ҚР Ұлттық музейінде мүсінші Алексей Четвериковтың "Жан күйзелісі" атты көрмесі өтуде. Көрмеге мүсіншінің асқан шеберлігін көрсететін 250-ге жуық туындылар қойылды. Экспозицияларға мүсінші ағаш, металл, мәрмәр, сүйек сынды әр түрлі материалдарды пайдаланған.
Қола, ағаш, мәрмәрдан жасаған жұмыстарына қарап оның жан-жақтылығын көрсек, таяқ немесе тарақ сынды бұйымдардан істелген бірегей өнер туындыларынан талантын мойындаймыз.
Тіпті, кейбір экспонаттар ұсақ пластикадан толыққанды дара мүсінге дейін өзгерген. Мүсіндер арқылы ол қоршаған орта әдемілігін, үйлесімін көрсетуге тырысты.
Алексей Четвериков өнертанушылардың жоғарғы көркемдік бағасын алған үлкен мұра қалдырды. "Жан күйзелісі" көрмесі талантты мүсіншінің тұлға ретінде көп қырлы екендігін ашады.