Жауынгерлік парадқа дайындықтың қорытындылау кезеңі өтті
Бүгін «Отар» 40-шы әскери базасында Жауынгерлік парад дайындығының соңғы кезеңі өтті. Бұл 7 мамырда өтетін Отан қорғаушылар күнін мерекелеуге дайындықтың қорытындылау кезеңі болды.
Құрлық әскерлері және Әуе қорғанысы күштері зымырандарды, бомба лақтыруды нақты іске асыруды жүргізді, қару-жарақтың барлық түрлерінен жауынгерлік атыстарды көрсетті. «Отар» 40-шы әскери полигонындағы басты дайындықты жүргізу барысына жетекшілік ету үшін Қазақстан Республикасының Қорғаныс министрі Әділбек Жақсыбеков келді.
Полигонда дайындықтың аяқталуы жөнінде Қорғаныс министрінің бірінші орынбасары – Қазақстан Республикасы Қарулы Күштері Бас штабының бастығы генерал-полковник Сәкен Жасұзақовтың қатысуымен Қазақстан Республикасы Президенті жанындағы Орталық коммуникациялар қызметінің ресми өкілі Алтай Әбибуллаевтың брифингі өтті. Брифинг ortcom.kz, bnews.kz сайттарында және «24.kz» арнасының тікелей эфирінде көрсетілді.
Жауынгерлік парадтың дәстүрлі әскери парадтан басты ерекшелігі Қазақстан жауынгерлерінің кәсіби шеберліктерін, Қазақстан армиясының қолданысындағы қазіргі заманғы қару-жарақтың түрлері мен әскери техниканың нақты қолдануын жан-жақты көрсету мүмкіндіктері болады.
Шерудің әуеде өтетін құрамдас бөлігінде Әскери-әуе күштері майдан және әскери авиацияның ұшақтары мен тікұшақтарын таныстырады. Әуеде Су-25, Миг-29, Су-27, Л-39 және басқа да ұшақтар жұмыс істейтін болады. Ең шебер ұшу өнерінің тәсілдерін «Жетісу» және «Сұңқар» топтары көрсетеді.
Жауынгерлік шеруге қазақстандық Әскери-әуе күштерінің қолданысына алғаш рет түскен «Airbus Military» концерні шығарған С-295 турбиналы-винттік ұшақтар қатысады. Олар әуе десантын түсіруді жүзеге асырады, сонымен қатар ұшақты тегістелген жерге жасалған ұшып-қону жолағына қондыру мүмкіндіктерін көрсетеді. Жауынгерлік шеруге қатысатын ұшу аппараттарының үштен бірі әскери авиация тарапынан ұсынылады. Қазақстанда құрастырылған тік ұшақтар қатыстырылады.
Жаттығуларда Әуе қорғанысы күштерінің әуе шабуылына қарсы қорғаныс қабылетін С-125 зенитті-зымыранды кешені таныстырады. Иммитациялық әуе нысаналарына басқарылатын зенитті ракеталарды ұрыстық тұрғыда бағыттау іске асырылады. Жауынгерлік шеру барысында Құрлық әскерлерінің шынжыр табанды және дөңгелекті техникалары өз тапсырмаларын атқарады. Арнайы мақсаттағы топтар «Кобра» және «Хаммер» әскери техникаларында жұмыс істейтін болады.
Шеру есептоптарының құрамына Қарулы Күштер бөлімшелері, әскери оқу орындары, сонымен қатар ІІМ Ішкі әскерлері, ҰҚК Шекара қызметі, Төтенше жағдайлар министрлігі, Республикалық ұланның рәсімдік батальоны енгізілген.
Жауынгерлік шеруге барлығы 7 мыңнан астам әскери қызметші, 400-ден аса әскери техника, 80-нен ұшақ мен тік ұшақ қатысады. Жауынгерлік шеруді өткізу барысында «Казахстан инжиниринг» Ұлттық компаниясы АҚ құрамына кіретін қазақстандық қорғаныс өнеркәсібі кешенінің кәсіпорынында шығарылған байланыс құралдары мен қару-жарақтары, жаңғыртылған және жаңа әскери техникалар көрсетіледі.
Шеруде әскери, азаматтық және қосалқы міндет жүктелген арнайы техникалар, оның ішінде штабтық, жауынгерлік, медициналық, іздестіру-құтқару машиналары, радиожелілік стансалар, ЕС-145 тікұшақтары, ұшқышсыз ұшу аппараттарының түрлері көрсетілетін болады.
Мемлекеттік телеарналарда тікелей эфир желісі бойынша әскери іс-қимылдардың іс жүзінде атқарылуы көрсетіледі және Қазақстанның барлық тұрғындары тұңғыш рет ҚР Қарулы Күштерінің Жауынгерлік шеруін дәл уақытында тамашалай алатын болады.
Шеруді ҚР ҚК Құрлық әскерлерінің Бас қолбасшысы «Даңқ», «Айбын» және «Отанға қызметі үшін» ордендерінің иегері, генерал-лейтенант Мұрат Майкеев басқарады.
– Жауынгерлік шеруді өткізуге санаулы күндер қалды. Қазір осы маңызды оқиғаға әскерлеріміз сақадай – сай деп нық сеніммен айтуға болады, - деп атап өтті генерал-лейтенант Мұрат Мәйкеев. – Шеруге қатысу үшін ең үздік және лайықты сарбаздар таңдалып алынды. Артқан сенімді ақтау үшін олар өзара орындалатын іс-қимылдардың, әрекеттердің үздіксіз және қойылған тапсырмалардың дер кезінде орындалуына қол жеткізуге күш жігерлерін аяған жоқ.
ҚР ҚМ Баспасөз қызметі