдің бәрін елттіріп жіберер сол идеясы құрғыр да таптырмай тұр.
Қатын мен қатын, еркек пен еркек ұйығып, оған сәбилерді араластырып, өмір тоқтап қалу қаупі бар..
Енді бір бөлігі Батыстың көшіне, тағы бір бөлігі мұсылман дүниесіне ілесеміз деп алаөкпе болған біз секілді елдер қайтер екен?
Батыстың жайын жоғарыда айттық.
Ал мұсылман әлемі дегеніңіздің өзі құдай кешірсін - дүдамал дүние болып қалды.
Қасиетті пайғамбарымыз Мұхамед (с.ғ.с.) айтып кеткен 73 тарау жолдың қайсысы дұрыс?
Оны тап басып айтып беретін ғұлама әлі тумаған секілді. 
"Ата жолы" дейін десек, отырықшылыққа көшуімізбен бірге тұрмыс-салтымыз да өзгерді.
Бір пысықайлар "Ата жолы" дегеніңізді барлық мақсатқа "сый-сияпатпен" (пара) жету деп түсініп, айналаны қып-қызыл базарға айналдырды. "Ар-ұят", "Обал-жазыр" дегеніңіз ұмытылды. "Құдайдың қаһары", Көз жасы", "Нала" дегендеріңізден ешкім қорықпайтын болды. Қорыққандарының өзі дін дегенді мешітке барсақ, намазға жығылсақ елге істеген қиянатымыз кешіріле салады деген түсінген секілді...
Әлде, ештеңеге бас қатырмастан, Алланың жіберген несібесін ішіп-жеп, дүние керуенмен бірге бағыт-бағдарсыз аға беру керек пе?

0
0
418

Астанада «New energy global startup fest» байқауы аяқталуға жақын

Бүкіләлемдік стартап-жобалар байқауы аяқталуға жақын.

Ақтық сынға 36 елден келген 100 инновациялық компания қатысып, өзінің тың жобаларын қазылар алқасына ұсынды. Ішіндегі үздік деп танылған 30 жоба іріктеліп, келер жылы Елордада өтетін Экспо көрмесіне қатысады. Үміткерлер арасында 5 қазақ компаниясы бар. Айта кеткен жөн, қазылар алқасы іріктеу кезінде баламалы энергия саласындағы жобаларға басымдық берді.

Қанат Бозымбаев, ҚР Энергетика министрі:

- 100 жобаның ішінде Қазақстанның үлесі бар. 5 жобаны жігіттер ұсынып отыр, олардың екеуі баламалы энергетика көздеріне байланысты. Қызығушылық бар, инвесторлар көріп отыр. Бәсекелестікте қазылар алқасы ең күшті жобаларды таңдайтын болады.

Ольга Крупская, байқау қатысушысы /Украина/:

- Мамандарымыз азық-түлік қалдықтарын бұрынғыдан 5 есе тез өңдейтін жаңа технология ойлап тапты. Тиімділігі де 10 есеге артты. Өңдеу кезінде қалдықтардың 95 пайызы игеріледі. Біз бұл жаңашылдықты әлемнің бірнеше елдерінде қолданысқа енгізуді діттеп отырмыз. Солардың қатарында Қазақстан да болады деген ойдамыз.

Источник: http://24.kz/kz/zha-aly-tar/expo/item/145442-astanada-new-energy-global-startup-fest-baj-auy-aya-talu-a-zha-yn

0
0
361

«Ауылына қарап азаматын таны»

"Ауылына қарап азаматын таны" деген сөз бар...

Әр ауылда, ауданда, қалада, облыста "Ардагерлер кеңесі" бар екенін БАҚ арқылы біліп жүрміз..

Талай ауылда, елді мекенде болып жүрміз. Шынын айту керек, көпшілігінде әлгі кеңестің аты бар, заты жоқ..

Келтемашат ауылдық округінің ардагерлер кеңесінің  (Түлкібас ауданы, ОҚО) жұмысымен жақсы таныспын.

Кеңесті Құлыбеков Оңласын Жүнісұлы деген 65-жастағы ағамыз басқарады.

