Yvision.kz
ru
userfacebook2497917000461409

userfacebook2497917000461409

Сайтта 4 ақпан 2020

250

рейтинг

8

жазбалар

0

пікірлер

0

тіркелуші

33

жазылымдар

  • 0

    Құран аяттарымен емдеу

    Алла Тағала күллі адамзатты: «Ей, адамдар! Тәңірлеріңнен сендерге насихат, жүректеріңдегі дерттеріңе дауа, мұсылмандарға тура жол және жарылқау ретінде Құран келді» («Юнус» сүресі, 57-аят.), «Біз Құраннан имандылар үшін шипа және мейірім түсіреміз» («Исра» сүресі, 82-аят.), – деп сүйіншілейді.

    Жүрек Құранмен тазарады, тыныштық табады, көркем мінез-құлыққа бастайды. Кейбір адамдар тәкәппарлық, қызғаныш, күншілдік, қанағатсыздық, құмарлық, екіжүзділік, күйзеліс секілді жүрек ауруларына шалдығып, емделу шараларын қарастырып, психологтардың есігін қағып жатады. Асылында, мұндай науқастың дәрігерлері – Пайғамбар (с.ғ.с.) мен ізгі ғалымдардың жолын ұстанушылар екенін ұмытпайық. Алланың сөзі Құран – дәрі-дәрмек секілді.

    Дәріні уақытынан кешіктірмеу әрі дәрігерлер бұйырғандай етіп қабылдаудан дертіңізден оп-оңай айығасыз. Егер мұсылман Құранды Алла разылығы үшін оқитын болса, Құран аяттары оның тәніндегі дерттерге өздігінен шипа бола береді. Дегенмен, дем салып емдеуге болатын бірнеше сүрелер мен аяттар да нақтыланған. Мәселен, Пайғамбарымыз (с.ғ.с.): «Қайыры ең көп болған сүре – Фатиха, барлық дертке дауа», (Бәйһақи)– деген болатын. Алла Елшісінің (с.ғ.с.) сахабалары да, одан кейінгі ізгі мұсылмандар да «Фатиха» сүресімен емделген екен. Егер адам ешбір қателіксіз, тек қана сүннетте келгендей Құран сүрелерімен дұрыс емделетін болса, тән ауруларынан да айығады.

    Пайғамбарымыз Мұхаммед (с.ғ.с) «О, Алланың пенделері! Емделіңдер, өйткені Алла Тағала кәріліктен басқа кеселдің бәріне де шипалы ем жаратқан» деген (Хадис 549). Алланың хақ сөзі жазылған киелі Құранда ауру-сырқауға шипа болатындығы туралы аяттар жазылған. Атап айтқанда: Тәуба сүресі 14; Юнус сүресі 57; Исра сүресі, 82; Фуссилат сүресі, 44; Шуара сүресі, 80; Нахл сүресі 69 аяттары шипа болатындығы туралы айтылған. Бұл асыл аяттар материалдық және адамның рухани жағдайының сауығуына себепші болады деп көрсетілген. Қасиетті Құранда: «Ауырсам, Ол (Алла) маған шипа береді» («Шұғара» сүресі, 80-аят) деп жазылуы шипаны тек Ұлы Жаратушыдан сұрау керектігін айтқан.

    «Исра» сүресінің 82-аятында: «Мүміндерге рақымы, шипасы бар Құранды түсіреміз. Залымдардың шеккен зияны арта түседі» делінген. Бұл жерде Құранның шипалық қасиеті айтылып тұрғандығын байқаймыз. Құранның шипа боларлық асыл қасиеті туралы ислам ғалымдары да көптеген толғамдарын қалдырған. «Дауаның ең қайырлысы – Құран» (Ибн Мажә, Тыбб, 28), «Мына екі нәрсеге көңіл бөліңдер: Құран және бал» (Ибн Мажә, Тыбб ), «Құранмен шипа іздемеген адамға Алла шипа бермейді» (Рази, Тәфсир, ХХІ, 34 б.) делінгені осының айқын дәлелі. Хадистерде: «Фатиха сүресі не үшін оқылса да оған пайдасы тиеді. Онда әртүрлі дауа бар» (Ажлуни, Кәшфул-Хафа, ІІ, 106-108 бб.) деп, Құранның дертке дауа боларлық асыл қасиетін ерекше бағалап, нақтылап айтқан.

    Нақты мысалдарды айтатын болсақ: Сахаба Әбу Сайд әл-Худри бірде жылан шаққан бір адамға Фатиха сүресін оқып, оны емдегені туралы айтылады. (Куртуби, Тәфсир Х, 312 б.) осыған қарап отырып, Құран аяттарын оқи отырып, дем салу, шипа ретінде оқу маңызды саналғандығын байқауға болады. Шипалық аяттар туралы Алла Елшісі пайғамбарымыз (с.ғ.с): «Дауаның ең қайырлысы – Құран» (Ибн Мажә, Тыбб, 28), «Мына екі нәрсеге көңіл бөліңдер: Құран және бал» (Ибн Мажә, Тыбб ), «Құранмен шипа іздемеген адамға Алла шипа бермейді» (Рази, Тәфсир, ХХІ, 34 б.) деп анық айтып өткен.

