Қызылордада қазақтың даңқты балуаны, Олимпиада ойындарының жеңімпазы, әлем чемпионы Жақсылық Үшкемпіровтің жүлдесі үшін грек-рим күресінен жастар арасында өткен республикалық турнир өз мәресіне жетті.
Бұл жарысқа республикамыздың барлық аймағынан келген 200-ден аса үміткер қатысты. Алғашқы күні төрт салмақдәрежесі бойынша жеңімпаздар мен жүлдегерлер анықталды. Осы турнирде топ жарған балуандарға спорт шебері атағы берілетіндіктен, боз кілемге шыққан өрендердің барлығы да барын салуға тырысты.
50 және 96 келі салмақ дәрежесінде жарыс қожайындары топ жарды. Олар – Мейірман Әлізақ пен Ерсайын Сайфуллин. Алғашқысы шешуші тұста өзінің командалық әріптесі Нұржан Сәтмағамбетовті ұтса, екіншісі Қырғызстаннан келген Қамбар Жорабековті жеңді. 50 және 60 келі салмақтарда Жамбыл облысының өкілдері – Дастан Үскенбеков пенӘбунәсір Өмірзақ озды.
Келесі күні де тартысты бәсекелер өз жалғасын тапты. 55 келі салмақтың бас жүлдесі «айыр қалпақты» ағайындарға бұйырды. Ақтықайқасқа дейін алқынбай жеткен Осконбай Абдупатаев астаналық Ахмет Ізбасқаннан айласын асырды. 66 келі салмақта Жәнібек Қандыбаевқа теңкелер ешкім табылмады. Тараздың тастүлегі финалда шымкенттік Абылайхан Әмзеевті сүріндірді. Жас балуанның асқан шеберлігіне тәнті болған төрешілер алқасы осы турнирдің ең үздік балуаны ретінде Жәнібекті арнайы сыйлықпен марапаттады. 84 келі салмақта Санжар Бағашардың шоқтығы биік болды. Финалда ол Оңтүстік Қазақстан облысының өкілі Рашид Кочиевті қапыда қалдырды. Осы орайда Санжар балуандар әулетінен шыққан дарынды жастардың бірі екенін айта кеткен жөн. Оның әкесі Бақтияр Байсейітов грек-рим күресінен әлем және Азия чемпионы, Азия ойындарының жеңімпазы, КСРО халықтары спартакиадасының күміс жүлдегері. 120 келі салмақта Шығыс Қазақстан облысынан келген Салават Ахметқалиевтың асығы алшысынан түсті.