Ардагерлер  жиналып, ауылдағы шешілуі тиіс мәселелерді шешуге атсалысып отырады. Ауылдық округке қарайтын Кершетас, Жиынбай ауылдарына тартылған көгілдір отын құбыры 2009 жылы тікелей осы кеңестің күшімен шешілген. Ауылдағы жер мәселесі, мал жайылымы, жастар тәрбиесі, мектептердің жұмысы  т.с.с. мәселелер  ардагерлердің жіті назарында.

Қысқасы атқарылып жатқан жұмыс айтуға тұрарлық. Ең бастысы, бәрі қоғамдық негізде атқарылады. Ардагерлер кеңесінің төрағасы Оңласын аға мемлекеттен бір тиын сұраған емес.

Кеңес ауылдан шыққан кәсіпкерлердің демеушілігімен ардагерлерге демалыс үйлеріне жолдама беріп отырады. Ешқандай тамыр-таныстыққа жол жоқ. Барлық шешім дауыс беру арқылы шешіледі.

Кеңестің нақты жұмыс жоспары бар.

Жақында  Түлкібас ауданынының аудандық мәдениет үйінде  Келтемашат ауылдық округінің ардагерлер кеңесінің төрағасы Құлыбеков Оңласынның ұйымдастыруымен   қазақтың ұлттық қолөнерінің шебері, ұлттық гобелен өнерінің негізін қалаушы, кәсіпқой суретші, КСРО Суретшілер Одағының мүшесі Батырбек Тұғанбайұлы Өтеповтің 70  жылдығына арналған «КҮТ МЕНІ ТУҒАН ЕЛ» атты іс – шара өткізіліп, артынан марқұмның рухына бағыштап ас берілді.

Іс-шараға суретшінің жұбайы мен ұл-қыздары, замандас құрбы-достары, әріптестері қатысып, республиканың түкпір – түкпірінен қонақтар шақырылды.

Аталған ауылдың ардагерлері 5.05.2016 ж. өткізген «Ұлыларды ұлықтау – Ұрпақ парызы» атты семинарға қатысқан болатынбыз. Өкінішке қарай, соңғы өткізген іс-шараға қатыса алмадық.

Барлық ауылда дерлік ақсақалдар кеңесі бар.

Өкінішке қарай, кейде ойға алған мақсаттары бір болғанмен жасап жүрген  жұмыстары бір біріне ұқсай бермейді.

Мәселен, Түркстан қаласындағы Молда Мұса атындағы мектептің әділетсіздік көріп, құзырлы мекемелерге шағымданған  мұғалімдеріне топырлап барып, басу айтқан ақсақалдар мектепте арты дауға айналған ақша жиналып жатқан кезде қайда болды?

Ауыл-үйдің ұрлығы жатпайтыны белгілі.

Ауылдағы түрлі әңгімелерден ертерек қорытынды жасап, мектеп басшылығын қадағалап отырғанда жағдай мұншалықты ушықпас еді ғой..

Айтайын дегеніміз, Келтемашат ауылдық округінің ардагерлер кеңесінің жұмыс тәжірибесін  облысқа тарату керек.

 

 
1
0
5012

Ninety One тобының мүшесі – Батырхан Маликовтың (ALEM) анасымен эксклюзивті сұхбат

Барлықтарыңызға сәлем! Сіздермен бірге Амангелді! Бүгінгі блог бір жыл ішінде мыңдаған жанкүйер тыңдарман жинап үлгерген аты шулы «Ninety One» тобына арналмақ. Нақтырақ айтқанда 91 тобының вокалисті, топтың үлкені – ALEM-нің, яғни Батырхан Маликовтың анасы – Сұлукүл Абрамановамен жүргізген сұхбатыммен бөліскелі отырмын. Сұхбатқа себепші болған топ мүшесі Даниярдың анасы - Әлия Назарғалиқызы Қадір. Естеріңізде болса, мен Әлия апаймен де сұхбат жүргізгенмін.