    Халқымыз бағзы заманнан бері қасиетті Құранды шипалық ретінде пайдаланып келген. Ата-бабаларымыз ауырып-сырқаған адамдарға Аллаға шынайы ниетімен сыйынып, дем салатын болған. Демек, бабаларымыз Алланың ақ сөзінен дертке шипа іздеп, сырқатынан Құран арқылы айығып келгендігін білеміз. Алланың асыл сөзі адамды сақтаушы деп білу абзал болады.

    Нариман ИСЕНОВ

    «Нұр Астана» мешітінің наиб имамы

    © ummet.kz Толығырақ: https://ummet.kz/makalalar/344-makalalar/11248-kuran-ayattarymen-emdeu.html

    0
    2098
    0
  • 0

    Мемлекет басшысы Әзірет-Сұлтан мешітіне барды

    Қасым-Жомарт Тоқаев Әзірет-Сұлтан мешітіне барып, Қазақстан мұсылмандары діни басқармасының жаңадан сайланған бас мүфтиі Наурызбай қажы Тағанұлымен кездесті. Қазақстан Президенті бас мүфтиді жаңа лауазымымен құттықтап, алдағы қызметіне табыс тіледі, деп хабарлайды Ақорда баспасөз қызметіне сілтеме жасаған ummet.kz тілшісі.

    Кездесу барысында елдегі татулық пен тұрақтылықты сақтау, дін арқылы азаматтарды келісім мен ынтымаққа шақыру, рухани бағдар беру қажеттілігі мен жат діни ағымдардың зиянды әрекеттері жайында айтылды. – Халықты татулыққа, бірлікке, пәтуаға шақыру керек. Қазіргі уақытта дүние жүзінде әртүрлі жат үдерістер пайда болып жатыр. Сондықтан бұған тыйым салып, жол бермеуге тиіспіз.

    Ел мүддесіне қызмет етіп, осы бағытта дұрыс үгіт-насихат жұмыстарын жүргізу қажет, – деді Қасым-Жомарт Тоқаев. Наурызбай қажы Тағанұлы Мемлекет басшысына Қазақстан мұсылмандары діни басқармасының алдағы ақпараттық және ұйымдастырушылық жұмыстары мен қайырымдылық шараларының жоспарын таныстырды. Басқарма жұмысы имандылық, отаншылдық, білімділік, ауызбіршілік, еңбекқорлық, мәдениеттілік және әділдік сияқты жеті рухани қазыққа негізделмек.

    © ummet.kz Толығырақ: https://ummet.kz/news-kz/20-el-ishy/11251-memleket-basshysy-aziret-sultan-meshitine-bardy.html

    0
    220
    0
  • 0

    Пара алу – ауыр күнә

    Бұл лауазымды тұлғаның басқа бір тұлғадан лауазымына қатысты көрсететін қандай да бір қызмет түріне берілетін ақша немесе өзге игіліктерді алуы. Бұл жағдайда көрсетілген ақша мен игіліктерді әрдайым парақордың жеке өзі алмайды, оларды көбіне оның жақын адамдарына немесе жасанды жалған ұйымдарға ұсынады.

    Пара деп саналатын нәрселер: ақша, оның ішінде валюта, банк түбіртектері мен құнды қағаздар, бағалы металдар мен асыл тастардан жасалған бұйымдар, автокөліктер, пәтерлер, саяжайлар мен қала сыртындағы үйлер, тұрмыстық техника мен аспаптар, өзге тауарлар, жер учаскелері және өзге жылжымайтын мүлік т.б. саналады. Ислам шариғатында жемқорлықтың үкімі харам. Яғни, үзілді-кесілді тыйым салынған үлкен күнәлар қатарына жатады. Бұл жөнінде Қасиетті Құран Кәрімде: «Олар өтірікке құлақ салушы, арам жеушілер. (Мұхаммед Ғ.С.) егер олар саған келсе, араларына үкім бер, немесе олардан жүз бұр. Егер олардан жүз бұрсаң да, олар саған ешбір зиян бере алмайды. Ал егер араларына үкім берсең, тура үкім бер. Шәксіз Алла турашыларды сүйеді»,-деген [1].

    Және мына аятта Алла Тағала айтады: «Уа, мүміндер! Алла Тағаладан қорқыңдар. Әркім ертең үшін не жібергеніне қарасын. Алла Тағаладан қорқыңдар. Шәксіз Алла Тағала не істегендеріңді толық біледі. Сондай Алланы ұмытқан, Алла Тағала оларға өздерін ұмыттырған кісілер тәрізді болмаңдар. Міне солар бұзақылар» [2]. «Араларыңдағы малдарыңды бұзық жолмен жемеңдер. Сондай-ақ біле тұра адамдардың малынан бір бөлігін жеу үшін билерге апармаңдар» [3] деген.

    Сондай-ақ, ардақты Пайғамбарымыз Мұхаммед (Алланың оған игілігі мен сәлемі болсын) былай деген: «Алла Тағала пара берген және параны алғанды лағынеттеді» [4]. Зұлымдық ету мақсатында пара беру ауыр қылмыс әрі күнә. Сонымен қатар түрлі істі бітіру мақсатында пара беруге де болмайды. Бірде Пайғамбарымыз (Алланың оған игілігі мен сәлемі болсын) Абдуллаһ ибн Рабаханы (Алла одан разы болсын) яһудилерге жібереді. Олар құрма бақтың салығын төлеуі тиіс еді. Сонда яһудилер Абдуллаһты (Алла одан разы болсын) параға жыққысы келіп, оған түрлі сыйлық ұсынады. Олардың бұл ісіне ол: «Сендердің параларың заңсыз. Сондықтан біз оны қабыл етпейміз», - деп жауап береді [5].

