"Қазгидромет" болжамы бойынша 19 мамырда еліміздің басым бөлігінде жаңбыр жауып, найзағай ойнайды.

Солтүстік-батыста, солтүстікте, оңтүстікте, оңтүстік-шығыста, республиканың орталығында жаңбыр, бұршақ жауады.
Республика бойынша шаңды дауыл тұрып, жел күшейеді.
Еліміздің оңтүстігінде жел соғады, солтүстік-батыс пен солтүстікте тұман түседі.
Қарағанды, Ұлытау, Қостанай, Шығыс Қазақстан, Қызылорда Батыс Қазақстан, Түркістан облыстарында жоғары өрт қаупі және Абай облысының оңтүстігінде, Үржар ауданында, Жетісу облысының шығысында төтенше өрт қаупі бар.

@qazaqstantv

Қырғызстан астанасында кеше кешке 300-ге жуық жігіт көшеге жиналған. Олар жерлестерін шетелдіктердің ұрып тастағанына наразылық білдірді.

Милиция кардон қойып, жаппай тәртіпсіздікті болдырмауға тырысты. Наразылыққа шыққандардың арасында ұсталғандар да бар. Артынан тіпті олардың таратылғаны хабарланды.

Бұған осыдан бірнеше күн бұрын шетелдіктердің қатысуымен болған төбелес себеп еді. Әлеуметтік желіде бұл оқиғаның бейнежазбасы тарады.

Онда адамдардың хостел ауласында төбелесіп жатқаны байқалады. Бұл кезде жергілікті жігіттер аз болып, олар шетелдіктерден әзер құтылады. Сонда да қатты таяқ жеп жүре алмай қалған біреуі хостел ауласында қалып қояды.

Ал кеше жүздеген жігіт сол үшін есеп айырысуға келген.

Бұл кезде кешірім сұрап тұрған үш шетелдіктің видеосы да тарап үлгерді.

Қырғыздар осыдан кейін сабасына түскен болар. Олар да тарапты.

Бүгін таңертең Бішкек тыныш.

Бейнежазбаның астына: "Мұстафа" кафесінің маңайында әдеттегі тыныш таң, Тікелей эфир десе болады. Милицияға рахмет айту керек, олар таңғы 6-да болса да жұртты сөзбен тыныштандырып, үйлеріне жіберді" деп жазылған.

Қазіргі уақытта алғашқы медициналық көмек беру кезінде бірінші кезекте қолданылатын дәрілер аудан бойынша су тасқынына қатысты дайындалған эвакуациялық пункттерге жеткізілген. Бұл туралы Атырау облысының ТЖ жөніндегі жедел штабы хабарлады.

"Қауіпті аймақтарда орналасқан Сарайшық, Талдыкөл ауылдарындағы амбулаториялардан вакциналар аудан орталығына алынды. Ондағы мақсат - вакциналарды сақталу тәртібінің және жарамдылық жағдайының бүлінуіне жол бермеу", - деді Махамбет ауданы орталық ауруханасы директорының міндетін атқарушы Сержан Сандыбаев.

Маңғыстау облысының әкімі болып Нұрдәулет Қилыбай тағайындалды. Ол бұған дейін «Өзенмұнайгаз» компаниясының басшысы болған.

«Мемлекет басшысының Жарлығымен Нұрдәулет Игілікұлы Қилыбай Маңғыстау облысының әкімі лауазымына тағайындалды», делінген Ақорда хабарламасында.

Нұрдәулет Игілікұлы Қилыбай 1978 жылы Маңғыстау облысы Бейнеу ауданында дүниеге келген.

Білімі жоғары. «Тасымалдауды ұйымдастыру жөніндегі инженер», «Қаржы және қаржы құқығы» маманы. 2018 жылы АҚШ-тың Бостон қаласында Stafford House халықаралық мектебінде білім алған.

Еңбек жолын 1999 жылы Маңғыстау тасымалдау бөлімшесі станциясының кезекшісі қызметінен бастаған. Кейін Астана станциясында кірме жолдары бойынша жүктерді қабылдап-тапсырушы, «ҚТЖ» ҰК» акционерлік қоғамынының бас маманы, бөлім бастығы, магистральды желілер дирекциясы басқарушысының көмекшісі қызметтерінде болды.

2005-2009 жылдар аралығында Қазақстан Республикасы Көлік және коммуникациялар министрлігі Көлік және қатынас жолдары комитетінің бөлім бастығы, басқарма бастығы, төрағаның орынбасары қызметін атқарған.

