Мазмұнға өту

Жаңа

Баланың туылуы бойынша мемлекеттік қызметтердің толық спектрін енді Қазақстанның перзентханаларында ресімдеуге болады

«Азаматтарға арналған үкімет» мемлекеттік корпорациясы жаңа пилоттық жобаны іске қосты, бұл жоба шеңберінде баланың туылуын тіркеуді, бала туу мен оның күтіміне жәрдемақы тағайындауды, босану және жүктілікке байланысты табысын жоғалтқан жағдайдағы әлеуметтік төлемдерді ресімдеуді, сондай-ақ баланы балабақша кезегіне қоюды жас аналар перзентханада жүзеге асыра алады. Композитті қызмет көрсету барлық 4 қызметке бір уақытта перзентханада өтініш қабылдауды білдіреді.

«Естеріңізге сала кетейік, осы жылдың наурыз айында Әділет министрлігі баланың туылуын тіркеу бойынша мемлекеттік қызметтер стандартына азаматтар баланың туылуын тіркеуге өтінішті 3 жұмыс күні ішінде берулері тиіс деген өзгерістер енгізген. Қазақстандықтарға қолайлы болу үшін осы және оған ілеспе қызметтерді композиттік түрде көрсету мүмкіндіктерін қарастырдық. Бұл қазақстандықтардың өмірін жеңілдетіп, уақыттарын үнемдейді» - деді «Азаматтарға арналған үкімет» мемлекеттік корпорациясы» КЕ АҚ  Басқарма төрағасының орынбасары Медет Құмарғалиев.

Құмарғалиевтің айтуынша, композит «Баланың туылуын тіркеу, оның ішінде азаматтық ахуал актілері жазбаларына өзгерістер, түзетулер мен толықтырулар енгізу», «Бала туғанда берілетін және бала күтімі бойынша жәрдемақыларды тағайындау», «Әлеуметтік тәуекелдер жағдайларына әлеуметтік төлемдер тағайындау: еңбекке қабілеттілігін жоғалту, асыраушысынан айырылу, жұмысынан айырылу, жүкті болу мен босануға байланысты табысынан айырылу, жаңа туған баланы (балаларды) асырап алуға байланысты табысынан айырылу, бала бір жасқа толғанға дейін оның күтіміне байланысты табысынан айырылу» және «Мектеп жасына дейінгі (7 жасқа дейін) балаларды балалар мектепалды ұйымдарына жіберу үшін кезекке қою» қызметтеріне қатысты болып табылады.

Дайын болған туу туралы куәлікті ата-аналар, құжат тапсырған күнді есептемегенде, 2 жұмыс күні ішінде халыққа қызмет көрсету орталықтарынан алуларына болады, ал жәрдемақыны тағайындау туралы ақпарат клиенттің ұялы телефонына                 sms-хабарландыру арқылы түседі. Сонымен қатар, қазақстандықтар балабақша кезегін egov.kz  электронды үкімет порталынан немесе мемлекеттік корпорацияның фронт-офистеріндегі  «Connection Point» өз өзіне қызмет көрсету секторлары арқылы көрулеріне болады.

Халыққа қызмет көрсету орталықтары арқылы 8 айда 24 миллионнан астам мемлекеттік қызметтер көрсетілген, оның 235 мыңнан астамы туу туралы куәлік беру болып табылады.

 
1
0
444

Сыбайлас жемқорлыққа қарсы мәдениетті қалыптастыру үшін «Азаматтарға арналған үкіметте» бірқатар іс-шаралар өтті

«Азаматтарға арналған үкімет» мемлекеттік корпорациясы» КЕ АҚ-та сыбайлас жемқорлықтың кез келген көріністеріне төзбеушілік атмосферасын құру және сыбайлас жемқорлыққа қарсы мәдениетті қалыптастыру» – дәл осы тақырыпта мемлекеттік корпорацияның орталық аппаратының, Астана қаласы бойынша дирекциялары мен департаменттерінің жұмыскерлері үшін бірқатар іс-шаралар өткізілді.