    Жалпы, жемқорлыққа алып баратын пара тіленушілік қоғамды бұзады. Пара жүрген жерде әділетсіздік әділ орнына қабылданып, тыйым салынған нәрсеге рұқсат етіледі және әділетсіз шешім шығарылады. Залымдар істі өз пайдасына шешу мүмкіндігіне қол жеткізеді. Пара жүрген жерде жауапкершілік деген болмайды. Ислам параның қандай түріне болмасын тыйым салады. Тіпті сыйлық ретінде берілген параның өзі харам [6]. Ата-бабаларымыз «Аз болса да берекесін берсін», «Қанағат қарын тойғызар», - деп босқа айтпаған, харам мен күмәнді нәрселерден бойымызды аулақ ұстауға насихаттаған. Демек, дүниеқорлыққа бой алдырып, діндегі тыйымдарды ескермеуге болмайды.

    Әрбір жанұяда береке болса, қоғамда береке болады. Ал жемқорлыққа қарсы күресті – әрбір жан өз отбасынан бастап, ұрпаққа дұрыс тәрбие беріп, сыбайлас жемқорлықтың тамырына балта шабар – имандылықты ұстануы қажет.

    Бақдаулет Абдурахманов,

    «Нұр Астана» мешітінің наиб имамы.

    [1]. Мәида сүресі, 42-аят.

    [2]. Хашр сүресі, 18-19-аят.

    [3]. Бақара” сүресі, 188 аят.

    [4]. Имам Бухари, Имам Муслим.

    [5].Имам Малик.

    [6].ҚМДБ Шариғат және пәтуа бөлімі.

    © ummet.kz Толығырақ: https://ummet.kz/makalalar/344-makalalar/11225-para-alu-auyr-kuna-2.html

    0
    282
    0
  • 0

    Үлкенге – құрмет, кішіге – ізет

    Қазақта сұлтан, батырлармен қатар барлық жасы үлкен, қартайған ер азаматтардың бәрі, кім екеніне, қандай тектен шыққанына қарамай, ерекше сый-құрметке бөленген.

    Әбу Һурайрадан (р.а.) жеткен риуаятта Пайғамбар (с.ғ.с.): «Кіші үлкенге сәлем беру керек»,-деген. (Бұхари) Пайғамбар (с.ғ.с.) үмбетіне айтқан өсиеттерінде үлкендерді сыйлап, жастарға мейірімді болуды тапсырған. Ибн Аббастан (р.а.) жеткен риуаятта Пайғамбар (с.ғ.с.): «Кішілерімізге мейірімді болмаған, үлкендерімізге құрмет көрсетпеген адам бізден емес»,-дейді.

    Әр жастағы адамдар тобына байланысты ереже мынадай: жасы үлкенге сөзсіз бағыну, ізет, құрмет көрсету. Мұның өзі алдыңғы буын ағалардың жастар алдындағы жауапкершілігін, қамқорлығын қамтамасыз етеді. Үлкендер мен кішілердің арасындағы қарым-қатынастың қыр-сыры тек жастар мен ересектердің арасында ғана емес, оның әр тобының өз ішінде де қалыптасқан. «Үлкен», «Кіші» деген тәрбиелік жүйенің айқын белгіленген өзіндік құндылықтары бар. Жеке тұлғаның бағалану дәрежесі ең алдымен оның жасына қарайды. Және өзара қарым-қатынастың қағидасын солар қалыптастырады. Нақты бір жасы үлкен ағаны сыйламау – жалпы «Үлкенді» сыйламау деген идеяның өзін жоққа шығармайтындай қалыпта көрінуге тиіс. Яғни жалқылық арақатынас жалпылыққа нұқсан келтірмеуі керек.
    Әр жастағы (мүшелдегі) белгілі топ – әлеуметтік құрылымдағы өз орнымен, өзінің өмір салтымен, қалыптасқан тәрбиелік қағидасымен, өмірге және рухани құндылыққа ие болу құқымен, міндеттер және шектеулермен айқындалады.

    Мысал ретінде айтар болсақ, халқымызда нағашы мен жиеннің қарым-қатынасы ерекше. «Үйдің жақсы болмағы ағашынан, баланың жақсы болмағы нағашыдан» деп осы бір туыстық қатынасқа айрықша мән беріп, әрбір балаға анасының туыстарына құрмет көрсетуді үйреткен.

