Осы кездесудің алдында Владимир Крикунов жаттықтыратын астаналық хоккейшілер Мәскеу облысында жергілікті «Атлант» командасын 3:1 нәтижесімен жеңіп, үш ұпай олжалаған болатын. Ал оған дейін біз елордалықтардың Астанада «Амур» клубын ұтқанын хабарлағанбыз.
«Атлантпен» бәсеке басталмас бұрын Ресей хоккейінің басшылары «Барыстың» бас бапкері Владимир Крикуновқа арнайы сыйлықтарын табыс етті. Ұзақ жылдар бойы бапкерлікпен айналысып келе жатқан маман осы саладағы 1000-шы бәсекесін Астанада «Амурға» қарсы өткізген еді.
Енді ойынның тікелей өзіне тоқталайық. Осы кездесудің қарсаңында «Барыс» екі рет қатарынан жеңіске жетсе, оның қарсыласы «Локомотивтің» алты сериядан тұратын жеңісті жолын Омбының «Авангарды» үзген болатын. Ярославльдіктер өз мұзайдындарында өткен сол кездесуде 2:5 есебімен ойсырай ұтылғандықтан, бар ашуларын астаналық ұжымнан алатындары түсінікті еді. Расымен де, дәл солай болды. Матч басталғаннан-ақ айдын иелерінің шеберлік деңгейлері тым жоғары екені байқалды. Олар ойын барысын еркін қадағалап, алғашқы минуттардан «Барыс» қақпасын нысанаға алды. 12- минутқа дейін айдын қожайындары Теему Лассила қорғаған қақпаны төрт-бес рет нысана етті. Ал бұл аралықта біздің жігіттер тек бір мәрте ғана Семен Варламов иелігінде қауіпті жағдай туындата алды.
Ал ойынның 14-минутында «Локомотив» хоккейшісі Александр Черников тәртіп бұзып, екі минутқа айыпкерлер орындығына отырғызылды. Бірақ біздің ұжым сан басымдығын пайдалана алмады.
Бірінші кезең аяқталар тұста «Барыстың» ойыншысы Виталий Новопашин де екі минутқа айдыннан қуылды. Алайда астаналықтар жанталаса жүріп қорғанып, қақпаларын голдан аман алып қалды.
Үзілістен кейін алғашқы өткір шабуылды елордалықтар ұйымдастырды. Дегенмен Семен Варламов қорғаған қақпаның құлпы бұл жолы да бұзылмады. Есесіне айдын иелері кездесудің 24-минутында есеп ашып кетті. Алексей Калюжный гол авторы атанып, жанкүйерлердің қошаметіне бөленді. Оның алдында ғана «Барыстың» сапындағы Константин Пушкарев шайбасыз келе жатқан ойыншыға шабуыл жасағаны үшін екі минуттық айып арқалаған еді. «Локомотив» сан басымдығын ұтымды пайдалана алды. Есеп - 1:0.
Бұдан кейін Брендон Боченски «Локомотив» қақпасына соққы жасады, бірақ оның бағыттаған шайбасы Семен Варламовтың қолынан табылды. Іле-шала Федор Полищук ержеден аттап, «Барыс» тағы екі минут төрт ойыншымен өнер көрсетуге мәжбүр болды. Бұл жолы да айдын қожайындары өздеріне берілген тамаша мүмкіндікті пайдалана білді. Виктор Козлов шығарған пасқа Дмитрий Куликов үн қатып, «Барыс» қақпасына екінші гол енді.
Тағы бір сәтте «Локомотив» ойыншыларының қауіпті шабуылына қақпашымыз Теему Лассила тосқауыл болды. Әйтпегенде есеп тіптен ұлғаяр еді. Десек те көп ұзамай таблодағы нәтиже 3:0-ге өзгерді. Ярославльдіктер біздің ұжымның қорғаныс шебіндегі түсініспеушілікті тиімді пайдаланып, кезекті шайбаларын соқты. Артем Анисимов нәтижелі пас шығарса, көк сызықтан соққы жасаған Марк Флад гол авторы атанды.