2009-2010 жылдары «Вокзал-сервис» АҚ президенті, «ҚТЖ» ҰК» АҚ Жолаушыларды тасымалдау жөніндегі басқарушы директоры болды.

2010-2011 жылдары Қазақстан Республикасы Көлік және коммуникациялар министрлігі Көлік және қатынас жолдары комитетінің төрағасы қызметін атқарды.

2011-2012 жылдар аралығында «ҚТЖ» ҰК» АҚ президентінің кеңесшісі, кейін осы акционерлік қоғамның Маңғыстау жолдары бөлімшесі филиалының директоры болды.

2012-2013 жылдары Қазақстан Республикасы Көлік және коммуникациялар министрлігі Көлік және қатынас жолдары комитетінің төрағасы қызметінде болды.

2013-2017 жылдары «ҚТЖ» ҰК» АҚ аппарат басшысы - атқарушы директоры, «ҚТЖ» ҰК» АҚ атқарушы директоры - «Жолаушылар тасымалдау» АҚ президенті, «Теміржолсу» АҚ Бас директоры - Басқарма төрағасы қызметін атқарды.

2018-2020 жылдары – Маңғыстау облысы әкімінің орынбасары.

2020 жылдың маусым айынан бастап Ақтау қаласының әкімі лауазымында болды.

2022 жылдың қазан айынан Маңғыстау облысы әкімінің орынбасары қызметін атқарды.

2023 жылдың қаңтар айынан бүгінге дейін «Өзенмұнайгаз» компаниясының бас директоры болды.

Әлеуметтік желіде Атырау облысындағы Мақат ауданының әкімі Ринат Ибрагимовтың бұрынғы әйелінің шағым айтып отырған видеосы тарады. Онда әйел өзін бұрынғы күйеуінің ұрып соққанын айтады.

Фотоколлаж: kaztag.kz

«Мен, Атырау қаласының тұрғыны Үмбетқалиева Ақмарал, Атырау облысы Мақат ауданының әкімі болып отырған бұрынғы күйеуім, спортшы, Олимпиада ойындарының қатысушысы Ринат Хисаұлы Ибрагимовтың үстінен шағым айтқым келеді. Қазір оған қатысты ҚР Қылмыстық кодексінің 107-бабының 2-бөлігімен (материалдық жағынан тәуелді адамға қатысты денсаулыққа қасақана орташа ауырлықтағы зиян келтіру) қылмыстық іс тергеліп жатыр», – дейді видеодағы әйел.

Үмбетқалиеваның айтуынша, оны Ибрагимов 11 жыл бойы балаларының көзінше ұрып-соғып, азаптап келген.

«2021 жылы түнгі сағат төртте ішіп алған Ринат мені балаларымның көзінше ұрып, жағымды сындырды. Содан кейін милиция (полиция – ред.) шақыруға мәжбүр болдым. Бірақ артынан «балалар үшін кешір» деп жалынғаннан кейін арызымды қайтарып алуға тура келді», – дейді ол.

Үмбетқалиеваның айтуынша, әлгі жағдай 2023 жылы тағы қайталанған. Ол кезде әйелдің сегізкөзі сынып, бір ай жүре алмай қалыпты. Сол аралықта Ибрагимов қызмет бабы мен тамыр-таныстықты пайдаланып, одан балаларын тартып алған көрінеді. Сөйтіп, әйел перзенттерін бір жыл бойы көре алмаған.

Осының бәрін видеода айтқан Ақмарал бұрынғы күйеуіне осы уақытқа дейін шара қолданылмағанына тиісті орындардың назар аударуын сұрайды.

Ал ҚазТАГ-тың хабарлауынша, дәл осы азаптау дерегіне қатысты іс сотқа жолданып қойған.

«Іс сотта жатыр. Ақпанда жолданған», - дейді Атырау облысы ПД баспасөз қызметіндегілер.

Қазақстан құрамасы бұл жолы Швеция командасынан ұтылып қалды.

Есепті «Миннесота» шабуылшысы Маркус Юханссон ашты. Швеция тарапынан екінші шайбаны Линус Юханссон еш қиындықсыз сала салды. Ал «Сан-Хосе» шабуылшысы Фабиан Зеттерлунд өз командасына үшінші голды сыйлады.

Қазақстан болса, қорғаушы Әділ Бекетаев салған бір шайбамен шектелді.