    Нағашы-жиендік жақсы қарым-қатынас Ислам дінінде де құпталған игілікті іс. Жәбір ибн Абдулладан (р.а.) жеткен риуаятта Пайғамбар (с.ғ.с.) сахабасы Сағдты (р.а.) көргенде: «Мынау – менің нағашым. Қанеки, кім маған осындай нағашысын көрсетеді?»,-дейді екен. Өйткені Сағыд (р.а.) Пайғамбардың (с.ғ.с.) анасы Әмина бинт Уаһб шыққан Құрайыш тайпасының Бәни Зуһра аталығынан болатын. Пайғамбар (с.ғ.с.) Сағыдты (р.а.) ержүректігі мен жақсы мінез-құлқы үшін мақтайтын. Әрі оның атқан жебесі ешқашан мүлт кетпейтін. Сондай-ақ, Бәни Зуһра руының әйелдері де: «Біз Пайғамбардың (с.ғ.с.) нағашы жұртымыз»,-деп мақтаныш ететін. Нағашы жұртқа деген құрмет арабтардың арасында қазір де сақталған. Анасы жағынан жақын туыстарына қатысты нақ қазақтардағыдай мақал-мәтелдері бар. Мысалы: «Баланың жақсысы нағашысынан»,-қазақтың нақыл сөзі.

    Пайғамбар (с.ғ.с.) өзі де қызы Фатимадан туған Хасан мен Хүсейнге нағашы ата болды. Негізгі әулеті де осы екі жиен немерелерінен тарайды.

    Үлкенге құрмет, кішіге ізет білдіру – қазақтың ықылым заманнан бері бұлжытпай, қаймағын бұзбай сақтап келе жатқан ата дәстүрі, танымы. Халқымыз қазыналы қартын «жазып қойған хатына теңеген».

    Сен демек қиын емес пе,

    Бұрынғы туған үлкенге? – (Шортанбай Қанайұлы) деп кейінгі ұрпаққа қашанда «сіз», «біз» деп сыйласып жүруді өсиет еткен.

    «Сіз деген – әдеп, біз деген – көмек»

    Осыны меңзеген Майлықожа ақын бір толғауында: «Болар елдің баласы бірін-бірі сіз деген, болмас елдің баласы бірін-бірі күндеген»,-деп жырлайды. Ұрпағының ұлағатты, ұлт қамын ойлар ұлтжанды болуын көздеген қазақтың бауыр еті баласына ең алдымен үйрететіні де осы үлкенді сыйлау жайы екен. Аналар айтатын бесік жырындағы «Қолымыздан іс алып, мойыныңа күш алып, бізді бағар ма екенсің?» деп келетін өлең жолдары соны айғақтаса керек. Ардақты Пайғамбарымыздан (ол кісіге Алланың игілігі мен сәлемі болсын) жеткен хадисте: «Жастарға ізет, үлкенге құрмет көрсетпеген бізден емес»,-делінген.

    «Балалы үй – базар»

    Қазақ ауылының қай үйіне қонақ боп түспесеңіз де алдыңыздан кем дегенде үш-төрт баланың асыр сап жүгіріп шығатыны анық. Қанша жерден қызық қуған есі жоқ ойын балалары ғой десеңіз де, сол балалардың ауылға үлкен келсе, алдынан шығып, амандасып жатқанын, кей жерлерде киімін алып, қолына су құйып беріп, т.б қызметтеріне жарап жатқанын көресіз. Мұның барлығы қариясын ақыл-ойдың дариясына балап, оның батасын алып, көгеруді көздеген қазақтың баласына үйреткен тағылымды тәрбиесі, өнегесі екені анық.

    Иә, қазақ үшін үлкенге құрмет, кішіге ізет көрсету – жазылмаған заңдылық. Бұл – еш жерге жазылмай, еш заңға бағынбай атадан балаға мирас боп келе жатқан тәрбиенің қайнар көзі. Кезінде үш жүздің басын қосқан атақты Абылай ханға ақыл айтып, жөн сілтеген Бұхар жыраудың өзі:

    Тоғызыншы тілек тілеңіз,

    Тоқсандағы қарт бабаң

    Топқа жаяу бармасқа, – деп, қазыналы қарты үшін алаңдап, ол үшін дұға жасап, тілек тілеуге шақырған. Себебі қазақ елі – ешқашан үлкеннің алдын кесіп өтпеген, «ата тұрып ұл сөйлегеннен без, шеше тұрып қыз сөйлегеннен без» деп үлкендер арасында алға шығып сөз сөйлеуді ерсі көрген халық. Ұлдардың дастархан басына келгенде сабырсыздау болатындығынан ба, әлде қарнының ашып, мазасының қашатынынан ба, әйтеуір бір жолы үйдегі ағамның әкем келмей тұрып тамақты бастап кеткені үшін қатты сөгіс естігені бар. Бұл да болса үлкенге, ата-анаға деген сый-құрметтің отбасы, ошақ қасындағы тәрбиеден бастау алатындығын көрсетсе керек.

    Ертеден тағылымы мол қазақ халқымыз «Баланы жастан» деп рухани құндылықтарымызды бала тәрбиелеудің игілігіне жұмсаған. Жас шыбықты жастайынан халық ауыз әдебиетімен суарып, ел үшін ерен еңбек сіңірген тұлғаларды үлгі етіп, ұлтжандылыққа тәрбиелеген. Сонымен қоса отбасындағы қағида - әке-ана құрметі, үлкенді құрметтеу, кішіні ізеттеу. Бала тәрбиесі бесіктен деп ұғынған отбасы әр баланың тәрбиесін, түздегі қылығын қадағалап отырған. Өйткені, тәрбиелі адам - тағалы атпен тең деген.

