Билет алып, концертке кіре алмай қалу дәуірі аяқтала ма? Қазақстанда қауіпсіз қайта сату платформасы іске қосылды
Сүйікті әртісіңіздің концертіне немесе көптен күткен спорттық матчқа билет тауып, бірақ іс-шара күні оның жарамсыз болып шығуы – көрермен үшін ең жағымсыз жағдайлардың бірі. Әсіресе билет үшін қомақты қаржы төлеп, басқа қаладан арнайы келген кезде мұндай жағдай үлкен шығын мен көңіл қалдыруға әкеледі.
3 маусым күні Алматыда өткен Freedom Impressions Talk алаңында Freedom Lifestyle Group компаниясының атқарушы директоры Ерлан Есімсейтов Қазақстанда концерттер мен ірі спорттық шараларға арналған билеттерді қауіпсіз қайта сатуға мүмкіндік беретін жаңа цифрлық платформаның іске қосылғанын мәлімдеді.
Оның айтуынша, соңғы жылдары танымал концерттер мен халықаралық спорттық жарыстар кезінде қайталама билет нарығындағы тәуекелдер көбейген. Кей жағдайларда бір билет бірнеше адамға қатар сатылып, іс-шараға тек бірінші болып келген адам ғана кіре алған.
– Мұндай жағдайлар көрермен үшін үлкен проблемаға айналуы мүмкін. Адам қымбат билет сатып алып, басқа қаладан немесе елден арнайы келуі ықтимал. Бірақ соңында іс-шараға кіре алмай қалу қаупі бар. Сондықтан бұл нарықты барынша ашық әрі қауіпсіз ету маңызды болды, – деді Ерлан Есімсейтов.
Осы мәселені шешу үшін Freedom Ticketon арнайы қайталама билет сату платформасын іске қосты. Жүйе сатушы мен сатып алушы арасындағы мәміленің қауіпсіздігін қамтамасыз етуге бағытталған.
Жаңа платформаның басты ерекшелігі – төлемнің бірден сатушыға түспеуінде. Сатып алушы билетті таңдағаннан кейін қаражат арнайы жүйеде уақытша сақталады. Билет көрерменге іс-шара күні беріледі. Тек билет қолданылып, адамның нысанға кіргені расталған соң ғана ақша сатушының шотына аударылады.
Бұл механизм билеттің түпнұсқалығын тексеруге, алаяқтық тәуекелдерін азайтуға және сатып алушылардың құқықтарын қорғауға мүмкіндік береді.
Сонымен қатар компания стадиондар мен ірі іс-шара өтетін алаңдарда жаңа цифрлық технологияларды сынақтан өткізіп жатқанын хабарлады. Қазіргі уақытта пилоттық жоба орталық стадионда жүргізілуде. Егер жоба тиімділігін дәлелдесе, бұл шешімдер басқа спорттық және концерттік нысандарға да енгізілуі мүмкін.
Әлемнің көптеген елінде қайталама билет нарығы бұрыннан қалыптасқан тәжірибе саналады. Қазақстандағы жаңа платформа да халықаралық стандарттарды ескере отырып әзірленген. Оның негізгі мақсаты – азаматтарға билетті қауіпсіз сатып алу мүмкіндігін ұсыну және мәдени әрі спорттық іс-шараларға деген сенімді күшейту.
Сарапшылардың пікірінше, цифрлық шешімдердің дамуы көрермендер үшін ғана емес, бүкіл ойын-сауық индустриясы үшін маңызды қадам болмақ. Өйткені қауіпсіз билет нарығы – көрермен сенімінің басты кепілі.