«Азаматтарға арналған үкіметтің» Тәуекелдерді басқару және сыбайлас жемқорлыққа қарсы іс-қимыл департаментінің қолдауымен өткізілген іс-шараларға                   ҚР Парламенті Мәжілісінің депутаты Анар Жайылғанова, «Нұр Отан» партиясы «Бірлік» филиалы төрағасының бірінші орынбасары Әлия Кайшарова, ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Астана қаласы бойынша департаментінің басшысы Тілеген Каскин қатысты.

«Азаматтарға арналған үкіметтің» Тәуекелдерді басқару және сыбайлас жемқорлыққа қарсы іс-қимыл департаментінің директоры Бауыржан Талдықбаевтың айтуынша, мұндай іс-шаралардың негізгі мақсаты -  сыбайлас жемқорлық фактілерінің алдын алу және оған жол бермеу, мемлекеттік корпорацияның жұмыскерлері арасында сыбайлас жемқорлыққа төзбеушілікті көрсететін құндылықтар жүйесін нығайту.

«Бүгінде әрқайсымыздың алдымызда халықтың құқықтық сауаттылық деңгейін арттыру, «Сыбайлас жемқорлықсыз мемлекет - гүлденген мемлекет» идеологиясын алға тарту, мемлекеттік корпорацияның барлық қызметкерлері арасында, сондай-ақ «Нұр Отан» партиясымен, құқық қорғау органдарымен және басқа да қоғамдық бірлестіктермен және ұйымдармен бірлесіп, сыбайлас жемқорлыққа «нөлдік» төзушілік атмосферасын құру мәселесі тұр. Сыбайлас жемқорлықпен күресу – баршаның және әр азаматтың міндеті. Сыбайлас жемқорлыққа қарсы күрес жауапкершілігі тек қана мемлекетке емес, әрбір жеке азаматқа жүктелетінін есте сақтауымыз қажет. Мемлекет пен қоғамның бірлігі және өзара сенімділігі ғана сыбайлас жемқорлыққа қарсы тұруға мүмкіндік береді», - дейді Талдықбаев.

Бауыржан Талдықбаев атап көрсеткендей, мұндай іс-шаралар «Нұр Отан» партиясының, құқық қорғау органдарының, үкіметтік емес ұйымдар мен басқа да ұйымдардың өкілдерінің қатысуымен мемлекеттік корпорацияның барлық аумақтық департаменттерінде жүйелі түрде өткізілетін болады.

   

«Азаматтарға арналған үкімет»

мемлекеттік корпорациясы»

коммерциялық емес акционерлік қоғамының

Баспасөз қызметі

 
0
0
469

«Азаматтарға арналған үкімет» мемлекеттік корпорациясының 1-ші республикалық спартакиадасының жеңімпаздары анықталды.

«Азаматтарға арналған үкімет» мемлекеттік корпорациясы» КЕ АҚ департаменттері арасында жалпы командалық есепте бірінші орынды Оңтүстік Қазақстан облысының құрамасы алды. Ал футбол бойынша бірінші орынды Қостанай облысы, волейбол мен шахмат бойынша ОҚО құрамасы, арқан тартуда Маңғыстау облысының құрамасы, эстафетада Солтүстік Қазақстан облысының құрамасы алды.

Мемлекеттік корпорация Қазақстан Республикасының 25 жылдығын тойлауға орай өзінің жұмыскерлері арасында 8-10 қыркүйек аралығында 1-ші республикалық спартакиада өткізді. Шараға 14 облыстық, Астана және Алматы қалаларының филиалдарынан, сондай-ақ мемлекеттік корпорацияның орталық аппаратының 17 команда құрамасы қатысты.

