Ауылдың дамуы – ел болашағының берік негізі

Ауыл халқының тұрмыс сапасын арттыру, өңірлердің экономикалық әлеуетін күшейту және тұрғындарға қолайлы өмір сүру ортасын қалыптастыру – мемлекет дамуының маңызды міндеттерінің бірі. Мемлекет басшысы Қасым-Жомарт Тоқаев 28 қазанда жариялаған «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында осы мәселелерге ерекше назар аударды. Президент ауыл-аймақтарды дамыту және халықтың әл-ауқатын жақсарту мемлекеттік саясаттың назарында қала беретінін атап өтті.

Мемлекет басшысының Жолдауында көтерілген мәселелердің ішінде ауыл тұрғындарының лайықты өмір сүруіне жағдай жасау бастамасын ерекше атап өткім келеді. Өйткені ауыл – халқымыздың рухани тамыры, ұлттық құндылықтарымыз бен дәстүріміздің сақталған ортасы ғана емес, еліміздің әлеуметтік-экономикалық дамуының маңызды бөлігі.

Президенттің «Біз ауыл-аймақтарды дамыту мәселесін әрдайым ерекше бақылауда ұстаймыз» деген сөзі ауылдық елді мекендердің болашағына қатысты мемлекеттік ұстанымды айқындайды. Бұл бағытта инфрақұрылымды жаңғырту, әлеуметтік қызметтердің қолжетімділігін арттыру, жергілікті экономиканы дамыту және халықтың өмір сүру сапасын жақсарту өзара сабақтас міндеттер деп есептеймін.

Менің ойымша, ауылдың дамуын тек жол салу, жаңа ғимараттар тұрғызу немесе инженерлік инфрақұрылымды жақсартумен шектеуге болмайды. Ең алдымен, ауыл тұрғындарының білім алуға, сапалы медициналық көмекке, тұрақты жұмысқа және кәсіби дамуға қол жеткізу мүмкіндігі кеңеюі қажет. Әсіресе, қала мен ауыл арасындағы әлеуметтік мүмкіндіктер алшақтығын қысқарту маңызды.

Жоғары оқу орнының оқытушысы ретінде бұл мәселеге білім беру тұрғысынан ерекше мән беремін. Бүгінде ауылдан шыққан жастардың арасында қабілетті, ізденімпаз, үлкен мақсаттарға ұмтылатын азаматтар аз емес. Алайда олардың барлығы бірдей сапалы білім беру ресурстарына, заманауи технологияларға және кәсіби бағдар алуға тең дәрежеде қол жеткізе бермейді. Сондықтан ауыл жастарына жасалатын мүмкіндік – тұтас елдің адами капиталына салынған инвестиция.

Осы ретте университеттер мен ауыл мектептері арасындағы байланысты күшейту, кәсіби бағдар беру жұмыстарын жүйелеу, цифрлық сауаттылықты арттыру және ауыл жастарын ғылыми, шығармашылық жобаларға тарту маңызды деп санаймын. Жастардың туған жерінде қалып, кәсіби тұрғыдан дамуына немесе білім алып, кейін өз өңірінің өркендеуіне үлес қосуына нақты жағдай жасалуы тиіс.

Президент Жолдауында қуатты қалалардың қуатты аймақтарды қалыптастырудағы рөлін де атап өтті. Меніңше, бұл ұстаным қала мен ауылды бір-біріне қарсы қоюды емес, олардың экономикалық және әлеуметтік байланысын нығайтуды көздеуі керек. Өңір орталықтарының дамуы ауыл тұрғындары үшін де жаңа мүмкіндіктерге жол ашқаны маңызды.

Қорыта айтқанда, ауылдың өркендеуі – тек мемлекеттік органдардың ғана емес, білім беру мекемелерінің, кәсіпкерлердің және тұтас қоғамның ортақ міндеті. Ал оның нақты нәтижесі ауыл тұрғындарының күнделікті өміріндегі оң өзгерістермен өлшенуі тиіс. Ауылда сапалы білім алып, еңбек етіп, лайықты өмір сүруге мүмкіндік болғанда ғана өңірлердің дамуы орнықты сипат алады. Ел болашағы үшін ең маңыздысы да – осы.

Назира Касымбекова,

UIB Университетінің оқытушысы