Сөйтіп, есеп Швецияның пайдасына 3:1 болды.

Айта кетейік, Қазақстан құрамасы хоккейден әлем чемпионатындағы алғашқы матчында Францияны 3:1 есебімен жеңгенде, бөркімізді аспанға атып қуанып едік. Бірақ ол қуанышымыз ұзаққа бармады. Одан кейін Латвия (0:2) мен Словакиядан (2:6) ұтылып қалдық.
Қазақстанның алда үш матчы бар:
17 мамыр, 19:20
Германия - Қазақстан

19 мамыр, 19:20
АҚШ - Қазақстан

20 мамыр, 23:20
Қазақстан - Польша

Маңғыстау облысының әкімі Нұрлан Ноғаев қызметінен кетті.

"Мемлекет басшысының Жарлығымен Нұрлан Асқарұлы Ноғаев Маңғыстау облысының әкімі лауазымынан босатылды", - деп жазды t.me/aqorda_resmi.

Нұрлан Ноғаев 1967 жылы 30 шілдеде Ақтөбе облысында дүниеге келген.

Еңбек жолын Ақтөбе облысы, Қандыағаш станциясында электр шебері болып бастаған.

1996-2006 жылдары – "Қазақтүрікмұнай" ЖШС маркетинг жөніндегі инженер, мұнай және мұнай өнімдерін сату, маркетинг бөлімінің бастығы, бас директор.

2006 жылдың ақпан айынан бастап "ҚазМұнайГаз" Ұлттық компаниясы" АҚ-ның атқарушы директоры.

2007 жылдың қыркүйегінен 2010 жылдың сәуір айына дейін Батыс Қазақстан облысы әкімінің орынбасары.

2010 жылдың сәуір айынан 2012 жылдың қаңтарына дейін Батыс Қазақстан облысы әкімінің бірінші орынбасары.

2012 жылдың 20 қаңтарында мемлекет басшысының Жарлығымен Батыс Қазақстан облысының әкімі болып тағайындалды.

2016 жылғы 26 наурыздан – Атырау облысының әкімі, 2019 жылдың 17 маусымында осы қызметке қайта тағайындалды.

2019 жылдың 18 желтоқсаны – Қазақстан Республикасы Энергетика министрі.

2021 жылдың 7 қыркүйегінен бастап Маңғыстау облысының әкімі.

«Атамекен» ҰКП Төралқа төрағасы Райымбек Баталов Қаржылық мониторинг агенттігінің (ҚМА) басшысы Дмитрий Малаховпен кездесу өткізді. Тараптар Ұлттық палатаның кәсіпкерлер құқығын қорғау бойынша қабылдап жатқан шараларын, сондай-ақ бизнесті негізсіз қылмыстық қудалаудан қорғау мәселелерін талқылады.

Райымбек Баталов ҚМА басшысына адал кәсіпкерлерді қылмыстық қудалауға жол бермеу бойынша жүйелі жұмысы үшін алғыс білдірді.

«Атамекен» ҰКП «Бизнесті қорғау» жобасын сәтті жүзеге асыруда. Басты мақсат – кәсіпкерлердің құқықтарының бұзылуына жол бермеу және қызметтеріңізге деген сенім деңгейін арттыру. Шағымдарды қарау үшін бірлескен жұмыс тобы құрылып, өңірлік палаталардың алаңдарында кәсіпкерлермен кездесулер өткізіліп, оң пікірлер алынды. Нәтижесінде кәсіпкерлерге қатысты тіркелген істердің саны 2 есеге азайды. Әрине, бұл көрсеткіштер бизнес қауымына жағымды әсер етеді», - деді Райымбек Баталов.

Сондай-ақ, «Атамекен» ҰКП басшысы бірнеше өзекті мәселелерді де қозғады. Атап айтқанда, қылмыстық іс жүргізу шеңберінде мүлікке билік етуге, мәмілелер мен басқа да операцияларға шектеу қою жайында сөз қозғалды. Осылайша, залалды өтеу үшін жеке кәсіпорынның ғана емес, оның контрагенттерінің де барлық мүлкі мен шоттарына тыйым салынады.

«Бұл компаниялардың жұмысын тоқтатып, жеткізушілерге төлем жасауға, қаржылық және салықтық міндеттемелерді орындауға кедергі келтіреді. Ақшаны тек шығын көлемінің шегінде, яғни бизнес қалыпты жұмыс істей беруі үшін ғана тәркілеу керек», - деп атап өтті ұлттық кәсіпкерлер палатасының басшысы.