Ең алдымен жалпы өзіңіз бен отбасыңыз жайлы айтып берсеңіз:

Отбасымызда жеті адамбыз: əкесі - Абай Маликов, анасы - Сұлукүл Абраманова, ағасы Бақытжан, қарындасы Гулафия, келінім Балауса мен Əди есімді немерем бар. Əкеміз мал дəрігері, өзім Қостанай қаласы әкімдігінің «Қостанай-Су» мемлекеттік коммуналдық кәсіпорнында тексеруші болып жұмыс істеймін.

Батырханның балалық шағы қалай өтті? Ерке болды ма?

Батырхан кішкентай кезінде өте жылауық болды. Жылаған кезінде бар дауысымен қатты айқайлап жылайтын. Туысқандарымыз осы баланың өзінен дауысы әйдік деп айтатын. Кейін өсе келе ол дауыс әнге айналды. Қазір туыстарымызбен бірге бас қосқан отырыстарда «кішкентай кезіндегі айқай – тегін айқай емес екен ғой» деп бір күліп аламыз. Батыр ваннаға кіріп алып, өлең айтқанды жақсы көретін. Ваннада акустикасы жақсы болғандықтан дауысы әдемі, айқын шығатын. Студент болғаннан кейін де, осы әдетін тастамады. Көршілер «О, Батырхан келді ме?» деп, үйге келгендігін бірден білетін. Екінші не үшінші сынып кезінде сары түсті күдері (замшевый) аяқ-киім алып бергенбіз. Бірде қарасақ, Батыр жанағы аяқ-киімнің бір сыңарын қара креммен бояп отыр екен. Сөйтіп әлгі аяқ-киімнің біреуі қара, біреуі сары болып қалды. Әкесі «Батыр, енді бұның екіншісін де бояп ал» деп күлген болатын. Сондай қызықтар орын алып отыратын. Батыр 9-сыныпқа дейін қазақ сыныбында, ал  10-11 сыныпты орыс тілді лицейде бітірді. Себебі облыстық мәдениет басқармасы Батырхан сияқты 5 балаға арналған вокалдық студия ашып, соған ауыстырып алды. Кейіннен ол студия үлкейіп, көп жастарды тәрбиеледі. Мектепте оқып жүргенде Ресей қалаларына, Германияға, Испанияға барды. Барған жерінен үнемі жүлделі орындармен оралатын. 6-сыныпта Испанияның Барселона қаласына барды. Батырдың қонақ үйдің бөлмесінде Жаяу Мұсаның әнін айтып дайындалып жатқанын естіп, бөлмеге кірген бір қазақ ағамыз Батырдың дауысына тәнті болғандығын айтып, қолына евро ұстатқандығын айтып келгені бар.

Музыкаға деген қызығушылығы қай жасында пайда болды?

Музыкаға деген қызығушылығының пайда болуына əулетіміздің музыка өнеріне жақындығы əсер етті деп ойлаймын. Əулет мүшелері барлығы да түрлі аспаптарда ойнайды, əн айтады. Əкеміз əдемі қоңыр дауыс иесі. Батыр көбіне әкесіне ұқсаған. Ең алғаш рет сахнаға 9 жасында шықты. Қостанай қаласында өткен «Айгөлек», «Алтын микрофон» балалар байқауында, сәйкесінше, бас жүлдені және жүлделі 3 орынды жеңіп алды. Музыка мектебінің домбыра класын қызыл дипломға болмаса да, жақсы аяқтап шықты. Тіпті домбыра өнері бойынша облыстық байқауда жүлделі 2 орынға ие болды. Батыр кішкентайынан өте елгезек, бауырмал, көңілшек бала болды. Əлі де сол, ақкөңіл, сенгіш, əрдайым өзгелерге қол ұшын созғысы келіп тұрады.

Балаңыздың бойынан ерекше атап көрсететін қасиеттері қандай?

Баламның бойындағы ерекше қасиеттердің бірі – біреудің қуанышымен бөлісе алуы, қызғаншақтық деген қасиет оған жат нәрсе. Сол мені қуантады. Ақкөңіл, сенгіш, көмектесуге әрдайым дайын тұрады. Ол ортаның адамы.

