"Ойна" жеңіл әзілдермен "Ойнамайды"

Павлодар өңірінде танымал бола бастаған «Ойна» ән мен әзіл отауы талғампаз көрерменмен қайта қауышпақ. Үстіміздегі жылғы желтоқсан айының тоғызыншы жұлдызында облыс орталығындағы Естай атындағы...

Павлодар өңірінде танымал бола бастаған «Ойна» ән мен әзіл отауы талғампаз көрерменмен қайта қауышпақ. Үстіміздегі жылғы желтоқсан айының тоғызыншы жұлдызында облыс орталығындағы Естай атындағы мәдениет сарайында өнер ұжымы кезекті әзіл өрнегін ұсынады. Бір әттеген-айы, аталмыш ұжым бастапқыда жергілікті мәдениет басқармасынан ешқандай қолдау көрмепті. Бұл туралы  http://alashainasy.kz/culture/20830/ жазылған. Оқуға және http://www.youtube.com/watch?v=EFOQGmt9yF0 болады!

Жуырда өнер иелері – Алмаз Хасенов және Алтынбек Мұқышевпен тілдесудің сәті түсті.

-                     «Тәуелсіз концерт» атты кеште павлодарлықтарды қандай сый күтіп тұр? Нендей жаңашылдықтар бар?

- Біз әу бастан авторлық әзілдерге ден қойғанбыз. Белгілі бір әзіл-сықақ театрларының туындыларын «көшірмейміз». «Бауыржан-шоуда», «Шаншарда» қойыл­ған әзілдерді қайта қойып, халықты күлдіру қаншалықты қиын екенін өзіңіз де ойлай беріңіз. Сапасыз, адамдарға ой салмайтын қалжыңның дәурені өтті, сондықтан авторлық әзілдерге ден қоюдамыз. Жаңашылдықтар туралы айтсақ, концертімізге «Бауыржан-шоу» таетрының жетекшісі, ҚР-ның еңбек сіңірген әртісі Бауыржан Ибрагимов пен «Терісқақпай» театрының жетекшісі Ұлан Нүсіпәлиев қатыспақ.

- Білуімізше, ән мен әзіл отауы құрылған сәттен бері жергілікті мәдениет басқармасы тарапынан ешқандай қолдау көрсетілмепті...

- Құдайға шүкір, қазіргі кезде қолдау бар. «Ойналықтар» адамның шымбайына ба­татын, әлеуметтік мәселелерді қаузайтын астарлы қалжыңмен өз көрермендерін баурап алды. Алдағы концертімізден соң еліміздің бірқатар облыстарын аралап, Ресейдің Омбы қаласына сапарлап қайту жоспарда бар.

- Концерт беру  - оңай дүние емес екені түсінікті. Дегенмен, жылына бір-ақ рет шығармашылық кеш өткізу аздық етпей ме?

- Сөзіңіздің жаны бар. Шынымен де, концерт ұйымдастыру - машақаты мол жұмыс. Қыруар қаржы да керек. Негізгі мақсат – мол қаржыға кенелу емес, халықтың көңілінен шығып, батасын алу. «Жазушы бір кітап жазу үшін мың кітап оқиды» демекші, жыл бойы шығармашылық ізденіс үстінде боламыз. Сол себепті, көрермендерімізбен жылына бір рет қауышудың өзі біз үшін зор ғанибет деп білеміз.

- Қай өнер ұжымының болмасын, өнеріне шынайы бағасын беретін көзайым – көрермен. «Ойнаның» сырт көз – сыншыларға ұсынып жүрген әзілдері қаншалықты салмақты?
– Біздің ойымызша, өмірде орын алып жатқан әр құбылыстан қалыс қалмай, өкшелеп отыру қажет. Себебі, бір күн ақпарат көзінен құр қалсаңыз, көптеген дүниеден қалыс қалуыңыз ғажап емес. Ол үшін үздіксіз іздену керек, тынбай еңбектену қажет. Әрине, көрерменнің көңілінен шығатын сапалы дүниелер жасауға тырысамыз. Қандай іске бой ұрсақ та, оны ыждаһаттылықпен жасап, жауапкершілігін жете түсінеміз. Біз әрбір қойылымды жан-жақты пысықтап, әбден піскен шағында ғана сахнаға шығарамыз. Соңғы екі жыл бойы кәсіби режиссермен қоян-қолтық еңбек етудеміз. Өйткені, ертеңгі күні жасаған дүниеміз халықтың сарабынан өтпей, шала болып жатса - бізге сын. Сондықтан, мүмкіндігімізше қойылымдарымыздың сапалы, сәтті шығуы жолында аянбай тер төгудеміз.

- Еліміздің өзге өнер театрларымен байланыстарыңыз қаншалықты берік?
– Көптеген театр ұжымдарымен сәлеміміз түзу, тығыз байланыста жұмыс жасаймыз. Жиі кездесіп, пікір алмасып, ой бөлісіп тұрамыз. Уақыт санап театрлардың қатары көбейген сайын, бәсеке де күшейе түсуде. Бәсеке бар жерде, нәтижелі жұмыстың болатынына күмән жоқ. Сондықтан, өнер театрларының бүгінгі тыныс-тірлігіне әбден көңілім толады. Келешекте де өзіндік қолтаңбасымен ерекшеленетін өнер ұжымдарының қатары көбейетініне сенімдімін. Бүгінгі таңда оған толық мүмкіндігіміз бар, талантты жас-тар да жетерлік, тек ерінбей еңбектенуіміз қажет. Біздің ұжымда жеті өнерлі жас бар. Халық арасында «Жеті қарақшы» деген атпен танымалмыз.

- «Ойна» ән мен әзіл отауы өзін-өзі толық қамтамасыз ете ала ма, әлде демеушілеріңіз бар ма?
– Қазір демеушіге қарап отыратын жағдайда емеспіз. Өз-өзімізді қамтамасыз етуге тырысып жатырмыз. Халық ортасында жүргендіктен, негізгі демеушіміз – көрермен. Әрине, шығармашылығымызға бас иіп, көмегін ұсынатын демеушілеріміз бар. Оларға алғыс айтамыз.

- Өнерлерің өрлей берсін!

   

Оцените пост

0
Дальше