    Біздің әр сөзіміз, ісіміз тәрбие екенін ұмытпайық. Осындай өнегелі амалымызбен, Исламмен біте қайнасқан салт-дәстүрімізбен біз де, перзенттеріміз де жәннатқа кіруіміз бек мүмкін!

    Ұлықты ұл, қылықты қыз, салихалы ұрпақ тәрбиелеу қазіргі буынның міндеті. Перзенттеріміз иманды, ибалы болса, келешек қазақ елінің тұғыры биік боларына нақ сеніммен қараймыз. Ата-анасының, елінің қадірін білетін, әулетті ұрпақ тәрбиелеуді Алла Тағала баршамызға нәсіп етсін! Әмиин!

    «Нұр-Астана» мешітінің бірінші наиб-имамы

    Ақжігітов Бекзат Қалибанұлы

    0
    1080
    0
  • 0

    Наурызбай қажы Тағанұлы Бас мүфти болып сайланды

    Құрылтайға жиналған 300 делегат Серікбай қажы Ораздың ұсынған кандидатурасына бірауыздан дауыс беріп, қолдау көрсетіп, Наурызбай қажы Тағанұлын Бас мүфтилікке сайлады. «Наурызбай қажы Тағанұлы менің бірінші орынбасарым ретінде көптеген игі жобаларды жүзеге асырды. Діни салада тәжірибесі мол. Наурызбай қажы Тағанұлының Діни басқарма жұмысын жандандырып, жаңа бастамаларға ұйытқы болатынына сенемін», – деп атап өтті.

    Құрылтайға қатысқан ҚР Ақпарат және қоғамдық даму министрі Дәурен Абаев Серікбай қажы Ораздың 2017-2020 жылдары атқарған жұмысына оң баға беріп, ҚМДБ төрағасы, Бас мүфти Наурызбай қажы Тағанұлының жаңа қызметіне сәттілік тіледі. Сонымен қатар, діни саладағы ортақ шараларды бірлесе жүзеге асыруға ниеттестік білдірді.

    ҚМДБ төрағасы, Бас мүфти Наурызбай қажы Тағанұлы журналистерге берген сұхбатында: «Құрылтайға еліміздің әр облысынан келген 300 делегат менің кандидатурама дауыс беріп, сенім білдіріп, Бас мүфти лауазымына сайлады. Бұл сенімді абыроймен ақтауға бар күш-жігерімді жұмсаймын. Жоспарлап отырған бірқатар жұмыстарымыз бар. Өздеріңіз білесіздер, 2020 жылдың 12 қаңтарында Қазақстан мұсылмандары діни басқармасының құрылғанына 30 жыл толды. Осы мерейтой аясында 30 мешітке ел игілігі жолында қызмет еткен тұлғалардың, соның ішінде әл-Фараби мен Абайдың есімін беруді, 30 елді-мекеннің ауыз су, жол-көпір мәселесіне оң ықпал етуді, 30 отбасыға қайырымдылық жасауды, 30 студентке грант тағайындауды, 30 мешітке күрделі жөндеу жүргізуді, т.б. игі іс-шараларды жүзеге асыруды жоспарлап қойдық. Барша жамағатты сауапты істі бірлесе атқаруға шақырамын», – деп атап өтті.

    Айта кетсек, Наурызбай қажы Тағанұлы осыған дейін ҚМДБ төрағасының Бірінші орынбасары, «Әзірет Сұлтан» мешітінің Бас имамы қызметін атқарды. ӨТПЕНОВ НАУРЫЗБАЙ ТАҒАНҰЛЫ 1977 жылдың 13 наурызында дүниеге келген. Білімі 1993-1997 жылдары Ташкенттегі «Имам Әл-Бұхари» атындағы Ислам институтында оқып жоғарғы діни білім алған. 1999-2001 жылдары ҚМДБ жанындағы Ислам институтын оқыған. 2009 жылы Мысыр Араб Республикасында қысқа мерзімде діни білімін жетілдірген. 2010 жылы Абай атындағы Алматы Мемлекеттік университетінің «Тарих» факультетін сырттай оқып бітіріп жоғарғы білім алған. 2011-2013 жылдары аталған университеттің «Дінтану» мамандығы бойынша магистратурасын бітірген. 2017 жылдан бастап «Нұр-Мүбарак» Египет ислам мәдениеті университетінде «Исламтану» мамандығы бойынша PhD докторантурасында оқуда.

    Еңбек жолы: 1997-2006 жылдары Республикамыздың түрлі мешіттерінде имамдық қызметтерді атқарумен бастау алған. 2006-2011 жылдары ҚМДБ-ның Қарағанды өңіріндегі өкілі, Қарағанды қалалық №1 орталық мешітінің Бас имамы. 2011-2013 жылдары Қазақстан Республикасы Дін істері агенттігінің Діни бірлестіктермен байланыстар жөніндегі басқармасының Бас сарапшысы. 2013-2018 жылдары ҚМДБ төрағасының бірінші орынбасары, наиб мүфти, ҚМДБ-ның Астана қаласы бойынша өкілі, «Нұр Астана» орталық мешітінің Бас имамы. 2018 жылдың шілде-қазан айлары ҚМДБ төрағасының бірінші орынбасары, наиб мүфти, ҚМДБ-ның Түркістан қаласындағы кеңсе басшысы, Түркістан облысы бойынша өкілі имамы. 2018 жылдың қазан айынан бастап ҚМДБ төрағасының бірінші орынбасары, наиб мүфти, ҚМДБ-ның Нұр-Сұлтан қаласы бойынша өкілі, Республикалық «Әзірет Сұлтан» мешітінің Бас имамы.