Балаңызды еркелеткенде қандай лақап есімдер қолданасыз?

Батош, Батончик деп еркелететінбіз, ал қазір Батыр деп атаймыз.

Болашақ келініңіздің қандай болғанын қалайсыз?

Балама ұнаған қыз, бізге де ұнайды деп ойлаймын.

Балаңызды Ерболат мырзаға тапсыру қаншалықты қиын және қалай болғандығын айтып берсеңіз?

Батырхан «Қазақстан дауысы» жобасына қатысқан кезде Ерболаттың көзіне түсіп, оны өзінің кастингіне қатысуға шақырған. Алайда ол кезде Батыр Челябідегі оқуын бітірмегендіктен Алматыға 1 жылдан кейін ғана барды. Кастингтен өткендігін білгенде біз қуанбасақ, ренжіген жоқпыз. Өйткені «Орда» тобы қазақ эстрадасында өзіндік орны бар ерекше топ, ал Ерболаттың өзі өте еңбекқор, нағыз өнерпаз екендігін білетінбіз. Бірақ, әрине, ол кезде топтың стилдері қандай болатындығын білмеген едік. Сондықтан алғаш рет стилін өзгерткен кезде, шыны керек, ұнаңқырамады. Оны баламның өзіне де айтқанмын. Уақыт өте келе ойымды өзгерттім. «Неге баламды қолдамасқа?» деген шешімге келдім. Ол үкіметтің қаржысын қымқырған ұры, әлде бір қанішер қылмыскер, болмаса зорлықшы емес, бойындағы талантын халқымен бөлісіп жүрген әртістердің бірі, яғни бұл бар болғаны сахналық образ.

Әр түрлі әлеуметтік желілердегі айтылатын сын-пікірлерді оқисыз ба?Оларды қалай қабылдайсыз?

Иә, әрине, оқимын. Әуелгі кезде ауыр тиетін. Бұны кім жазған екен деп, қарайын десең көбіне жабық аккауанттардан жазады. Кім жазғаны көрініп тұрса, өмірде жолы болмаған, бұл өмірге разы емес адамдар жазғандай көрінеді. Қан қысымым көтеріліп, денсаулығым сыр көрсетіп қоятындықтан, қазір пікірлерді оқымауға, ал оқысам көңіліме алмауға тырысамын.

Топ мүшелерінің ішіндегі биасыңыз кім? Неліктен?

Топ мүшелерінің барлыға да ұнайды. Әрқайсысы да тәрбиелі, инабатты, жүрегінде иманы бар жігіттер. Қайсысы болмасын жеке дарын иесі, бірін-бірі жақсы толықтырып тұрады. Жігіттерді бөліп жармаймын, дей тұрғанмен, ZaQ’тың өнері ұнайды. Жастығына қарамастан сөлеу мәнері мен сауаттылығы ұнайды.

Сіз 91 тобының өнерін қолдайтыныңыз баршамызға мәлім. Алайда Батырхан бұл топтың мүшесі болмаса, сіз бұл топты қолдар ма едіңіз?

Батыр бұл топтың мүшесі болмаса да, 91 тобын қолдайтын едім, себебі біздің елімізге бұндай топ қажет. Қазіргі таңда елімізде жастар тыңдайтын әншілер саны өте аз, сондықтан жастардың басым көпшілігі шетелдік әншілерді тыңдап, шетелге шығуға асығады. Ал егер осындай топтар мен өнер адамдары өз елімізде болса, керісінше өзге елдің жастары біздің өнерге қызығушылық танытып, біздің елге келуді армандайтын болады. 91 тобының арқасында 120 астам мемлекет Қазақ елі жайлы білді. Тіпті кейбір елдің жастары қазақ тіліне қызығушылық танытып, қазақ тілінде топқа құттықтаулар жіберіп отырады. Бұл дегеніміз үлкен жетістік деп есептеймін.

Батырханның бұл жолды таңдауына жол бергеніңіз үшін өкінесіз бе?

