Шымкентте зейнеткер өмір бойы жинаған ақшасынан айырылып қала жаздады
“Өмір бойы жинаған қаражатым еді”. Шымкентте киберполиция зейнеткердің ірі көлемдегі қаражатын алаяқтан сақтап қалды.
Шымкенттік “CyberPol” қызметкерлеріне 73 жастағы жергілікті тұрғын жүгінді. Өзінің айтуынша, оған белгісіз біреулер телефон шалып, өздерін құқық қорғау органының өкілі ретінде таныстырып, банк шотындағы күдікті операциялар туралы хабарлаған. Ал тексеру жүргізу үшін ер адам телефонына белгілі қосымшаны орнатып, SMS-кодты хабарлауы тиіс екенін айтқан. Бірақ телефон соғушылардан сезіктенген зейнеткер тәртіп сақшыларына жүгінуді жөн көреді.
Полицейлер бұл алаяқтардың бөтеннің ақшасын онлайн жолмен жымқыру түрі екенін жеткізіп, бірден банкке хабарласып, шот бойынша барлық операцияларды бұғаттады. Жедел қабылданған шаралардың нәтижесінде азаматтың 15,5 миллион теңгесін сақтап қалу мүмкін болды.
"Киберполицейлерге үлкен ризашылығымды білдіргім келеді. Олар жедел және үйлесімді жұмысының арқасында менің үлкен сомадағы қаражатымды сақтап калды. Бұл ақшаны балаларыма көмектесу үшін өмір бойы жинаған едім. Міне, дәл осылай жұмыс істеу керек! Сенім артуға болатын қызметкерлер", – деп алғыс білдірді қала тұрғыны.
Polisia.kz