Иран президенті Ибрахим Раиси мінген Ми-171 тікұшағы жерге өте жайсыз қонған. Бұл туралы IRIB мемлекеттік телеарнасы хабарлады.

Колоннада ұш тікұшақ болған. Министрлер мен басқа да шенеуніктер мінген екі әуе көлігі межелі жерге аман-есен жетіпті. Ал Иран президенті Ибрахим Раиси мен сыртқы істер министрі Хосейн Амир Абдулахиян отырған тікұшақ Әзербайжанда жерге өте жайсыз қонып қалған.

Осы оқиға болғанға дейін Раиси екі елдің шекарасында Әзербайжан президенті Илхам Әлиевпен кездескен. Онда жаңа "Худаферин" және "Гыз-Галасы" су тораптарының ашылу салтанаты өтті.

Түркістан облысының Сарыағаш ауданындағы Сіргелі ауылында үш жасар Асылымның денесі табылды. Ол қарама-қарсы тұрған көрші үйдің әжетханасына түсіп кетіпті.

"18.05.24 сағат 22:50 шамасында табылды. Енді оқиға қалай болғаны жөнінде полициядан хабар күтеміз. Дәлелсіз әртүрлі әңгімеге ермеңіздер. Медициналық сараптама жүргізеді. Нәтижесін күтейік", - деп жазды блогер Gani Museraliuly.

Асылым 16 мамырда жоғалған болатын.

"Таңғы асты ішіп біткен сәтте үлкендер әрлі-берлі жиналғанша ізім-ғайым жоғалды. Түркістан облысының Сарыағашқа жақын Сіргелі ауылы. Шағын ауыл жоқ іздеп өре түрегелді", - деп жазған еді журналист Гүлмира Әбіқай.

Жыл басынан бері есірткі таратқаны үшін кәмелетке толмаған 19 бала ұсталған. ІІМ осы жағдайға байланысты ата-аналарға үндеу жасады.

"Кез келген отбасы есірткі құрығына тап болуы мүмкін. Жыл басынан бері 19 жасөспірім есірткі қылмыстары үшін ұсталды.

Жастар есірткі таратудың және жарнамалаудың құқықтық салдары туралы білсе де, олардың кейбірі есірткінің заңсыз айналымынан бас тартар емес.

Нашақорлыққа қарсы иммунитет қалыптастыруда отбасының айрықша рөлін ескере отырып, ІІМ ата-аналарға жазғы демалыс қарсаңында балалар өміріне барынша көңіл қою керектігін ескертеді.

Өз балаларыңыздың араласатын ортасын білу, олар пайдаланатын интернет-ресурстарды бақылау аса маңызды.

Заттарының ішінен медициналық препараттардың қорабын, фольга немесе шыны түтікшелер байқасаңыз, елеусіз қалдырмаңыз. Мұның бәрі синтетикалық есірткі тұтынуға арналған болуы әбден мүмкін.

Сабақтағы үлгерімінің нашарлауы, сабаққа бармауы және араласатын ортасының өзгеруі ата-ана назарынан тыс қалмауы керек.

Агрессия, аяқ астынан көңіл күйінің өзгеруі, шаршаңқы күйге жиі түсуі де есірткі тұтынып жүргенінің белгілері болуы ықтимал.

Баланың бойынан үш немесе одан да көп осындай белгілер байқалса, тез арада шара қолдану қажет.

Ақша жұмсауы жиілесе немесе қаражаты көп болса, бұл да алаңдауға тұрарлық мәселе. Өйткені баланы есірткі тұтынуға ғана емес, оны таратуға да тартуы мүмкін.

Егер баланың телефоны мен мессенджерлерінен геолокация көрсетілген суреттер, үй қабырғалары мен бағандардағы штамптарды байқасаңыз, бұл да күмән тудыратын жайт. Себебі онда есірткі жасырылған жерлер көрсетілуі мүмкін.

Нөмірлер және түрлі сайттардың сілтемелері жазылған тізімге, изолентаға оралған заттарға да назар салғаныңыз абзал. Есірткі қылмыстары үшін жауапкершілік 16 жастан басталатынын естеріңізге саламыз, – деді ІІМ департамент бастығы – ресми өкілі Шыңғыс Әлекешев.