Баталов бұған дейін ҚР Президентінің тапсырмалары аясында кейбір заңнамалық актілерге өзгерістер мен толықтырулар енгізілгенін еске салды. «Атамекен» ҰКП бұл үдеріске белсене қатысып, кәсіпкерлердің құқықтарын қорғауға қатысты бастамаларды көтерді.

Осылайша, Қылмыстық-процестік кодекске қабылданған түзетулер кәсіпкерлікті қылмыстық процеске тартпай, есептелген салықты толық өтегеннен кейін қылмыстық іс қозғауды алып тастайды.

Өз кезегінде «Атамекен» ҰКП басқарма төрағасының орынбасары Гүлнар Бижанова ҚМА-не ұсыныс айтты.

«Біз «естуші мемлекет» тұжырымдамасына сәйкес, келіп түскен шағымдарды бірлесіп қарау тәжірибесін жаңғыртуды ұсынамыз. Сонымен қатар, біздің бастамаларымызды қолдағаны үшін Агенттікке алғыс айтамыз. Мәселен, кәсіпкердің ақшаны үнемдеу нәтижесінде пайда тауып, орындалған жұмыс сапасына теріс әсер етпеген жағдайда сотқа дейінгі өндіріс басталмайды. Қылмыстық Кодекстің 219, 241, және 246-баптары әкімшілік жауапкершілікке ауыстырылды. Контрабанда және кедендік төлемдер мен алымдарды төлеуден жалтару аса ірі мөлшерде жасалған жағдайда ғана қылмыстық жауапкершілік болады. Қылмыстық кодекстің 6 тармағы бойынша бас бостандығынан айырудың орнына қаржылық жазалар кеңейтілуде», - деп мәлімдеді Гүлнәр Бижанова.

Дегенмен, оның айтуынша, ұйымдасқан қылмысқа қатысты ережелерді коммерциялық ұйымдарға қолдану үрдісі жалғасуда.

Қаржылық мониторинг агенттігінің төрағасы Дмитрий Малахов өз сөзінде жақында Мемлекет басшысы қол қойған «экономиканы ырықтандыру жөніндегі шаралар туралы» Жарлыққа назар аударып, ҚММ өңірлік департаменттерінің басшыларына реформаның сапалы орындалуын қамтамасыз етуді тапсырды.

«Тергеу әрекеттерін жүргізу кезінде кәсіпкерлердің құқықтары мен мүдделерінің бұзылуына жол бермеу, шағымдану рәсімі кезінде, сондай-ақ есептелген салық сомаларын толық ерікті түрде өтеу кезінде мемлекеттік органның немесе соттың шешімі күшіне енгенге дейін қылмыстық істерді тіркеу», - деді Д. Малахов

Кездесу соңында «Атамекен» ҰКП мен Қаржылық мониторинг агенттігі арасында өзара ынтымақтастық туралы келісімге қол қойылды.

Жақында Мемлекеттік дума төрағасы Вячеслав Володин Ресейге жұмыс істеуге келетіндер орыс тілін білуі керек деп мәлімдеген еді.

Вячеслав Володин мен Алишер Қодиров

Енді Өзбекстан Олий Мажлисі Заң шығару палатасының вице-спикері Алишер Қодиров Володинге жауап ретінде өз ұсынысын жеткізді. Ол өзбек тілін білмейтін адамды мемлекеттік қызметке жолатпау былай тұрсын, мемлекеттік қызметтерді пайдалана алмайтындай қылу қажеттігін айтты.

«Әрине, Ресейге жұмысқа баратындар орыс тілін білуі керек. Бірақ бұл Өзбекстанда тұратын орыстар өзбек тілін білмеуі керек деген сөз емес!

Өзбекстанда тұратын барлық ұлттың азаматтары өзбек тілін білуі қажет.

Өзге ұлт өкілдерінің балабақша мен орта білім беруде ана тіліміз бен құндылықтарымызды меңгеруіне жағдай жасаумен қатар, заңымызда өзбек тілі міндетті түрде оқытылатын тіл ретінде белгіленуге тиіс», – деп жазды Алишер Қодиров.

Бүгін Президент Қасым-Жомарт Тоқаев Орталық Азия елдері қауіпсіздік кеңестерінің хатшыларын қабылдады.