Бір кездері баламды өнерге бергенше, неге күреске бермедім деп өкінетін едім. Сол кезде балам «Мен біреуді жазықсыздан жазықсыз ұра алмайтынымды өзіңіз жақсы білесіз ғой» деген еді. Сондықтан қазір өкінбеймін, керісінше қолдаймын, себебі ол менің қолдауыма мұқтаж.

91 тобына айтар тілегіңіз? Мүмкін халыққа, ер бала болсақ та бұл бағыттағы өнерді сүйетін мен сияқты жігіттерге айтар сөзіңіз бар шығар

91 тобы қазақ жастары үшін қараңғы туннельдің арғы жағынан көрінген кішкене ғана сәуле секілді. Сол сәуленің одан әрі жарқырап, үлкен шоқжұлдызға айналғанын тілеймін. Алар асулары мен шығар биіктері көп болсын. Айналайын, Амангелді балам, саған да деніңе саулық, жұмысыңа береке тілеймін. Оқуыңды бітіріп, білікті де білімді маман иесі бол. Қазағымның саған ұқсаған, түсінігі мол жігіттері көбейе берсін.

 

Ал енді дәстүр бойынша сұхбат жайлы өз ойымды айтайын. Бұл сұхбаттан кейін EagleZ-дар жаңа мәліметтерге қол жеткізді, өздерінің кумирлерін жаңа қырларынан таныды деп ойлаймын. Себебі сұхбатта ешкім біле бермейтін мәліметтер айтылды. Ол үшін Сұлукүл анамызға алғыс білдіреміз. Қызықты мәлімет: Сұлукүл апай өзінің жұмысбастылығына қарамастан, өзінің алтын уақытын бөліп, бұл сұхбатты WhatsApp әлеуметтік желісі арқылы берген-ді. Сондықтан EagleZ менде болашақ енелеріңіздің телефон номері бар екендігін айтып қояйын.😅😂 Сұлукүл апайымыз өте қарапайым, кішкентайсың деп менсінбеушілікті білмейтін керемет жан екен. Сол үшін ол кісіге тағыда алғыс білдіретіндігімді айтамын. Сұхбат соңында апайымыз маған «Хабарласып тұр! Қостанайға жолын түсіп келіп жатсаң, үйге кел» деп қонақжайлылық танытты. Қуаныштымын! Сұлукүл анамызға жұмысында сәттілік, отбасына амандық тілейміз. Сондай-ақ EagleZ'дардың атынан Батырхан сияқты дарынды баланы дүниеге алып келгеніңіз үшін алғыс білдіреміз. Осы сөзді көптеген қыздар айтқысы келіп жүр.

Болашақта топтың өзге мүшелерімен сұхбат болуы мүмкін. Егер маған ұсыныстарыңыз болса, мені әлеуметтік желілерде таба аласыздар:

VK: Амангелды Мухамеджан

Instagram: @lg_with_aman

Facebook: Мухамеджан Амангелды

Twitter: @lg_with_aman

10
2
11492

Зауытбек Тұрысбеков туралы

Желіде әлдебіреулер бір шетелдік кәсіпкердің шотын шауып Зауытбек Тұрысбековтің есімін жалаулатып жатыр ғой...
Мен Зәкеңді өмірімде көрген емеспін.
Бірақ Закеңді дұрыс азамат деп ойлаймын.
Украина жерінде жоғалып кеткен 102 атқыштар дивизиясын зерттеп жүргенімді 2012 ж. желтоқсан айында украиналық тарихшылардан естіген Закең уақыт созбай Оңтүстік Қазақстан облысы әкімінің сол кездегі идеология жөніндегі орынбасары Әли Бектаевқа хабарласып "Өмір Шыныбекұлы деген тарихшы мұғалімді тауып қолдарыңнан келген көмекті жасаңдар" - деп өтініпті. 
Әли мырза мені өзіне шақырып, біраз сөйлестік. Әлекеңнің менің есімім мен жасап жүрген жұмысымды Қазақстанның Украинадағы елшісінен естігеніне қысылыңқырап тұрғанын да сездім. Көзімше Білім Басқармасы мен Ішкі саясат Басқармасы басшыларына хабарласып тапсырма берді (Ол тапсырмалардың қалай орындалғаны енді басқа тақырып).. 
Осы жағдайдың өзі Зәкеңнің елжанды азамат екенін хабардар етсе керек. Әйтпесе, облыстағы тікелей басшымыз менің есімім мен жасап жүрген жұмыстарымнан хабарсыз. Ал Украинада жүріп, басқа шаруасы шаш етектен болса да, қарапайым мұғалім жасап жүрген жұмысқа ден қоюы Зәкеңнің азаматтығын білдірсе керек..
Сондықтан, қазақ тілді оқырмандарды пиғылдары күмәнді әнебір сайттардың материалдарын абайлап оқуға шақырамын.