Polisia.kz

Байқағаным, авторларды ешкім менсінбейді екен. Ақын, жазушы, композитор, мүсінші, суретші қауым! Сіздер бәрінен биіксіздер! Сіздерге деген баға да, құрмет те жоғары болуы керек!

Вы же творцы!

Белден басып, шығармаларымызды пайдалана береді.

Менің де көп әндерімді кавер жасатып, немесе проекттерінде пайдаланып жүр. Рұқсат сұрағаны аз. Сұрамақ түгілі, You Tube-қа салғанда авторын мүлдем көрсетпейді де, жазбайды да. Бұл - біріншіден, авторды сыйламау, құрметтемеу және түскен қаламақыны авторға түсірмеудің бір айласы.

Бірер жыл бұрын "Асыл ананы" бір өте белгілі фармкомпания социальный роликтерінде пайдаланыпты. Сәкен рұқсатын беріпті. Ал мен контрактқа отырып, компаниядан қаламақы өндіріп алдым.

"Ағалардан рұқсат алдық" дейді жаңа бір жігіт, менің бір әнімді киноның эпизодына пайдаланбақшы екен.

"Ол қай ағаң?" десем, "Мейрамбек аға" дейді.

"Мейрамбектің әнге қандай қатысы бар?" деп таң қалдым.

"Әнді орындаған сол кісілер болған соң" дейді. Жас әнші ғой, қайдан білсін...

Авторлар, монетизация мәселесін қолға алатын уақыт баяғыда жеткен. Енді тіпті өтіп кетті.

Кеше, айтпақшы, авторлар қоғамынан болуы керек, жарты жылда 13098 теңге түсіпті. Мұндайға күлу керек па, жылау керек па? Кім біледі? Мазақ қой бұл!

Мазаққа бишара ғана төзеді!

Қандай алшаң басқан, маңдайында жұлдызы бар әнші болса да, әнімді қалағанда мені құрметтеп, сұраған гонорарымды төлемесе, мен бермеймін әнді. Өйтіп, сені, өнерді бағалмайтын әнші орындағанша, ән орындалмай тұра берсін.

Миллиондаған ақшамыз сауатсыздық, көңілжықпастығымыз бен жалған ұятымыздың арқасында басқа қалталарға құйылып жатыр.

Сазгер Айгүл Бажанованың жазбасы

Қазақстан Республикасы Президентінің келісімі негізінде Бас Прокурордың 2024 жылғы 17 мамырдағы бұйрығымен 3-сыныпты мемлекеттік әділет кеңесшісі Айдос Серікқанұлы Майлыбаев Маңғыстау облысының прокуроры лауазымына тағайындалды.

А.С. Майлыбаев еңбек жолын 2001 жылы Жамбыл облысы Тараз қаласы прокурорының көмекшісі лауазымынан бастаған.
Әр жылдары Алматы облысы Жамбыл және Панфилов аудандарының прокуроры, Жамбыл облысы прокурорының орынбасары, Ақтөбе облысы прокурорының бірінші орынбасары қызметтерін атқарған.
Жаңа қызметке тағайындалғанға дейін 4 жылдан астам Ақмола облысының прокуроры болды.
А.С. Майлыбаев заңдылық пен құқықтық тәртіпті нығайтуға қосқан үлесі үшін «Жауынгерлік ерлігі үшін» медалімен және 2-дәрежелі «Айбын» орденімен наградталған.
Прокуратураның құрметті қызметкері.

t.me/GenPr

Құтқару сәті суға тұншығып, дем ала алмай жатқан кішкентай балаға көмекке асыққан полиция қызметкерлерінің бірінің бейнежетонына түскен. Боран-3 автоэкипажы рация бойынша кезекшіден шұғыл шақырту түскен кезде өзіне бекітілген аумақты патрульдеп жүрген.

Тараздағы Айша бибі көшесінің бойында мектеп жанындағы ағып жатқан каналға 2 жасар бала құлап кеткен. Полиция бірнеше минут ішінде шақырту орнына келді. Ол кезде өтіп бара жатқан бір адам баланы ес-түссіз күйде судан шығарып алған. Жедел медициналық көмек бригадасы келгенше, полиция қызметкері 10 минут бойы жүрек-өкпе реанимациясын жүргізді, нәтижесінде бала дем ала бастайды.