«Азаматтарға арналған үкімет» мемлекеттік корпорациясы» КЕ АҚ Басқарма төрағасының орынбасары Медет Құмарғалиевтің айтуынша, өңірлік деңгейдегі  іріктеу турларында департаменттердің 18 мыңға жуық қызметкерлері қатысқан, бірақ Алматы қаласына бірінші командалық орынға таласуға барлығы 289 адам қатысты. «Азаматтарға арналған үкімет» мемлекеттік корпорациясы» жас және перспективті дамып келе жатқан ұйым. Ол 4 мекеменің бірігуі арқылы құрылғандықтан, қазіргі уақытта ұжымның бірігуі мен ынтымақтасу қажеттілігі бар, ал спорт адамдарды жақындастырмайды ма? Бүгін тек біз ғана емес, барлық Қазақстан оған үлкен көңіл бөлуде», - деп атап өтті.

Медаль үшін күрес 5 спорт түрі бойынша өтті, бұл мини-футбол, волейбол, шахмат, арқан тарту және эстафета. Бастапқы кезеңде қатысушылар сегізден бір финалға, одан кейін ширек финалға өту үшін күресті.

«Барлық қарсыластар өте күшті болды, дайындық республикалық спартакиадаға кім қатысатындығы белгілі болғаннан дейін жүргізілді. Соңына дейін біздің жеңетіндігімізге сенген жоқпын, міне бүгін еркін демалуға болады, себебі  спартакиаданың «алтыны» Оңтүстік Қазақстанға барады», - деді Оңтүстік Қазақстан облысы құрама командасының капитаны, Оңтүстік Қазақстан бойынша «Әлеуметтік төлемдерді ведомствоаралық төлеу орталығы» департаментінің директоры Бахыт Басынбек.

«Азаматтарға арналған үкімет» мемлекеттік корпорациясы осы жылдың сәуірінде «Халыққа қызмет көрсету орталығы», «Зейнетақы төлеу жөніндегі орталық», «Жылжымайтын мүлік орталығы» және «Жер кадастры ғылыми-зерттеу орталығы»            4 РМК базасында құрылғандығын еске саламыз. Қазіргі уақытта мемлекеттік корпорацияда әртүрлі лауазымдарда 21 мыңнан астам адам жұмыс жасайды.

 
0
0
407

Азаматтарға арналған үкімет «Мемлекеттік тіл – тәуелсіздік нышаны» атты республикалық конкурстың қорытындысын жариялады

Конкурсқа облыстар, Астана мен Алматы қалалары филиалдарының арасында өткізілген облыстық конкурстардың қатысушылары қатысты. Үшінші орынға Жамбыл облысы бойынша «Халыққа қызмет көрсету орталығы» департаментінің маманы Айжан Баялиева, екінші орынға Алматы облысы бойынша «Әлеуметтік төлемдерді ведомствоаралық есептеу орталығы» департаментінің маманы – Дархан Болатов, ал бірінші орынға Оңтүстік Қазақстан облысы бойынша «Халыққа қызмет көрсету орталығы» департаментінің маманы  - Пернехан Досан ие болды. Ол мемлекеттік тіл туралы өзі шығарған патриоттық әсерлі  туындысымен әділ қазылар алқасының есінде ерекше сақталып қалды.

«Біздің конкурс 5 кезеңнен тұрды, бұл – дәстүрлі өзін-өзі таныстыру, мақал-мәтелдер сайысы, өнер сайысы, интеллектуалдық сұрақтар және де мемлекеттік тілде құжаттар дайындау. Өйткені біздің басты мақсатымыз – мемлекеттік қызметтерді сапалы көрсету. Барлық үміткерлер конкурсқа аса жауаптылықпен қарады, дегенмен ең мықтысы жеңіске жетті», - деп атап өтті Басқарма төрағасының орынбасары Медет Құмарғалиев.

Құмарғалиевтің айтуынша, конкурстың қазылар алқасының құрамы ҚР Ақпарат және коммуникациялар министрлігінің, Қазақстан Республикасы  Мәдениет және спорт министрлігінің Тілдерді дамыту және қоғамдық-саяси жұмыс комитетінің, «Нұр Отан» партиясының, үкіметтік емес ұйымдардың өкілдерінен және т.б. тұрды.

