Финалда екі-ақ боксшымыз қалды

Kazsport agent 2013 M07 9
158
0
0
0

Ертең финал. Ақтық айқаста бас жүлдеге екі жерлесіміз таласады. Өкінішке қарай, қалған екі боксшымыз жартылай финалда сүрінді.   Татарстан астанасы Қазанда өтіп жатқан жазғы Универсиада ойындарының...

Ертең финал. Ақтық айқаста бас жүлдеге екі жерлесіміз таласады. Өкінішке қарай, қалған екі боксшымыз жартылай финалда сүрінді.

 

Татарстан астанасы Қазанда өтіп жатқан жазғы Универсиада ойындарының бокс бәсекесі шарықтау шегіне жақындап қалды. Ертең финал. Ақтық айқаста бас жүлдеге екі жерлесіміз таласады. Өкінішке қарай, қалған екі боксшымыз жартылай финалда сүрінді.

Жартылай финалда Қазақстан құрамасының төрт боксшысы өнер көрсеткен. Бірақ 49 келідегі шымкенттік Ержан Жомарт оңтүстік кореялық Инкю Кимнен айласын асыра алмады. Жекпе-жекті тәп-тәуір бастап, бірінші раундты өз пайдасына шешкен жерлесіміз қалған екі раундта кәріс жігітінің қарқынына төтеп бере алмады. Нәтижесінде, қола жүлдемен шектелді.

Одан кейін 56 келідегі алматылық Рустам Рустамовтың шеберлігіне тәнті болдық. Моңғол марғасқасы Идерху Енгхжарғалмен жұдырықтасқан жерлесіміз қарсыласын оп-оңай жеңді десек, күпірлік болмас. Себебі, екінші раундта Рустамның мықтылығын мойындаған бір төреші тіпті 10:8 нәтижесін көрсетті. Дегенмен, финал алматылық боксшы үшін оңай болмайын деп тұр. Қарсыласы ресейлік Сергей Водопьянов. Әлем чемпионы деген дардай атағы бар Сергей талайды сескендірген серке боксшы.

75 келіде ақмолалық Нұрдәулет Жармановқа үміт артқанбыз. Обалы не керек, жерлесіміздің жеңіске деген құштарлығы көрініп-ақ тұрды. Алайда өте тартысты өткен айқаста өзбекстандық Азизбек Абдугофуровтан аса алмады. Үш төрешінің біреуі Нұрдәулеттің жеңісін мойындаса, қалған екеуі Азизбекті жеңді деп шешіпті.

Ал аса ауыр салмақ дәрежесінде Жан Кособуцкийдің жанкешті жұдырықтасуын көрдік. Жартылай финалда белорус Ян Судзилускимен жұдырықтасқан жерлесіміз 3:0 есебімен жеңіске жетті. Енді ол финалда ресейлік Магомед Омаровпен жұдырықтасады. Ол да оңай шағылар жаңғақ емес. Тегі Дағыстаннан шыққан бұл боксшы 2011 жылы Еуропа чемпионы атанған.

 

Финалдық жұптар:

49 келі: Хасанбоу Дусматов (Өзбекстан) – Инкю Ким (О. Корея)

52 келі: Енхделгер Харху (Моңғолия) – Миша Алоян (Ресей)

56 келі: Рустам Рустамов (Қазақстан) – Сергей Водопьянов (Ресей)

60 келі: Адлан Абдурашитов (Ресей) – Фазлиддин Гаибназаров (Өзбекстан)

64 келі: Артур Кираян (Армения) – Раджап Бутаев (Ресей)

69 келі: Хуршидбек Норматов (Өзбекстан) – Андрей Замковой (Ресей)

75 келі: Дмитро Митрофанов (Украина) – Азизбек Абдугофуров (Өзбекстан)

81 келі: Дмитрий Бивол (Ресей) – Олександр Гвоздюк (Украина)

91 келі: Рустам Тулаганов (Өзбекстан) – Евгений Тищенко (Ресей)

91+ келі: Магомед Омаров (Ресей) – Жан Кособуцкий (Қазақстан)

 

Алаш-Арена

 

Оцените пост

0
Дальше