АСТАНА. ҚазАқпарат — Қазақстанның бокс құрамасы Астанада өткен төрт ел турнирiнiң жеңiмпазы атанды.

Соңғы кездесуде бүгiн ұлттық құрама Ресей командасымен жұдырықтасып, 7:3 есебiмен басым түстi. Бұның алдында қазақстандық боксшылар Өзбекстан құрамасын 7:3 есебiмен, Ұлыбритания командасын 8:2 есебiмен тiзе бүктiрген болатын.

Құрама командалардың қатарында әлем чемпионаттарының бiрнеше дүркiн жүлдегерлерi, өз елдерiнiң ең мықты боксшылары кiргенiн айта кетейiк. Қазақстан сапында Бiржан Жақыпов, Ерлан Тамемов, Қайрат Ералиев, Берiк Әбдiрахманов, Алмасбек Әлiбеков, Айдар Әмiрзақов, Данияр Елеусiнов, Сапарбай Айдаров, Әдiлбек Ниязымбетов, Жан Кособуцкий сынды спортшылар өнер көрсеттi.

Автор: Жасұлан Жолдыбаев

Басты сөздер: Спорт

СОЧИ. ҚазАқпарат — Қазақстандық шаңғышылар Алексей Полторанин мен Николай Чеботько Сочидегі Қысқы Олимпиада ойындарында командалық спринт бойынша 8-орынға табан тіреді, деп хабарлайды «ҚазАқпарат» агенттігінің тілшісі.

Олар 6 айналымдық жарыс жолында 24:01.38 уақыт көрсеткішімен мәре сызығын кесті.  Бұл сында 23:14.89 үздік уақыт көрсеткен Финляндия спортышларының мерейі үстем болды. Күміс медаль Ресей спортшыларына бұйырды, ал үшінші орынға шведтер жайғасты.

Еске сала кетейік, 2013 жылы Италияда өткен әлем чемпионатында қазақстандық қос шаңғышы командалық спринтте қола медаль иеленген болатын. Сочиде осы сында 23 команда қатысты.

Автор: Жасұлан Жолдыбаев

Басты сөздер: Олимпиада , Спорт

СОЧИ. ҚазАқпарат — Қазақстандық команда биатлоннан аралас эстафета бойынша 15-орын алды, деп хабарлайды «ҚазАқпараттың» тілшісі.

Онда екі қазақстандық спортшы Елена Хрусталева мен Дарья Усанова алты шақырымды жүріп өтіп, эстафетаны 7,5 шақырымда жалғастыратын  Ян Савицкий мен Антон Пантовқа беру керек.

Алтын жүлдеге бұл сайыста норвегиялықтар ие болды. Күміс жүлдені чехтар иеленсе, қолаға итальяндықтар қол жеткізді.

 

Басты сөздер: Олимпиада , Спорт

Басты сөздер: Спорт

АСТАНА. ҚазАқпарат — 28 жасар қазақстандық конькиші Дмитрий Бабенко Сочидегі Ақ Олимпиаданың 10 шақырымдық жарыс жолына шығып, 12-орынға табан тіреді, деп хабарлайды «ҚазАқпарат» тілшісі.

Ол бұл сайыста 13 минут 33,18 секунд көрсеткішімен мәре сызығын кесіп, көшбасшыдан 48,73 секундқа қалып қойды. Барлық мінбеге голландық конькишілер мінді. 12 минут 44,45 секунд уақытымен  олимпиадалық рекордты жаңартқан Йорит Бергсма бірінші орын алса, Свен Крамер күміс жүлдені қанжығасына байлады. Тағы бір Голландия спортшысы Боб де Йонг үшінші орынға ие болды.

Бұның алдында Д.Бабенко 5000 метрлік қашықтықта 15-орын, 1500 метрлік сайыста 30-орынға табан тіреген болатын.

Автор: Жасұлан Жолдыбаев

Басты сөздер: Олимпиада , Спорт

СОЧИ. ҚазАқпарат — 23 жасар шорт-трекші Инна Симонова Сочи Олимпиадасында 1000 метрлік жарыстың жартылай финалына өте алмады.

Ол екінші төрттік құрамында Корея, Польша және АҚШ спортшыларымен бірге жарыс жолына шыққан болатын. Сайыстың орта тұсында америкалық Эмили Скотт пен польшалық Катерина Новотка бір-біріне соғылып құлап қалды. Иннаға екінші орын алып, келесі турға өту мүмкіндігі туды. Алайда жерлесімізді америкалық спортшы басып озып, мәреге екінші келді. Жартылай финалға кореялық Сын Хи Пак пен Эмили Скотт өтті.

Симонова Олимпиадада 500 және 1500 метр шақырымдық жарыстарға қатысқан болатын. Дегенмен ол сайыстарда жүлделі орынға іліккен жоқ.

 

Автор: Жасұлан Жолдыбаев

Басты сөздер: Спорт , Олимпиада

АСТАНА. ҚазАқпарат -  Жарақатына байланысты Сочи Олимпиадасындағы бәсекесін тоқтатқан ресейлік мәнерлеп сырғанаушы Евгений Плющенко спортқа қайта оралмақ ниетте.

«Қазір мен жарысты жалғастыруды ойлап жүрмін. Бесінші Олимпиадаға қатыспаймын деп үзілді-кесілді айтпаймын»,- деді Плющенко «Бірінші арна» эфирінде.

Еске сала кетсек, Плющенко жарақатына байланысты Олимпиададағы бәсекесін тоқтатқан  еді. Екі дүркін олимпиада жеңімпазы қысқа бағдарлама бойынша жарысқа шығар алдында арқасын жарақаттап алды. Сол күні ол өзінің спорттық мансабын аяқтағандығын мәлімдеген болатын.

Басты сөздер: Әлем