"Баланың өмір белгілері болмаса да, мен соңына дейін күресіп, бізге үйретілген барлық дағдыларды қолдана отырып, жүрекке тоқтаусыз массаж жасадым. Көрер жарығы бар екен, өкпеден су шығып, нәресте дем ала бастады", – деді Тараз қаласы ПБ патрульдік полиция батальонының инспекторы Дәурен Колқаев.

Бала облыстық балалар ауруханасына жатқызылды. Қазір оның өміріне қауіп төніп тұрған жоқ.

Polisia.kz

Медеу ауданының прокуратурасы «Медеу» табиғи паркінде заңсыз берілген жер телімдерін анықтады.

Фото: kaz.orda.kz

Ерекше қорғалатын табиғи аумақтарды алып жатқан жерлер, жеке меншiкте бола алмайды.

Алайда 2020 жылы табиғи парк аумағында жеке тұлғалар ауданы 35 га 10 жер теліміне меншік құқығын тіркеген.

Бұған, Горнооктябрь ауыл әкiмшiлiгiнiң 1994-1997 жылдардағы жер учаскелерiн бөлу туралы шешiмдерiнiң бар екендігі жөнінде мұрағаттық анықтамалар негiз болды.

Мұрағаттық анықтама құқық белгілейтін құжат болып табылмайтынына қарамастан, тіркеуші орган меншік құқығын заңсыз тіркеген.

Алматы қаласының прокуратурасы аталған анықтамаларды және жер телімдерін иеліктен шығару жөніндегі кейінгі мәмілелерді жарамсыз деп тану туралы сотқа жүгінді.

Сот шешімімен прокурордың талап-арыздары қанағаттандырылып, «Медеу» табиғи паркіне кадастрлық құны 3 млрд теңге сомасындағы жер қайтарылды.

Сонымен қатар сотқа қатысуды қамтамасыз еткен Медеу ауданы прокуратурасының өтінішхаты бойынша меншік құқығын тіркеу кезінде жіберілген бұзушылықтар үшін сот кінәлі тұлғалардың жауаптылық мәселесін қарау жөнінде жеке ұйғарымдар шығарды.

Алматы қаласының прокуратурасы

Семейде бір үйдің 16 және 18 жастағы ұлы мен қызы бір айдан аса уақыт бұрын жоғалып кеткен болатын.

Фото: 31-арна кадры

Іздеу іс-шаралары Ұлттық ұланның, полицияның, құтқарушылардың, еріктілердің, сондай-ақ белсенді азаматтардың күштері мен құралдарын тарта отырып жүргізілген. Сөйтіп, жоғалған жасөспірімдердің үлкені енді ғана өлі күйінде табылып отыр.

"15 мамырда 18 жасар қыздың денесі "Құрылысшы" профилакториясының маңында судан табылды. Аталған дерек бойынша сотқа дейінгі тергеу жүргізіліп, бірқатар сараптамалар тағайындалды", - деп хабарлады Абай облысының Полиция департаментіндегілер.

Ал ұлды іздеу жалғасып жатыр. Полиция басшылығы қайғылы қазаға байланысты көңіл айтты.
"Туыстарына және жақындарына қайғырып көңіл айтамын", — деді Абай облысы ПД бастығы Бектөре Сұлтан.

Айта кетейік, Алтынай Әбішева мен Абзал Әбішев биыл 7 сәуірде жоғалып кеткен болатын. Олар осы күні сағат 15-16 шамасында үйден шығып кетіп, сол күйі оралмаған.

Аймақтарда балалардың жазғы демалысын ұйымдастыру шаралары аяқталды. Бұл туралы ҚР Премьер-министрінің орынбасары Тамара Дүйсенованың төрағалығымен өткен кеңестерде облыс әкімдерінің орынбасарлары баяндады.

Биыл 3 млн-нан аса баланы белсенді жазғы демалыспен қамту жоспарланған. Оқушылар үшін 10 мыңнан аса лагерь қызмет көрсетпек. Балаларға демалыстан бөлек жас ерекшеліктеріне қарай түрлі танымдық шаралардың ұйымдастырылуы биылғы жаз мезгілінің басты өзгешелігі болмақ.

