Бүгін қабылданған «Масс-медиа туралы» заңда қандай өзгерістер бар?
Бүгін Мәжіліс депутаттары «Масс-медиа туралы» туралы заң мен кейбір заңнамалық актілерге масс-медиа мәселелері бойынша өзгерістер мен толықтырулар енгізуді қарастыратын заңды қабылдады.
Фото: egemen.kz
«Масс-медиа туралы» туралы заң Президент қол қойып, күшіне енгеннен кейін «Бұқаралық ақпарат құралдары туралы» және «Телерадио хабарларын тарату туралы» заңдардың күші жойылады.
Бұл заңда мынадай негізгі жайттар қарастырылған:
- БАҚ материалында құқық бұзушылық болғаны туралы шағым беруге болатын мерзім сол материал жарияланғаннан кейінгі 1 жыл деп бекітілді;
- Заңда журналистің кәсіби қызметіне берілетін құқықтық кепілдіктер бекітіліп, масс-медианың негізгі міндеттері нақтыланған;
- Заңнан «бұқаралық ақпарат», «діни телебағдарлама», «теле-, радиоарнаны тіркеуге қою туралы куәлік» деген түсініктер алып тасталып, оған «журналистің ерекше мәртебесі», «аккредитацияның жеңілдетілген тәртібі» сияқты жаңа түсініктер енгізілген;
- БАҚ өкілінің сауалдарына олар жіберлігеннен кейінгі 5 жұмыс күні ішінде сол сұрақ қойылған тілде жауап берілуге тиіс;
- Телевизия мен радиода қазақтілді және отандық контент көбейеді. 2025 жылдан бастап теле-радиоарналардағы мемлекеттік тілдегі және отандық өнімдердің үлесі жалпы көлемнің 55 пайызынан кем болмауы керек. Ал 2027 жылдан бастап бұл көрсеткіш 60 пайызға жеткізілмек;
- Шетелдік теле-радиоарналарды ретрансляция жасау көлемі, керісінше, 20 пайыздан 10 пайызға дейін қысқарады;
- Мемлекеттік теле-радиоарналарды қоғамдық көліктерде көрсетуді қамтамасыз ету мен бақылау құзыреті облыстар мен республикалық маңыздағы қалалардың әкімдіктеріне беріледі;
- Сайттардың барлығы интернет-басылымға теңестіріледі. Интернет-басылымдар бұқаралық ақпарат құралының бір түріне жатқызылады және олар заңға сәйкес тіркелуге тиіс.