Берік ЖАҒЫПАРОВ: «ЖЕЗҚАЗҒАН ЕКІНШІ ЖАҢАӨЗЕНГЕ АЙНАЛЫП КЕЛЕДІ»

Қазақ Ұлтшылы 2013 M02 19
664
0
0
0

«Егер билік өкілдері бұл іске араласпаса, Жезқазғанда екінші Жаңаөзен орын алуы мүмкін. Біз ешкімді қорқытып отырғанымыз жоқ, тек «Қазақмыс» басшылығының бассыздығы халықтың ашу-ызасын келтіріп...

«Егер билік өкілдері бұл іске араласпаса, Жезқазғанда екінші Жаңаөзен орын алуы мүмкін. Біз ешкімді қорқытып отырғанымыз жоқ, тек «Қазақмыс» басшылығының бассыздығы халықтың ашу-ызасын келтіріп отыр. Мұның арты жақсылыққа апармайды». Бүгін Алматыда «Молодежная газетаның» бас редакторы Берік Жағыпаров ұйымдастырған баспасөз жиынында жезқазғандықтардың жағдайын дәл осылай бағалады.

http://janaozen.net/94-azamat/berk-zhayparov-zhezazan-eknsh-zhaazenge-aynalyp-keled.html?lang=kz

Атап өту керек, жезқазғандық журналистті 9 ақпанда «Қазақмыс» жұмысшыларының «заңсыз наразылық шарасын» ұйымдастырды деп 7 тәулікке қамауға алған еді. Журналистің айтуынша, жексенбі күні полицияның 5 автокөлігі мен 30 құқыққорғау қызметкері үйін айнала қоршауға алып, күшпен бөлімшеге алып кеткен. Сөйтіп бір күн қамауға алынып, келесі күні 11 ақпанда әкімшілік жаза қолданған.

Баспасөз конференциясында Берік Жағыпаров Жезқазғандағы жалғыз тәуелсіз басылымның жабылуы мен тиражының ұрлануы «Қазақмыс» басшылығының тапсырмасымен жасалғанын мәлімдеді. Мемлекет басшысы, үкімет, парламент депутаттарының корпорация басшылары Ким мен Огайдың жемқорлық фактілерін назар аударып, оны тоқтатуға шақырды. Мәселен, осыған дейін «Қазақмыстағы» заңбұзушылықтарды айыптаған ардагерлер кеңесінің төрағасы Мырқы Ақпанбетов те оңбай «таяқ жеген». Ақсақалды қызметінен қуып шығаруға тырысқан.

Белгілі болғандай, жақын уақытта жұмысшылар қысқаруы мен жаңа кен орындарының ашылмауынан Жезқазған қаласынан «Қазақмыс» корпорациясы кететін болса, қала халқының 60 пайызы жұмыссыз қалуы мүмкін. Бұған қоса, таяуда жұмысшылардың медициналық мекемелері жабылған.

«Халықтың 60 пайызы «Қазақмыста» жұмыс істейді. Корпорация қызметін тоқтататын болса, бәрібір де үлкен наразылық болады. Соңғы жылдары жаңа кен орындары ашылған жоқ, демек, болашақта жұмысшылар қысқарады. Кен орнын ашу Атом электростанциясын ашумен бірдей, салынуына 10 жыл уақыт кетеді. Қазіргі таңда жұмысшылар қысқартылып жатқандықтан, «Қазақмыс» қызметі тоқтауы мүмкін», - деді Б.Жағыпаров.

Сонымен бірге, «Қазақмыстағы» қаржылардың қалай жымқырылатынын айтып беріп, тәуелсіз аудиторлық тексеру жүргізу қажеттілігіне назар аудартты. «Ондағы шынайы жағдайдың қандай екеніне көз жеткізу үшін тәуелсіз аудиторлық тексеру жүргізу қажет. Мысалы бұрын мыстың өз бағасы 2000 АҚШ доллары болса, қазір 8000 доллар. Бірақ бағасын өсіру үшін қажетті техниканың, құрал-жабдықтардың бағасы өскен жоқ. Сондықтан бұл еш себепсіз өсіру. Басшылық шын мәнінде мыстың бағасы 6000 доллар, ал кірісі 2000 доллар дейді. Дегенмен, ол ақшаның жартысы өз қалталарына кетіп жатыр», - дейді ашынған журналист.

Жиында жария болғандай, корпорация тіпті, автокөліктер есебінен де қаржы табатын көрінеді. Мысалы, корпорация көліктерінің барлығы жеке меншік компанияның қол астында екен. Егер басшылықтағы бір лауазымды тұлғаға 80000 долларға «Ландкрузер 200» көлігін сатып алса, ол көлікті қайта жеке меншік компанияға қызмет көресету үшін береді. Сөйтіп қызмет көрсеткені үшін 1 млн теңге төленеді екен. Егер жүргізушінің жалақысы 50 мың теңге, жанармайға 50 мың теңге көлемінде ақша жұмсалса, қалған 900 мың теңгенің қайда кететіні белгісіз.

«Жұмысшылар жалақысын жоғарылатуға ат салысқан кәсіподақ жетекшісі Сәуле Сейдахметованы жұмыстан шығарған соң, олардың жалақысы бірден 15 пайызға төмендеп кетті. Әкімшіліктің сайлаған кәсіподақтары пайда болды. Енді жұмысшылардың құқығын қорғайтын адам жоқ. Егер билік өкілдері бұл іске араласпаса, Жезқазғанда екінші Жаңаөзен орын алуы мүмкін. Біз ешкімді қорқытып отырғанымыз жоқ, тек «Қазақмыс» басшылығының бассыздығы халықтың ашу-ызасын келтіріп отыр. Мұның арты жақсылыққа апармайды», - деді ол.

Ал баспасөз жиынының соңында Берік Жағыпаров «Қазақмыстағы» ұрлық пен жемқорлықты, бассыздықты қоғамға жария ету үшін SEKRETOVJEZA.NET веб-сайтын ашатынын мәлімдеді. Жаңа ақпарат құралы арқылы билік пен қоғам назарын жұмысшылар жағдайына аудартқысы келеді.

 

Оцените пост

0