Осыдан кейін-ақ бас бапкер Владимир Крикунов қақпашы Теему Лассиланың орнына Павел Полуэктовты шығарды. Көп ұзамай «Барыс» хоккейшілері тағы да тәртіп бұзды, бұл жолы Алексей Литвиненконың жүйкесі сыр берген еді. Дегенмен арада 40 секундтай өткенде «Локомотив» ойыншысы Сами Леписте де екі минутқа кездесуден қуылып, екі жақтың саны теңесті.
Ойынның 36-минутында «Локомотив» өкілі Марк Флад пен біздің Константин Пушкарев шекісіп қалып, төрешілер екеуін де айып уақытымен жазалады. Дәл осындай оқиға кездесудің 39- минутында да орын алды. Бұл жолы астаналық Брендон Боченски мен Сами Леписте төрешілердің шешімімен мұзайдыннан қуылды. Екінші кезеңде үш гол соққан айдын иелері үзіліске жеңімпаз ретінде аттанды.
Кездесудің 45-минутында ярославльдіктер кезекті рет өткір шабуыл ұйымдастырды. Бірақ олардың жолына Алексей Литвиненко ереже бұзу арқылы тосқауыл болды. Төрешілер еш ойланбастан буллит белгіледі. «Хоккей пенальтиін» Александр Черников дәл орындап, таблодағы есеп 4:0-ге өзгерді.
«Барыс» ойыншылары кездесудің соңына қарай Варламов қақпасынан саңлау тапты. Дәлірек айтсақ, ойынның 58-минутында Максим Спиридонов пен Виктор Хедман әріптестері Константин Руденконың гол енгізуіне мүмкіндік туғызды. Есеп - 4:1.
Қалған аз уақытта таразы басын теңестірудің мүмкін емесін екі жақтың ойыншылары да жақсы түсінді. Бірақ айдын төсіндегі бәсеке қызу жалғаса берді. Әсіресе, «Барыс» хоккейшілері гол соғуға асық еді. Ақыры олардың сол ниеттері қабыл болып, есеп айырмасы қысқарды. Бұл жолы Найджел Доус мергендік танытты. Голмен бір мезетте кездесу уақытының аяқталғанын білдірген дабыл да естілді. Екі жағдайда да біздің хоккейшілер сан басымдығын пайдаланып, шайба енгізген болатын. Қорытынды есеп - 4:2, «Локомотив» 25 ұпаймен «Батыс» конференциясының турнир кестесінде қайтадан 1- сатыға көтерілді. Ярославльдіктер өткен жолғы жеңілістен кейін орындарын «Лев» командасына босатып берген еді.
«Барыс» осы жолы ұпайсыз қалса да «Шығыс» конференциясының турнирлік кестесінде 7-орыннан төмендемеді. Владимир Крикуновтан тәлім алатын елордалықтар 14 ойында 20 ұпай жинады. Дәл осыншама ұпай 8-орындағы Новокузнецкінің «Металлургінде» де бар. Ал біздің командадан бір саты жоғары тұрған Уфаның «Салауат Юлаевы» 14 кездесуде 21 ұпай еншіледі.
Құрлықтық хоккей лигасының тұрақты біріншілігінің жалпы кестесінде Новосібірдің «Сибирь» ұжымы жеке-дара көш бастап келеді. Бұл клуб 15 ойында 29 ұпай олжалаған болатын. Бірақ оның 2-сатыдағы «Локомотивтен» екі ойыны артық екенін де естен шығармайық. Үздік үштікті Челябінің «Тракторы» түйіндеп тұр, бұл команданың еншісінде 27 ұпай бар. Челябіліктер соңғы кездесуінде көш басындағы «Сибирьден» 1:2 есебімен ұтылып қалды. Бұрынырақта ортаңқол ұжым саналып келген «Сибирь» биыл жарап-ақ тұр. Оның қашанға дейін үздіктер сапында болатынын уақыт көрсетер.
«Барыс» кезекті ойынын бүгін Нижний Новгородта өткізеді, қарсыласы - жергілікті «Торпедо».
Шалқар ЕСТЕН