«Бүгінгі күні мен «Азаматтарға арналған үкімет» мемлекеттік корпорациясын республикадағы негізгі мекемелердің біріне жатқызамын, себебі сіздер қызметтер көрсету кезінде адамдармен үнемі қарым-қатынаста боласыздар. Мен қазақ тілі саласындағы маманы ретінде аталған конкурсты – маңызды және өте дұрыс іс-шара деп айта алам. Меніңше, осы іспеттес шараларды ұлттық компанияларда, акционерлік қоғамдарда, үкіметтік емес ұйымдарда, тіпті мемлекеттік органдар да өткізіп тұрудың пайдасы зор, - деп атап өтті Қазақстан Республикасы  Мәдениет және спорт министрлігінің Тілдерді дамыту және қоғамдық-саяси жұмыс комитетінің Тіл саясатын талдау және мониторинг басқармасының басшысы Толқын Жолдыбайқызы Исақова.

Бұл орайда, конкурстың жеңімпаздарына естелік сыйлықтар берілгендігін атап өту керек.

«Мен қазақ тілінің мәртебесін асқақтатып жүргеніме және Оңтүстік Қазақстан облысының атынан осыны тағы бір мәрте дәлелдей алғаныма аса қуаныштымын» дейді конкурстың жеңімпазы Пернехан Досан.

«Мемлекеттік тіл – тәуелсіздік нышаны» атты республикалық конкурсының Қазақстан Республикасы Тәуелсіздігінің 25 жылдығына және жыл сайын Қазақстанда               ҚР Тілдер күніне орайластырылып өткізілгендігін еске саламыз.

 
0
0
429

Қазақстандық компаниялар халықаралық конференцияда өз тәжірибелерімен бөлісті

Бурятияда «Ресей мен Еуразия елдерінің зейнетақы реформалары: проблемалар мен шешімдер» тақырыбында конференция өтті. Қазақстанды «Азаматтарға арналған үкімет» КЕ АҚ, «Мемлекеттік әлеуметтік сақтандыру қоры» АҚ және «Бірыңғай жинақтаушы зейнетақы қоры» АҚ білдірді. Біздің еліміз үшін басқа елдердің халыққа қызмет көрсетудегі тәжірибелерін зерттеу мүмкіндігі ерекше назарда болды.

Қатысушылардың баяндамаларынан байқалғандай, көптеген республикаларда зейнетақымен қамтамасыз етудің ортақ жүйесі әрекет етеді, ал жинақтаушы компонент - тек даму сатысында ғана. Қатысушы елдердің күрделі экономикалық жағдайларын ескерсек, зейнетақы төлеудің барабарлығын қамтамасыз етуде проблемалар туындайды.

Форумда Бурятия Республикасы электронды мемлекеттік қызметтерді енгізу бойынша РФ зейнетақы қоры арасында алдыңғы қатарда тұрғаны атап көрсетілді. Басқа өңірлер үлгі ретінде Бурятия Зейнетақы қорының орталықтандырылған  зейнетақы төлеуді тағайындау тәжірибесін алып, қазір оны зерделеуде.

Сонымен қатар, Бурятияда ұжымның қолайлы микроклиматын жасауға бағытталған іс-шаралар белсенді түрде жүргізілуде. Мәселен, кәсіподақ қаражаты есебінен (жарналар жалақының 2%-ын құрайды әрбір өңірде психологиялық жеңілдену бөлмесі, тренажер залы, би, йога залы ұйымдастырылған. Жыл сайын ұжымның кадрлық-психологиялық аудиті жүргізіледі. Жұмысқа қабылдағанда психологтың кеңесі міндетті түрде қажет. Сондай-ақ қызметкерлер, зейнеткерлер арасында спартакиадалар ұйымдастырылады. Мұндай тәжірибе көптеген қазақстандық компанияларға пайдалы болуы мүмкін.