    Еңбек жолындағы жетістіктері: Наурызбай Тағанұлының тікелей жетекшілігімен 2002-2005 жылдары ШҚО, Аягөз қаласында орталық және «Жаңауыл» мешіттерінің құрылысы сәтті жүргізіліп, іске қосылған. 2010-2011 жылдары Қарағанды қаласындағы орталық мешіттің салынуына үлес қосқан. Қарағанды облысында «Сұлу әлем», «Нұрлы мінбер», «Жұлдызды гол» атты жобаларды іске асырған. Республикалық БАҚ беттерінде жарияланған көптеген діни, рухани-танымдық мақалалар мен «Үміт сәулесі», «Мазһабсызбен сұхбат» атты кітаптардың авторы. Марапаттары: «Құрмет» орденінің иегері, Аягөз ауданының құрметті азаматы, Қазақтан Тәуелсіздігінің 20 жылдығы медалімен, Қазақтан Тәуелсіздігінің 25 жылдығы медалімен, Қарағанды облысы әкімінің құрмет грамотасымен, Нұр-Сұлтан қаласы әкімдерінің алғыс хаттарымен марапатталған.

    Жеке өмірі: Отбасылы, 4 баланың әкесі.

    © ummet.kz Толығырақ: https://ummet.kz/news-kz/20-el-ishy/11210-nauryzbaj-kazhy-taganuly-bas-mufti-bolyp-sajlandy-foto.html

    0
    443
    0
  • 0

    Ажырасу – балаларды бақыттан айыру

    Дәстүрімізде де, дінімізде де отбасын құруға аса үлкен жауапкершілікпен қарап, адам бойындағы асыл қасиеттердің қалыптасуына алғаш қадам жасаушы баспалдақ деп түсінген. Бүгінде үлкен өкінішке орай, түрлі себеппен шаңырағы ортасына түсіп, ажырасып жатқан отбасын көру үйреншікті жағдайға айналды.

    Ажырасудың факторлары әр түрлі болғанымен, ажырасуға шешім қабылдаған ерлі-зайыптылардың екеуіне де оңай тимесі анық. Өйткені әрбір отбасының жазылмаған қағидасы болады. Ажырасумен бірге барлық нәрсе күйрейді. Алайда ең көп қасірет шегетін – балалары. Отбасындағы ыдыс-аяқтың сылдырлауы, жиі-жиі белең алатын ұрыс-керістер, баласының көзінше шешесін әкесінің былапыт сөздермен балағаттауы, тіпті қол көтеруі нәтижесінде балада үнемі қорқақтық пен үркектік пайда болады.

    Өмірі бір бітпейтін ырың-жырың кикілжіңдермен әке-шешесінің түбінде ажырасып тынатындығын ойлау бала жанына жазылмас жара салып, оны іштей үлкен күйзеліске ұшыратады. Сөйтіп, ол баланың жаны оңбай жараланып, қамкөңіл, ызақор не тұйық болып өседі. Себебі, балаға шеше де, әке де керек. Әрқайсысының бала үшін өзіндік атқаратын қызметтері бар. «Әкеге қарап ұл өсер, шешеге қарап қыз өсер» демекші балаңыз сізді өзінің өміріндегі идеалы ретінде қабылдап өсіп жатқан болуы мүмкін. Олар ата-аналарының ажырасуына өзін кінәлі санайды: «әкем (анам) мен жаман болғасын, не мені жақсы көрмегендіктен, бізді тастап кетті» деп ойлап, қамығады, өзін кешіре алмай жүреді. Мұндай балалар кетіп қалған әкесін (анасын) іштей күтіп, көпке дейін ата-анасы қайта қосылса екен деп армандайды. Бірақ күткен адамы сол күйінше келмейді.

    Өзімен-өзі жалғыз қалып, жеке ойнап, қара бояумен сурет салып, түнде ұйқысы бөлініп, тәбеті қашқан, оқуға ынтасыз, тәрбиесі нашарлаған көріністер байқала бастайды. Бала бұл кезде маңайда болып жатқан құбылыстарды толықтай сезіне алады. Бұл дегеніңіз, балаға көрсетілер мейіріммен қатар ата-ананың өз арасындағы татулығы да айтарлықтай маңызға ие екендігін білдіреді. Ажырасуға шешім қабылдамас бұрын балаларыңыздың болашағына көз жүгіртіп шыққаныңыз дұрыс болар. Сіз өсіріп отырған ұл немесе қыз ертең елінің дамуына үлкен үлес қосатын жанашыр азамат немесе азаматша болуы мүмкін.

