Максимум репост!
Маңғыстау облысының әкімі Ералы Тоғжанов мырзаның өткен аптада өлкедегі қоғам белсенділерімен, блогерлермен, халық арасында беделді азаматттармен кездесуі қалай болғанда да, айта қаларлықтай маңызды оқиға деп есептеймін. Бұл үшін әкім жəне оның командасына белгілі бір дәрежеде алғыс білдіру керек! Біздің мақсатымыз – "көрмес түйені де көрмес" принципімен қай нәрсеге де әкімді кінәлі етіп шығару емес, не жағымпаздықпен "жақсысын асырып, жаманын жасыру" да емес, "ақты ақ, қараны қара деп айтатын" конструктивті диалог болса керек. Сондықтан, бұл тұрғыдан алғанда, жекелеген ұсақ-түйек кемшіліктерді есептемегенде "Тоғжанов кездесуінен" мен жеке басым бірталай прогресс байқағандықтан, жақсы деген баға беремін. Бұл бағаны әкімнің сын-пікір қабылдауға деген прогрессивті талпынысы үшін ғана емес, сын-пікірлер мен ұсыныстардан нәтиже шығаруға берген уәдесі үшін де қоюға әбден болады.
Осы орайда жиында да айтылған, жалпақ жұртқа да айта кетпеуге болмайтын бір мәселе жөнінде әңгіме қозғағым келіп отыр. Ол – 8 млрд теңгеге жобаланып, құрылысы 2011 жылы басталып, 2014 жылы аяқталуға тиіс болған, алайда, құрылыс жұмыстары кезінде конструктивті бөліктерінің жарылуы мен бүгілуі себепті тоқтап қалған "Аққу" шағынауданының 1-кезегі туралы болмақ.
Айтылған құрылыс нысандары Маңғыстау облысы мемлекеттік сәулет құрылыс бақылау, қадағалау және лицензиялау департаментінің ұйғарымы негізінде "құрылыс жүргізу талаптарына сай келмейді" деген шешіммен тоқтатылғанымен, кейін жұмыстар қайта басталып, тіпті қазіргі облыс әкімі бұл жобаны жалғастыруға тапсырма да беріп, жергілікті құрылыс компаниялардың күшімен жұмыс жалғасып жатыр.
Енді біз айтар болсақ, ешқандай құрылыс нормаларына жауап бермейтін осы жоба дереу тоқтатылуы қажет! Құрылыс мамандарының пікірінше, "СНиП" нормалары бойынша осы көпқабатты тұрғын үйлерді салуға қажет бетонның маркасы М-300-ден, класы В22,5-тен кем болмауы қажет болса, Аққу-1 кешеніндегі үйлерді салуға қолданған бетондардың класы В5-тен, маркасы М75-тен аспайды. Бұл - не деген сөз? Бұл – пайдалануға берілген үйлер бірнеше жыл өтпей жатып, салмақты көтере алмай қирайды деген сөз. Біз Елбасы тапсырмасын орындап жатқан жоқпыз, әлеуметтік жағынан аз қорғалған жандарға баспана тұрғызып жатқан жоқпыз, біз баяу жарылатын бомбаны іске қосып жатырмыз. Ана үйлерге ертең жанынан баз кешкен, өмірден түңілген адам болмаса, ешкім тұрмайды. Тұрса да, көп ұзамай Қарағандыдағы "Бесоба" кешені сияқты опырылып құлайтыны анық. Трагедиялық салдары болуы әбден мүмкін. Сол жағдайда апатқа ұшыраған жандардың обалын кім мойнына алады?!
Осы жайттарды ескере отырып, облыс әкімін айтылған нысандағы құрылыс жұмыстарын дереу тоқтатуға шақырамын!
Ал осы құрылысты жобалау кезінде, алғашқы каркастарын салу кезінде өрескел заңбұзушылықтарға жол берген жауапты тұлғалар, қатысы бар мемлекеттік қызметкерлер неге жауапқа тартылмайды?! Неге мемлекеттің миллиардтаған қаражатын желге ұшырған лауазымды шенеуніктердің аттары аталмайды?! Қатардағы мемлекеттік қызметкердің бес-он мың теңге пара алғанын көре қалатын "қырағы һəм сақ" сыбайлас жемқорлықпен күресуші құқық қорғау органдары осындай аса ірі көлемдегі мемлекет қаржысын талан-таражға салу, ысырап ету фактілеріне келгенде неге "мүлгіп кетеді"?! Неге 100-200 мың теңге пара алды деп айыпталған, бірақ, халқы мен арынан басқа сүйенері жоқ қарапайым жандар бес-он жылға шырылдап сотталып кете барады да, осындай тікелей мемлекетке ондаған миллиард залал келтірген дөкейлер жазасын алудың орнына қызметтері жоғарылап, өсіп кетеді?! Осындайда əйгілі "Бандитский Петербург" фильмінің кейіпкері, қылмыстық авторитет "Антибиотиктің" "В наше время, можно украсть велосипед и всё здоровье отдать в тюрьме, а можно воровать вагонами и всегда оставаться на плаву. В России красть составы гораздо безопаснее, чем велосипеды" деген қанатты фразасы еріксіз еске түседі. Фильмнің оқиғасы өткен ғасырдың 90-шы жылдарында Ресейде өткен болса, бұл жағдай айна-қатесіз қазіргі күндері Қазақстанда қайталанып отыр. Ащы параллель, ашындыратын факт, əрине!
Сонда осының бəрін көріп-біліп, шенеуніктердің тəтті өтіріктеріне сеніп не сенген болып үндемей отыра береміз бе?! Заң алдында бəрі тең емес пе? Заң бәріне бірдей ортақ болатын болса, бүкіл халық болып, олар да тиісті жазасын алуын талап етуіміз керек. Бұл өзіміз үшін қажет. Егер біз бүгін үндемей бұғып қалсақ, бұндай жағдайдың ертең тағы қайталанбасына, адам шығыны болмасына, ол адам, сіз бен біз болмасымызға кім кепіл?!
Сондықтан, достар, биліктен "Аққу-1" тұрғын үй-кешеніндегі жұмыстардың тоқтатылуын, аққуға емес, қарғаға ұқсап, қараған адамның үрейін ұшырып, қаламыздың сəнін кетіріп тұрған құбыжық құрылыстың қаңқасын бұзып, алып тастауын бәріміз бірігіп, талап етейік!
Максимум лайк, максимум репост! "Моя хата с краю" деген принципке орын болмасын!
Уайыс Ерсайынұлының парақшасынан алынды