Қазақстан Рспубликасында мемлекеттік қызет көрсетудің бірыңғай провайдерінің тәжірибесімен «Азаматтарға арналған үкімет» мемлекеттік корпорациясының атынан мемлекеттік корпорацияның Стратегиялық жоспарлау және даму департаментінің директоры  Әлия Оспанова бөлісті. Ол ағымдағы жылғы сәуірде көп сұралатын мемлекеттік қызметтерді біріктірген және құрамына төрт мемлекеттік кәсіпорынды: халыққа қызмет көрсету орталығы, жылжымайтын мүлік орталығы, зейнетақы төлеу жөніндегі мемлекеттік орталық және жер кадастры ғылыми-өндірістік орталығы кіретін «Азаматтарға арналған үкімет» мемлекеттік корпорациясы құрылғанын айтты. Сондай-ақ мемлекеттік корпорацияға еліміздің аумақтық ерекшеліктерін ескере отырып, мысалы халыққа, оның ішінде шалғай елді мекендердің тұрғындарына мемлекетік қызмет көрсетудің қолжетімділігін қамтамасыз ету бойынша Елбасы қойған міндеттерді орындау шеңберінде, мемлекеттік корпорацияда жұмыс істейтін, халыққа мемлекеттік қызметтерге қолжетімділікті қамтамасыз етуге мүмкіндік беретін 70 Мобильді халыққа қызмет көрсету орталықтары секілді әртүрлі ноу-хаулармен бөлісті. «Ауылдарға бару кезінде тұрғындар тек мемлекеттік қызметтерді алып қана қоймайды, сондай-ақ әлеуметтік көмек, жұмыспен қамту және жаңа мамандандықтарға оқыту мәселелері бойынша кеңестер  алады», - деп атап көрсетті Әлия Оспанова. Қазақстаннның шалғайдағы елде мекендердің тұрғындарына мобильді ХҚКО құру арқылы мемлекеттік қызметтерді көрсету тәжірибесі форумға қатысушылардың қызығушылығын тудырды.

Конференцияда мемлекеттік корпорацияның Қазақстанда Мемлекеттік корпорацияны құру тәжірибесін енгізу және тәжірибе алмасу бойынша ақпараттық-консультативтік пен әдістемелік қолдау көрсету аясында барлық елдермен өзара тиімді ынтымақтастыққа дайын екендігі атап көрсетілді.

Форумды ұйымдастырушы Халықаралық зейнетақы және әлеуметтік қорлар қауымдастығы (ХЗӘҚҚ) болды. Оның құрамына ТМД 10 елінің және Грузияның мекемелері кірді. Форумда Ресейдің, Белорусьтің, Бурятияның, Молдованың, Тәжікстанның, Грузияның, Қырғызстанның, Монғолияның және Өзбекстанның делегациялары қатысты. Сондай-ақ «Газфонд» мемлекеттік емес зейнетақы қорының, «Еңбек министрлігінің еңбек және әлеуметтік сақтандыру ҒЗИ» ФМБМ, «Зейнетақы журналының редакциясы» ЖШҚ, «РотаК» ЖШҚ, «Мемлекеттік әлеуметтік сақтандыру  қоры» АҚ, «Бірыңғай жинақтаушы зейнетақы қоры» АҚ және Халықаралық зейнетақы және Халықаралық зейнетақы және әлеуметтік қорлар қауымдастығының өкілдері қатысты.

«Азаматтарға арналған үкімет»

мемлекеттік корпорациясы» КЕ АҚ

баспасөз қызметі

 
0
0
380

Т. Дүйсенова тұрғындардың медициналық сақтандыру жөніндегі өзекті сауалдарына түсініктеме берді

Жуырда міндетті әлеуметтік медициналық сақтандыруды (әрі қарай – МӘМС) енгізу бойынша Ақтөбе, Алматы және Атырау облыстарының аймақтық штаб мүшелері үшін селекторлық тәртіпте өткен семинарда ҚР Денсаулық сақтау және әлеуметтік даму Министрі Тамара Дүйсенова халықты, жұмыс берушілерді, медициналық қызметкерлерді толғандырған бірқатар сұрақтарға түсініктеме берді.