    Сондықтанда сіз өз балаңыздың болашағын ғана емес, отаныңыздың дамуына да нұқсан келтіріп жатқаныңызды сезінуіңіз керек. Енді негізгі мәселеге көшсек – осы ажырасу факторын болдыртпау. Қарым-қатынасты осы шарықтау шегіне дейін алып келмеу. Ажырасуды болдыртпау үшін ең бірінші, оның орын алу себептерін анықтау керек. Шын мәнінде, себеп өте көп. Негізінен ажырасудың алдын-алу қарым-қатынасты дұрыс құрудан басталады.

    Психологтардың айтуынша, ажырасудың шектен тыс көбеюі адамдардың өмірлік серік таңдағанда оның жан-дүниесіне үңілмей, сыртқы факторларға қарап қана бағалап таңдауынан болады. Сонымен бірге, жастардың материалдық қиындық көріп, оған шыдамай жататындықтары да басты себептердің бірі. Демек, дайындық болуы керек. Осы орайда психологтар ерлі-зайыптыларға мынадай ұсыныстарды ұсынады: - Бір-біріңізге ауыр сөздерді айтудан аулақ болыңыз. Себебі ондай сөздер, қылықтар кешіріледі, бірақ ұмытылмайды. -

    Проблемаларыңыз бен қиындықтарыңызды үнемі бір-біріңізге жүктеуден қашыңыз. Адам шағымнан, жылап-сықтаудан, күн сайынғы сіздің құрбандықтарға барып жатырмын деген міндетсінулеріңізден тез жалығады, шаршайды. - Компромиске келу. Түсіністік танытатын кезде барлығын ой елегінен өткізіп екеуіңізге де пайдалы болатындай шешім жасауға болады. Егер біріңіз құрбандыққа бару керек болсаңыз, барыңыз. Ол сіздің отбасыңыз үшін жасалатын қадам. - Ренішіңіз болса, өкпеңіз қара қазандай болғанша үндемей жүре бермей, жұбайыңызға білдіртіңіз, айтыңыз. Сөйлесу мен әңгімелесу жоқ жерде дұрыс отбасын құру деген бос иллюзия. Себебі, неке – ұзақ әңгімелесу. Қоғамда әдептілік пен инабаттылық өлшемдерінің терең тамырланып, кең жайылуында отбасының маңызы өте зор.

    Әрбір жанұяның қос тіреуі – ерлі-зайыптылар өздеріне қатысты әдептілік пен адамгершілік талаптарын, құқықтары мен міндеттерін мүлтіксіз орындаса, кездеспей қоймайтын тіршіліктің ащысы мен тұщысын, суығы мен ыстығын, қайғысы мен қуанышын бірге бөліссе, бүкіл қоғамда, елде бейбіт те берекелі тұрмысқа негіз қаланбақ. Қорыта келгенде, дәстүрлі дініміз ислам отбасының ең әуелі сенім мен сүйіспеншілік және түсіністік негізінде құрылғанын қалайды. Бақытты отбасы болашақта ұлы тұлғалардың дүниеге келуіне қабілетті болмақ. Ендеше, елдің, ұлттың болашағы әр отбасында шешіледі, негізі қаланады. Демек, отбасының жаңа ұрпақты тәрбиелеуде, қоғамдық тұрақтылық пен үдерісті қамтамасыз етуде айрықша рөл ойнайтынын естен шығармағаныңыз абзал.

    Айгүл Сауранқызы

    «Нұр Астана» мешітінің қызметкері

    © ummet.kz Толығырақ: https://ummet.kz/makalalar/353-family/11149-azhyrasu-balalardy-bakyttan-ajyru.html

    0
    409
    0
  • 1

    Тамшыдан үлгі алған шәкірт

    Қатты намыстанған шəкірт «менен түк шықпайды» деп ешкімге айтпастан медреседен қашып кетеді. Жол бойы тоқтамай жүріп, шаршап-шалдығап келе жатқан бала үңгірге кезігеді. Ол осы жерде сəл аялдап, демалмақшы болады. Қоңыр салқын үңгірдің ішінде жантая қалып, көзін жұмғаны сол еді, алыстан еміс-еміс тамып тұрған судың дауысын естиді.

    Қызығушылығы бойын жеңген жас бала үңгірді аралап, бір бұрыштан тамшылап тұрған суды көреді. Бір қызығы тамшының түскен жеріндегі тас кəдімгідей ойылып қалған екен. Кішкене ғана тамшының тастың үстіне асықпай барып құлағанын тамашалап тұрған шəкірт аң-таң болады. Қалайша тамшы тасты ойып тастаған?

    Бұл іске қарап отырып жас бала тынымсыз, тұрақты еңбектенсе өзінің де тасты ойған тамшыдайын түбінде нəтижеге қол жеткізетініне сенімі артады. Кейіннен осы шəкірт үлкен ғұламаға айналған екен. Иә, амалда нәтиже болуы үшін тұрақтылық қажет. Тұрақтылық Аллаға ең ұнамды амал.

    Бұл жөнінде Айша анамыздан (р.а.) жеткен хадисте «Алла Тағалаға ең ұнамды амал аз болса да үздіксіз орындалатыны» (Муслим) делінеді. Үлкен сапардың бір адымнан басталатыны сияқты, үлкен істер тұрақты жасалған аз еңбектің нәтижесінде жүзеге асады.

