Қуаныштың көз жасы: Президенттен құрметті марапат алған Абай облысының педагогін салтанатты түрде қарсы алды
Абай облысы Ж. Аймауытов атындағы орта мектептің ұстазы Наталья Тегай Астана қаласынан «Қазақстанның еңбек сіңірген ұстазы» деген мәртебелі марапатпен оралды. Ұстазды облыстың білім басқармасы мен білім бөлімінің өкілдері, әріптестері және оқушылары ерекше қошеметпен қарсы алды.
Ұжым мен оқушылар қадірлі ұстазды жас ұрпақты тәрбиелеудегі және олардың шығармашылық қабілеттерін дамытудағы баға жетпес еңбегі үшін алғыстарын айтып, шын жүректен құттықтады.
Кездесу барысында педагог шынайы сезімдерін жасыра алмады. Өз сөзінде ол көпжылдық еңбегін бағалап, жоғары құрмет көрсеткені үшін Президентке шын жүректен алғыс білдірді.
«Бұл марапат – мен үшін тек абырой ғана емес, ұзақ жылғы еңбегімнің бағаланғанының белгісі. Президентке осы құрметі мен ұстаздарды қолдағаны үшін ризашылығымды білдіремін. Біз, ұстаздар, балалардың, еліміздің алдындағы жауапкершілікті терең сезінеміз. Осындай марапат бізді дұрыс жолда екенімізге сенімді ете түседі», – деді Наталья Тегай.
Наталья Тегай – 43 жылдық еңбек өтілі бар ұстаз ғана емес, қазақтың келіні. Ол әрдайым қазақ халқының салт-дәстүрлерін құрметтеп, адалдықпен орындап келеді. Алматы облысының Талғар ауданында дүниеге келген Наталья қайын атасы мен енесіне ерекше қамқорлық танытып, қазақ келінінің міндеттерін үлкен құрметпен атқарған.
Өмірін жас ұрпақты тәрбиелеуге арнаған ұстаздың оқушылары оны ерекше құрметпен және сүйіспеншілікпен бағалайды. Педагогикалық қызметі барысында Наталья Тегай Қазақстан Республикасының Оқу-ағарту министрлігінің және облыс әкімінің Құрмет грамоталарымен марапатталған, сондай-ақ «Ыбырай Алтынсарин» төсбелгісінің иегері. Оның басшылығы мен әдістемелік жұмысының арқасында мектеп үлкен жетістіктерге жетіп, талантты оқушылар өз мүмкіндіктерін жоғары деңгейде жүзеге асыруда.
Ұстаздар күні қарсаңындағы бұл мәртебелі марапат – педагогтің елдің білім саласын дамытудағы ерен еңбегін және ұстаздардың асқақ миссиясын тағы бір мәрте паш еткендей болды.