Аймақтардың өкілдері медициналық сақтандыру пациенттердің дәрілік заттар шығынын өтей ме, МӘМС аясында оралмандар үшін медициналық қызметтер пакеті қарастырылған ба, ауылдық денсаулық сақтау саласын қандай жаңалықтар күтіп тұр, өзін өзі өнімсіз еңбекпен қамтыған азаматтар және жұмыс істейтін зейнеткерлердің Медициналық сақтандыру қорының жарнасын төлеу тәртібі және жаңа жүйеде ведомстволық медициналық ұйымдар қалай жұмыс істейтіні жөнінде сауалдар қойды.

Алматы облысы аймақтық штаб мүшелерінің МӘМС жүйесіндегі дәрілік қамсыздандыру бойынша сұрақтарына жауап берген Тамара Дүйсенова МӘМС-ті енгізген уақытта амбулаторлық деңгейде дәрілермен қамсыздандыру Медициналық сақтандыру қорының қаражаты есебінен жүргізілетінін айтты. Сонымен бірге, ол бірқатар аурулар бойынша дәрілік көмекті жақсарту мен оның аясын кеңейту мәселелері қарастырылатынын хабарлады.

Ауылдық медицина мәселелерін қарастыра келе, ҚР ДСӘДМ басшысы аудандық медициналық ұйымдар бір заңды тұлғаға біріктірілетіні жоспарланғанын айтты. Ол өз кезегінде Медициналық сақтандыру қорымен келісім шарт жасайтын болады. Құжатта халыққа көрсетілетін қызметтердің барлық шарттары, оның ішінде қызмет көрсетудің сапасын бағалау белгілері көрсетіледі.

Аудиториямен әңгімелесу барысында Тамара Дүйсенова мемлекеттің құрамына 17 миллион қазақстандықтарды вакциналау, әлеуметтік маңызы бар ауруларға көрсетілетін медициналық көмек және шұғыл медициналық көмек қызметтері кіретін тегін медициналық көмектің кепілдік берілген көлемі пакетінің аясында медициналық қызметтермен қамтамасыз ету бойынша қаржыландырудың бүгінгі таңдағы бар көлемін сақтап қалатынын атап айтты. Сақтандыру медицинасы жүзеге асырылған жағдайда мемлекет Медициналық сақтандыру қорына халықтың әлеуметтік тұрғыдағы осал тобының 10,1 млн. азаматы үшін жарнаны төлеу міндеттемесін өз мойнына алады.

Министр көпшіліктің көкейінде жүрген МӘМС жүйесіне өзін өзі өнімсіз еңбекпен қамтыған азаматтардың қатысуы туралы сауалға толыққанды жауап берді.

Оның айтуынша, өзін өзі өнімсіз еңбекпен қамтыған азаматтар үшін мемлекет 2020 жылға дейін жоспарлы госпитализациядан басқа барлық медициналық көмек пакетін ұсынады. Аталған уақыт ішінде осы санаттағы адамдарға МӘМС жүйесіне қатысудың 3 нұсқасының біреуін таңдаулары қажет: біріншісі – жұмыссыз ретінде тіркелу; екіншісі – жеке кәсіпкер ретінде тіркеліп, мәлімденген кірістен немесе ол болмаған жағдайда ең төменгі жалақыдан жарна төлеу; үшіншісі – екінші дәрежедегі банктер арқылы жеке тұлға ретінде ең төменгі жалақыдан 2% көлеміндегі жарна енгізіп тұру.

Медициналық сақтандыру қорына ең төменгі жарна төлегеннің өзінде азаматқа қымбат медициналық қызмет (мәселен, құны 1 млн-нан астам жүрекке жасалатын ота) түрлері көрсетілетін болады.

Бұрындары хабарланғандай, ағымдағы жылғы 19 қыркүйекте Тамара Дүйсенова Батыс Қазақстан облыстары, 21 қыркүйекте Шығыс Қазақстан, Павлодар, Қарағанды, Маңғыстау облыстарының, 22 қыркүйекте Қызылорда, Оңтүстік Қазақстан, Қостанай және Солтүстік Қазақстан облыстарының аймақтық штабының мүшелері үшін семинар өткізді.