    Индира Жұмабекқызы

    © ummet.kz Толығырақ: https://ummet.kz/makalalar/346-gibratnama/11189-tamshydan-ulgi-algan-shakirt.html

    1
    381
    0
  • 0

    Алланың разылығына қол жеткізем десеңіз

    Тек қана ислам дінінде Алла өзіне құлшылық жасап бойұсынғаннан кейінгі жақсылық ата-анаңа жасаған қамқорлығың деп көрсеткен. Оған дәлел Алла тағала Құран Кәрімде: «Раббың өзіне ғана ғибадат етулеріңді, ата-анаңа жақсылық қылуға әмір етті.» («Исра» сүресі, 23-аят).

    Біле білген адам үшін ата-ана таптырмас қазына, қоса айтқанда оның басында тұрған үлкен тәжі. Кімде-кімнің ата-анасы көз алдында қартайса, ол өзінің басындағы тәжін көре алмайтыны анық. Ал қашан әкесі немесе анасы мәңгілік өмірге дүние салса, сонда ғана ол бір тәжінен айырылғанын сезінеді. Сондықтан да ата-анасы барлар Аллаға сансыз шүкірлер айтып, сол ата-анасына қамқор болуға, жақсылық жасауға асығу керек.

    Алла Тағала Құранда былай деп бұйырады: «Маған және әке-шешеңе шүкірлік ет! Қайта оралар жер менің құзырым» («Лұқман» сүресі, 14-аят). Кім Аллаға шүкірлік етіп, бірақ ата – анасына шүкірлік етпесе, онда Жаратушыға деген шүкіршілігі қабыл болмайды. Себебі, ата-анаға шүкірлігіміз, ол Аллаға шүкірлігіміз. Оларды құрметтеу ең көркем құлшылық. Барлық игі істердің негізі және жұмаққа апаратын жолымыз.

    Пайғамбарымыз (ﷺ): «Кімде – кім жақсылық етіп, әрдайым шүкірлік танытатын болса, оның өмірі ұзақ болады», - деп айтқан. Хазіреті Айша (р.а) анамыздан жеткен хадистердің бірінде Пайғамбарымыз (ﷺ) айтады: «Мен түсімде жәннатта екенмін. Жәннатта Құран оқылып жатқанын естіп: «Бұл кім?» – дегенімде: «Харис ибн Нұғман», – деген жауапты естідім», – дейді. Сонда Пайғамбарымыз (ﷺ) сахабалардан Харис ибн Нұғман жайлы сұрайды. «Оның амалы қандай амал?» – дегенде, сахабаларының барлығы: «Уа, Алланың Елшісі! Оның жақсы бір амал жасап жүргенін көрмейміз. Алайда, ол анасына көп жақсылық жасайды», – деп жауап береді. Сонда Пайғамбарымыз (ﷺ): «Оның істеп жүргені жақсылық», – деп үш мәрте қайталайды.

    Жоғарыдағы аят-хадистерге ой жүгіртсек ата-анаға жақсылық сізді жәннаттан таптыратын ізгі амалыңыз екен. Тіпті, ата-анамыз бізге жеткілікті дәрежеде көңіл бөліп қарай алмаса да, біз оларға жақсы қарауға міндеттіміз. Өйткені үлкен кісі жасы ұлғайған сайын жас бала секілді көп ренжігіш, қорғансыз бола түседі. Сәби кезіңізде сіздің қателіктеріңізге көз жұма қараған ата-анаңыз қартайған шағында мейіріммен қарай алмасаңыз мұсылмандығыңыз қайда қалғаны?!... Қанша жерден мұсылманмын деп кеудеңді ұрғаныңмен ата-анаң сенен разы болмаса Алланың разылығын табамын деу бос әурешілік. Себебі, дана халқымызда: «Алланың разылығы ата-ананың разылығында», - деген өсиет сөз бойымызда тулап тұр емес пе?! Ата-анаңыз сізден разы болса, екі дүниеде алар асуыңыз, жетер жетістігіңіз жемісті болмақ. Алла сізден екі дүниеде разы болып, осы жалған өмірде де, мәңгілік ақыретте де мол нығметтеріне бөлейтіні анық.

    Өкінішке орай, қазіргі қоғамда қартайған қарт ата-аналарының қадіріне жете алмай, азғырған шайтанның қармағына ілініп, оларды қарттар үйіне тапсырып, «енді бақытты боламын» деп қателесіп жүрген жандар қаншама... Бұл қысқа ғұмырымызда уақытша ғана жанымызда болатын жақындарымыздың қадіріне жетіп, оларға тек жақсылық жасап, ақ батасын алуға асығуымыз керек. Сонда ғана ертеңгі ұрпақтан жақсылық күтіп, оларға бата беріп, ақсақалды ата, ақ жаулықты ана атанатынымыз анық. Алла бізді үлкенге құрмет, кішіге ізет көрсетіп, жасымыз ұлғайғанда кішіден құрмет, үлкеннен ғибрат көре алатын пенделерден болуды нәсіп етсін! Әумин!

    Мырзагелдиев Хамит

    «Рахымқызы Раиса Ана» мешітінің наиб имамы

    © ummet.kz Толығырақ: https://ummet.kz/makalalar/353-family/11179-allanyn-razylygyna-kol-zhetkizem-deseniz.html

    0
    661
    0
Тамаша, сіз бәрін көрдіңіз!