Бастауыш сынып оқушыларының жан-жақты дамуы үшін мектеп жанындағы лагерьлер жұмыс істемек. Одан бөлек, әр түрлі танымдық шаралар қарастырылып отыр. Мәселен, Атырау облысында «Kids university» жобасы шеңберінде балалар уақытша «студенттік билет» алып, бірнеше күн ерекше сабақтар арқылы ғылым әлеміне бойламақ.

Орта сынып оқушыларына экскурсиялық-туристік бағдарламалар ұсынылатын болады. Балалар туған өлкесінің тарихи, мәдени мұраларымен танысу мүмкіндігіне ие болады.

Мысалы, Солтүстік Қазақстан облысы ауыл мектептерінің оқушылары үшін Петропавл қаласына сапарлары ұйымдастырылады. Мұнда оларға шаһардың көрнекі орындары көрсетіліп, тарихи ескерткіштер мен мұражайларға танымдық саяхаттар қарастырылады.

Шығыс Қазақстан өңірінде балаларға «Қонақжай отбасы» жобасы ұсынылады. Оның аясында ниет білдіргендер қазақ тілін меңгеруге және аймақтың әсем табиғаты мен мәдениетімен танысуға мүмкіндік алады. Жобаға қатысушылар 20 күн бойы ауылдық елді мекендердегі отбасыларда тұратын болады.

Жоғары сынып оқушылары үшін колледж бен жоғары оқу орындары базасында мамандандыру бағытындағы бірқатар шаралар жүзеге асырылады.

Оқу-ағарту министрлігінің дерегінше, әлеуметтік жағынан аз қамтылған отбасылардан шыққан балалардың 94%-ы қамтылатын болады.

Су тасқыны салдарынан зардап шеккен аймақтардың балалары ерекше назарда болады. Тасқын басталған кезден бастап 614 бала оқу-сауықтыру орталықтарында болған. Қазіргі таңда ол нысандарда 629 бала демалып жатыр. Жазғы демалыс кезінде 3 833 баланы демалыс және сауықтыру шараларымен қамту жоспарланған.

«Оқу-ағарту министрлігі аймақтардағы оң тәжірибелердің кеңінен таралуын қолға алуы тиіс. Шараларды ұйымдастыру кезінде балалардың қауіпсіздігіне баса мән берілгені жөн. Бүгінде демалыс, сауықтыру орындарын тексеру және қабылдау кестесі бекітілген. Оның сақталуын мүдделі мемлекеттік органдар мен өңір әкімдіктері тұрақты бақылауда ұстауы қажет», — деп атап өтті Тамара Дүйсенова.

primeminister.kz

Қазақстан Республикасында заңсыз ойын бизнесі мен лудоманияға қарсы іс-қимыл бойынша 2024-2026 жылдарға арналған кешенді жоспар Ашық НҚА порталына талқылауға шығарылды.

Фотоколлаж: egemen.kz

Кешенді жоспарды іске асыру нәтижесінде мынадай көрсеткіштерге қол жеткізілетін болады:

- құмар ойындарға және бәс тігуге тұрақты қатысатын адамдар саны 350 000-нан 201 600 адамға дейін төмендейді: 2024 жылы – 35 000 (10%), 2025 жылы – 63 000 (20%), 2026 жылы – 50 400 (20 %);

- мемлекет есебінен тегін емдеу және медициналық-әлеуметтік оңалту бойынша көмек алған, құмар ойындарға патологиялық тәуелділіктен зардап шегетін адамдарды қамтуды 13-тен 300 адамға дейін ұлғайту: 2024 жылы – 50 адам, 2025 жылы – 150 адам, 2026 жылы – 300 адам;

- бұғатталған интернет-казинолар мен заңсыз букмекерлік сайттардың санын 4500-ден 7722-ге дейін ұлғайту: 2024 жыл – 450-ге (10 %), 2025 жыл – 990-ға (20 %), 2026 жыл – 1782-ге (30 %).

«Осыған байланысты Қазақстан Республикасында заңсыз ойын бизнесі мен лудоманияға қарсы іс-қимыл бойынша 2024-2026 жылдарға арналған Кешенді жоспардың іс-шараларын іске асыруға 2024-2026 жылдарға арналған республикалық бюджеттен 80 931 200,0 теңге қаржы шығыстарын бөлу көзделеді», - делінген құжатта.

kaz.inform.kz