Қарағанды облысында ер адам әйелге әдейі ВИЧ жұқтырып, оның өліміне себеп болған

Шахтинск (Қарағанды облысы) қалалық сотында адамның иммун тапшылығы вирусын (АИТВ) (ВИЧ) жұқтырғаны (ҚК 118-бабы 2-бөлігі) бойынша айыпталған азаматқа қатысты қылмыстық іс қаралды.
Онда мына жайттар анықталды:

2015 жылы ер адамға АИТВ жұқтырған деген диагноз қойылған. Емдеуден жалтарып, басқаларды жұқтырғаны үшін қылмыстық жауапкершілікке тартылатыны, сондай-ақ сақтық шараларын сақтау қажеттігі туралы оған ескертілген.

Ол 2016-2023 жылдар аралығында ауруын ескертпестен бір әйелмен бірге тұрған. Нәтижесінде ол жәбірленушіге АИТВ инфекциясын жұқтырған, соның салдарынан әйел адам қайтыс болған.

Сотталушының кінәсі сот-медициналық сараптамасының қорытындысымен расталды, оған сәйкес жәбірленушінің өліміне екіншілік аурулардың дамуымен АИТВ-инфекциясы және басқа да іс материалдары себеп болған.

Сотталушы өз кінәсін мойындамады.

Ал Қылмыстық кодекстің 118-бабының 2-бөлігі бойынша мұндай қылмыс үшін 5 жылға дейін бас бостандығынан айыру жазасы қарастырылған.

Іс бойынша қылмыстық жауаптылықты немесе жазаны жеңілдететін мән-жайлар анықталған жоқ.

Қылмыстың ауыр зардаптарға әкеп соқтырғаны, яғни жәбірленушінің өлімі ауырлатылған мән-жайлар деп танылады.

Сот айыпталушыны Қылмыстық кодекстің жоғарыда айтылған 118-бабы 2-бөлігімен кінәлі деп танып, 4 жылға бас бостандығынан айырды. Сондай-ақ ол мәжбүрлеп емдеуге жіберілетін болды.

Соттың үкімі заңды күшіне енген жоқ.

https://t.me/krgsoty