Оқыту шаралары аяқталған соң, аймақтық штаб мүшелері 1 қазаннан бастап халық арасында түсіндіру жұмыстарын бастайды. Олар жұмыс берушілермен, кәсіпорындар мен ұйымдардың еңбек ұжымдарымен, бюджеттік сала қызметкерлерімен, ҮЕҰ және кәсіподақ ұйымдарының өкілдерімен, сонымен қатар, ауылдық жерлердегі түрғындармен кездесулер өткізеді деп күтілуде.

   
0
0
393

Ағын видеоның (стрим) Youtube видеомен салыстыру

 

1. Twitch деген не?

Қазіргі кезде, ақпарат жеткізу жолдары көбейеді. Көптеген адамадар кез келген тақырыпқа Youtube қызметінен көптеген видеоларды таба алады. Бұл теледидардай ұқсас алдын ала жазылған видео болып табылады. Бірақ телевидениеде тікелей эфир бар. Сондықтан тікелей эфирдің онлайн баламасы болу үшін Twitch деген платформасы бар. Осы платформада алушыға видео 10 секундтан 30 минутке дейін кідіріспен жеткізіледі.

 

2. Әр қызметінің артықшылықтары мен кемшіліктері

Twitch қызметінің басты басымдығы тыңдаушылармен тілдесуі. Кідірісі кішкентай болған соң, автор не істемесе де, тыңдаушылар көрсетілген видеоға ойларын бірден жаза алады (чат арқылы). Демек, автор аудиторияның қалауларын тез түсіне алады. Авторда видеоны түсіру үшін тек бір ғана мүмкіндік болған соң, оның сөйлеудің қабілеттері бірден көрінеді. Қойылған сұрақтарға көп ойлану уақыт болмағандықтан, жауаптары да көбінесе шынайы деп санауға болады. Дәл қазір болп жатқан оқиға туралы көру өте қызықты.

Ал Youtube-ты алсақ, мұндай сұхбат құрыла алмайды. Автор өз видеосына көптеген түсініктерді оқып, барлығына жауап беруі мүмкіндік көп емес. Бірақ дәл осы сәтте тыңдаушыларға бір нәрсені айтып берудің қажеті жоқ. Айтылған және көрсетілген мазмұн туралы ойлау уақыты көп. Қай жағынан көрсен де сапасы жоғарырақ. Бұған қоса мазмұнның бәрі сақталынады. Көрерменге де аса ыңғайлы. Видеоны тоқтатып, соңырақ қайтадан көре алады. Тікелей эфирді кім тоқтата алады?

 

Сондықтан екі қызметінің өз артықшылықтары бар. Екеуін қоса қолданысы керемет нәтижені береді.

2
0
753

«Мафия» ойны махаббатқа жеткізеді.

"Жұма. Сағат кешкі 6:00. Таңертеңнен бастап кешке дейін университетте жүріп, қатты шаршадым. Сонымен қоса, түсте болған зертханалық жұмыстың кезінде керекті нәтижелер де шықпай, көңіл күйім түсіп кетті. Ендігі арманым бөлмеге барып, өзімнің жұмсақ, түймедақтың иісі бар төсегімде рақаттанып демалу. Алайда, менің қарным аш, сондықтан жатаханаға барып, тамақ дайындап, қарынды тойдырып алу керек.

Сағат кешкі 8:00. Ерінгендіктен оңай әрі тез дайындалатын етсіз қуырылған картопқа тойып алдым. Енді не істесем болады екен? Үй жұмысын істейін бе әлде кино көріп, жұманың кешкі уақытында демалып, барлығын ертеңге қалдырайын ба? Біраз ойланып, химияны оқуға шештім, өйткені сейсенбі күні емтихан болады.

23:00. Химияның жиырма алтыншы бөлімін бітіріп, шамалы тынығуды ойладым. Сол себепті ноутбукты қосып, "Вконтакте" желісінде отырайын дедім. Енді ғана ноутбугымды қоссам, Айнұр ұялы телефоныма қоңырау шалып, жатахананың атриумында "Мафия" ойнын ойнауға шақырған болатын. Біраз кідіріп, ойнауға бел будым. Үсті-басымды бір қарап өтіп, түрімді қалпына келтіріп, бөлмеден шықтым.

