ru
Default banner
Разное
426 450 жазбалар45 тіркелуші
Всяко-разно
0

Желаяқтар енді әлем чемпионатына дайындалады


Азияның 43 елінің мыңға жуық спортшысы қатысқан «Сары құрлық» додасында 7-орынға тұрақтады. Ал көш басында – әдеттегідей, қытайлық атлеттер.

Үндістанның Пуна қаласында жеңіл атлетикадан Азия біріншілігі мәресіне жетіп, «Спорт падишасының» қазақстандықөкілдері елге екі алтын, бір күміс, екі қола медальмен оралды. Сөйтіп, Азияның 43 елінің мыңға жуық спортшысы қатысқан «Сары құрлық» додасында 7-орынға тұрақтады. Ал көш басында –әдеттегідей, қытайлық атлеттер.

Бірінші алтынды Қазақ еліне көп­сайыс­тан Дмитрий Карпов сыйлады. Әдетте найза лақтыруда қапы қалып жүрген жер­ле­сіміз ақырындап бұл көрсеткішін де жақ­сартып келеді. Азия біріншілігінде Карпов қарсы­ластарынан алғашқы бағ­дар­ламаларда-ақ ұзап кетті. Нәтижесінде, 8037 ұпай жинап, құрлық рекордын жаңарт­ты. Екінші орын жапон жігіті Нака­му­ра Акихикоға бұйыр­ды. Күміспен күп­тел­ген ол қарағандылық спортшыдан бақан­дай 417 ұпайға артта қалып қойып­ты. Ал үздік үштікке өзбекстандық Леонид Андреев ілікті.

Енді Карпов екі апта демалып, одан кейін та­мыз­дың 10-ы мен 18-і аралығында Мәс­­­кеуде өтетін әлем чемпионатына дайын­­далады. Ал келесі жылы Оңтүстік Корея­ның Инчхон қаласында өте­тін жазғы Азия ойындарына қатысқысы келетінін жасыр­мады.

– Сол додада Рио де-Жанейро Олим­пиа­дасының лицензиялары сарапқа салынбақ. Әлбетте, бірінші ретте өзімнің мүмкіндігіме қараймын ғой. Дегенмен егер бабымда болып, бағым жанып, Олимпиада жол­да­масына қол жеткізіп жатсам, онда Рио де-Жанейродан қалмаймын, – деп қосып өтті Карпов.

Иә, жасыратыны жоқ, Дмитрий Карпов қазір нағыз бабында. Бұрынғы рекордт­та­рын жаңартып жатпаса да, соған жете­қа­был көрсеткіштерді көрсетуде. Азия чем­пио­натының алдында Чехияның Кладно қаласында өткен халықаралықтурнирге қатысып, күміспен күптелген. Енді міне, дүниежүзілік додада атой салмақ. Мейлі, әлем біріншілігінде алдыңғы қатардан көрінуге шамасы жетер, ал Олимпиадада ел намысын абыроймен қорғай алар ма? «Шеберлігіне күмән келтірмейміз», дегенмен, 2016 жылы Диманың жасы 35-ке келеді екен. Қанша жерден тәжірибелі болса да, жалындаған жастардың қар­қы­нына төтеп бере ала ма? Ал егер, шынымен де, бабы мен бағы бір арнада түйісіп, Риоға барар болса, бұл оның төртінші Олим­пиадасы болмақ. Афины Олим­пиа­дасының қола жүлдегері деген атағы бар, бәлкім, Вино­куров секілді спортпен қоштасарында алтынмен апталып қалар.

Азия чемпионатында атой салған өзге спортшыларымыздың көрсеткіштеріне тоқ­та­лайық. Құрама қоржынына екінші алтын­ды Виктория Зябкина салды. 200 метрге жүгіруде сынға түскен жерлесіміздің фи­нал­ға дейінгі көрсеткіштері көңіл көнші­тер­ліктей болған жоқ. Есесіне, ақтық сын­да ба­рын салып, мәре сызығын 23,62 секундта жүгіріп өтті де, басты бәсекелесі үндістандық Ашу Ройдан 0,09 секундқа озып кетті. Ал 100 метрге кедергілер арқы­лы жүгірген та­ғы бір жерлесіміз Анастасия Сопру­но­ва­ның алтынға қол жеткізуі үшін, керісінше, 0,09 секунд жетпей қалды да, 13,44 се­кунд­тық көрсеткішпен күмісті қанағат қылды.

Қалған екі қолаға үш қарғып секіруде Ирина Эктова биіктікке секіруде Марина Аитова қол жеткізді. Эктова 13,75 метрге секірген. Ал Аитова 188 сантиметрмен шек­телді. Айта кетейік, бүгінде Азия рекор­ды­ның иесі — Марина. Осыдан төрт жыл бұрын жерлесіміз 199 сантиметрге секір­ген болатын. Өкінішке қарай, кейін жара­қат алып қалды да, қайта бабына келе алмай жүр.

Сонымен жалпы есепте жетінші орынға орналасқан Қазақстан құрамасы алғаҚытай, Бахрейн, Жапония, Сауд Арабиясы, Өзбекстан және Үндістанқұрамаларын жіберіп алды.

Вячеслав Сокирко, жеңіл атлетикадан Қазақстан ұлттыққұрамасының бас бапкері:

– Биылғы маусымда негізінен жастардың әлеуеттерін байқайық деп шештік.Өйткені бізде буын алмасу кезеңі жүріп жатыр. Кешегі жеңімпаздардың орнын лайықты басатын жастар керек. Ал бізде дарындар аз емес. Тек оларға мүмкіндік беру қажет. Әлбетте, әлем чемпионатын да естен шығармаймыз. Сол сияқты, келесі жылы Азия ойындарына да дайындықты барынша жалғастырамыз. Биылғы жылдың қазан айынан бастап, жазғы Азиадаға дайындалуға кірісеміз. Сол үшін қыркүйек айында барлық бапкерлердің басын қосып, жоспарларымен таныстырамыз.

 

Асфендияр ЖАНАДІЛ