Қасым-Жомарт Тоқаев делегация басшыларына ілтипат білдіре отырып, Орталық Азия елдері қауіпсіздік кеңестері хатшыларының алғашқы кездесуі сыртқы және ішкі сын-қатерлер мен қауіптің алдын алу үшін күш-жігер біріктіретін, сондай-ақ оған қарсы тұруға қажетті шараларды әзірлейтін тиімді алаңға айналуы керек екенін атап өтті.

"Аймақтық ынтымақтастық барлық бағыт бойынша қарқынды дамуда. Осы тұрғыдан алғанда, бұл – өте маңызды әрі оң үрдіс. Мемлекетаралық саяси диалог та мүлде жаңа деңгейге көтеріліп келеді. Өңір елдері арасындағы өзара сауда-экономикалық ықпалдастық белсенді түрде кеңеюде. Соңғы бес жылда өңірішілік сауда-саттық көрсеткіші 80 пайыздан астам артып, 10 миллиард доллардан асқан. Бұл ретте елдер арасындағы экспорттық-импорттық операцияларды жоспарлы түрде ұлғайту, тауарлардың номенклатурасын көбейту мәселелері шешіліп жатыр. Бизнес арасындағы байланыс күшейіп, бірлескен кәсіпорындардың саны арта түсті. Аймақтық ірі жобалар бәрімізге айтарлықтай пайда әкеліп қана қоймай, Орталық Азия экономикасының бүкіл құрылымын да өзгертеді. Көлік-логистика әлеуетінің еселенуі өңірдің қарқынды дамуы үшін берік негіз болады. Сондай-ақ мәдени-гуманитарлық байланыстар жанданып, Орталық Азия мемлекеттері арасындағы қатынастардың одан әрі нығая түсуіне ықпал етеді", – деді Мемлекет басшысы.

Президенттің пікірінше, бұл процестер өңірлік қауіпсіздік пен тұрақтылықты қамтамасыз ету саласындағы нәтижелі диалогпен дәйектелуге тиіс.
Қасым-Жомарт Тоқаев заманауи сын-қатерлердің көбі трансшекаралық сипатқа ие екенін айтты. Сондықтан оларға қарсы тұру үшін күш-жігер біріктіру қажет.
"Бұл жерде, ең әуелі, халықаралық экстремизм мен терроризмге, есірткі тасымалына, қару-жарақ саудасына қарсы күрес туралы сөз болып отыр. Осы орайда Ауғанстанға баса мән беруіміз керек. Бұл елде күрделі әрі түрлі бағыттағы процестер жүріп жатыр. Онда белгілі бір деңгейде тұрақтану, экономикалық жағдайдың жандану белгілері бар екенін мойындау қажет. Екінші жағынан, халықаралық террористік ұйымдардың белсенділігіне байланысты қауіп-қатердің жоғары деңгейі сақталып отыр. Бұған Мәскеу облысында жұртты қанға бөктірген лаңкестік әрекет дәлел бола алады. Біздің ойымызша, Ауғанстанды өңірлік байланыстарға белсенді тарту – дәл қазіргі кездегі стратегиялық міндеттердің бірі. Мұнда көп нәрсе біздің елдеріміздің үйлесімді ұстанымына байланысты. Қазақстанда Орталық Азия мен Ауғанстан үшін БҰҰ-ның Орнықты даму жөніндегі аймақтық орталығын ашу өзекті мәселе деп санаймыз", – деді Қасым-Жомарт Тоқаев.

Мемлекет басшысының айтуынша, бүгінгі басқосу Орталық Азия мемлекеттері басшыларының алтыншы Консультативтік кездесуіне дайындықтың маңызды кезеңі саналады.

Аталған жиын 9 тамызда Астанада өтеді. Сондай-ақ Қазақстан ұйымның биылғы төрағасы ретінде алдағы саммиттің әлеуетін нығайту үшін белсенді жұмыс жүргізіп жатыр.

Айта кетейік, бүгінгі жиынға Қазақстан Қауіпсіздік Кеңесінің хатшысы Ғизат Нұрдәулетов, Қырғызстан Қауіпсіздік Кеңесінің Хатшысы Марат Иманкулов, Тәжікстан Қауіпсіздік Кеңесінің хатшысы Насрулло Махмудзода, Өзбекстан Қауіпсіздік Кеңесінің хатшысы Виктор Махмудов және Түрікменстанның Қазақстандағы елшілігінің әскери атташесі Аннамырат Ягмыров қатысты.

t.me/aqorda_resmi