"Мафия" ойнағанамызға екі сағаттай болды. Ержан есімді бала менен көз алмай, тесіле қарайтындай көрінеді. Өзім негізінде ұялшақ қыз баламын, сондықтан өзімді ыңғайсыз сезіндім. Білмеймін не себепті маған қарай беретінін, "Мүмкін, шашым тікірейіп тұр? Әлде сабақ оқығанда қаламмен бетімді сызып жібердім бе?" -деп, Айнұрдың артына тығыла бердім.

Сенбі. Сағат түскі 12:00. "Вконтакте" желісіне кіріп, қандай жаңалықтар бар екенін көрейін дедім. Кірсем, кешегі Ержан мені күзеткендей, мені желіде екенімді көрген соң ба әлде кездейсоқ болған нәрсе ме, білмеймін, бірақ ол маған дереу хат жіберді:

-Сәлем, Айым! Ұйқыдан тұрдың ба?

-Cәлем, Ержан. Тұрмасам, осылай желіде отыратын бе едім?

-Ха-ха-ха! Не жауап берерімді білмей қалдым ғой. Шындығында, саған айтатыным бар. Айым, сен маған қатты ұнап қалдың.

Осы сөздерді оқи отырып, не істерімді білмей қалдым. Бір көргеннен ұнатып қалуға бола ма? Ол мені дұрыс танымайды да ғой. Қалжың шығар. Ал шынымен де ұнатып қалған болса ше? Жоқ, ол мүмкін емес.

-Айым, үндемей кеттің ғой. Күтпеген жағдай болды ғой саған. Сен шамалы осы оймен қала тұр, кешкісін сені қыдыруға алып кетемін. Қай бөлмеде тұратынынды біліп алдым. Кешкі 8:00-де келемін, ал сен дайын бол,-деді де Ержан, желіден шығып кетті. Ал мен болсам, сөзсіз қалып, не істерімді білмей отырмын".

Кеш батқаннан бастап, осы әңгімені компьютерімде тере отырып, өзімді Ержанның орнына қоюға тырыстым. Маған ұнап қалған адамға сезімімді бірден білдіре алар ме едім деген ойлар пайда болды. Шынымен де, өз сезімін біреуге білдіріп көрсету немесе тура бетке айту қиынға соғады. Не себепті олай екен? Мәселе адамның психологиясында жатқан шығар. Біріншіден, адам өз сезімін біреумен бөліскен кезде, сол адамнан сондай сезімдерді күтеді, бірақ жүрегінде қорқыныш сезімі ұялайды. Оған себеп-адам өз бетінің қайтарылып тастауынан болатын үрей. Екіншіден, адам өзіне ұнайтын адамына жүрегін ашқанда, өзінің де, сол адамның сезімдері үшін де жауапкершілікті алады. Мысалы, ол өзінің махаббатында толығымен сенімді болмаса, ал екінші адам оған ғашық болса, ол осы жағдайды болдырған үшін жауапты. Үшіншіден, адам өзінің бақытына сенбейді немесе бақыты шексіз болмайтынын ойлайды. Сол себепті, адам өзінің тыныштығын ойлап, сезімдерімен бөліспейді. Алайда, ол шын бақытын тапқанын уақытылы түсінбей, кейін өкінуі әбден мүмкін. Сондықтан, адам ештеңеден қорықпай, тәуекелге баруы қажет деген пікірлер туғызды. Кейін өз жайыма келіп, үстелімнің үстінде тұрған лимоны бар қантсыз қара шайымды ішіп, аузыма кәмпитті салып, жұтып жібірдім. Сосын келесі сөздерді тердім: "Автор: Диас". Қыздарға арналған онлайн журналдың редакторы болғаныма қайтадан ұялып, бас редакторға үшінші беттің үлгісін жібердім.

Біраздан соң өзіме досым Жасұлан қоңырау шалып, «Мафия» ойнауға шықырды...

 
2
2
779