Қазақстандық теннисші Зарина Дияс Малайзияда өтіп жатқан WTA турнирінің ширек финалында жарыстың бірінші ракеткасы словакиялық Доминика Цибулковамен ойнайды.

Екінші айналымда Цибулкова Тайвань спортшысы Си Сувэйді 6:1, 6:2 есебімен тізе бүктіріп, ширек финалға жолдама алды.

Ал жерлесіміз З.Дияс болса, өз кезегінде итальяндық теннисші Джулия Гатто-Монтиконені 6:1, 6:4 есебімен жеңген болатын. 20 жастағы спортшымыз бірінші айналым матчында Грекияның 31 жастағы спортшысы Элени Данилидуді 6:2, 6:2 есебімен ойсырата ұтқандығын естеріңізге салайық.

Айта кетейік, Куала-Лумпурда өтіп жатқан халықаралық доданың жалпы сыйақы қоры 250 мың АҚШ долларын құрайды.

 

Автор: Жасұлан Жолдыбаев

Басты сөздер: Спорт

АСТАНА. ҚазАқпарат