0
0
1294

ОҚО ұстаздары Франциядан тәжірибе алмасуы мүмкін

Бүгін облыс әкімі Жансейіт Түймебаев Францияның Қазақстандағы Төтенше және өкілетті Елшісі Франсис Этьен бастап келген бір топ делегаттармен кездесті.

Өңір басшысы шетелдік қонақтарға Оңтүстік Қазақстан облысының инвестициялық мүмкіндіктері мен ауыл шаруашылық саласындағы жетістіктерін және туризм бағытындағы жұмыстарды мәлімдеді.

Оңтүстік Қазақстан облысы Қазақстандағы халқы көп шоғырланған аймақ екенін айтқан ол келер жылы Шымкент қаласының халқы 1 миллионға жететінін мәлімдеді. Сонымен қатар, облыста ірі уран өндіруші кәсіпорындар мен мұнай өңдеу зауыты бар екенін және облыс көкөніс пен жеміс кластерінің орталығы болып табылатынын жеткізді. Ташкентпен шекаралас жатқан аудандарда қауын-қарбыз өсіріліп, шетелге, оның ішінде, Германияға экспортталып отырғанын айтты.

Сондай-ақ, индустрия саласын дамытуда облыс республикада көш бастайтынын xабарлаған әкім өңірде бүгінде 7 индустриалды және 1 арнайы экономикалық аймақтың жұмыс істеп тұрғанын атап өтіп, онда жеңіл және ауыр өнеркәсіп орындары мен тоқыма фабрикалары сәтті жұмыс істеп жатқанын мәлімдеді.

Өз кезегінде Елші Қазақстан мен Франция арасындағы қарым-қатынас жыл сайын дамып келетінін айтып, туризм, индустрия және білім бағыттарында әріптестік орнатуға дайын екенін жеткізді. Сондай-ақ, мәртебелі мейман Оңтүстік Қазақстанда бірлескен жобаларды жүзеге асыру үшін тығыз байланыс орнату мақсатында Франциядағы түрлі сала мамандарының өкілдерімен арнайы келгенін жеткізді.

Кездесу барысында Франсис Этьен Қазақстан Франциямен қарым-қатынасты одан әрі нығайту мақсатында барлық жағдайды жасап отырғанын, яғни бұған дейін виза ұзақтығы 15 күн болса, келер жылдың 1 қаңтарынан бастап 30 күнге ұзартылатынын мәлімдеді. Сонымен қатар, ол Францияға қысқа уақытқа келуші қазақстандықтар үшін визасыз мүмкіндіктер қарастырылып жатқанын жеткізді.

Жиын соңында өңір басшысы Қазақстан мен Франция күндеріне байланысты сол елдің өнерпаздары мен кәсіпкерлерін Оңтүстік Қазақстан облысында көргісі келетінін және осы күндер аясында француздық тауарөндірушілердің көрмесін ұйымдастыруды ұсынды. Сондай-ақ, әкім

мектеп пен жоғары оқу орындарының мұғалімдерін аталған елге тәжірибе алмасуға жіберу жайын қарастыратынын айтты.

Жұмыс сапары екі күнге жалғасатын франциялық делегаттарға облыстың инвестициялық мүмкіндіктері таныстырылып, бірқатар туристтік және тарихи орындарға инфотур ұйымдастырылады деп жоспарлануда.

Ақпарат көзі: strategy2050.kz

0
0
423