«Жаңа ғана аяқталған кешкі сессияда Бабыржан Момынов (75 кг), Арман Рысбек (81 кг), Асқар Абдоллаев (91 кг) және Қамшыбек Қоңқабаев (+91 кг) жеңіске жетті. Өкінішке қарай, 69 келі салмақта өнер көрсеткен Сағадат Рахманқұлов франциялық Вастин Алексиске есе жіберіп алды. Ол енді қола медальдің иегері. Сонымен, ертең 3 маусым күні болатын финалдық сайыстарға барлығы 8 қазақстандық боксшы шаршы алаңға шығып, ел намысын қорғайды» — деді ҚР Қорғаныс министрлігі спорт комитетінің Армия Орталық Спорт Клубының баспасөз хатшысы Жібек Анарбаева.
Естеріңізге сала кетейік, күндізгі сессияда Олжас Байниязов (49 кг), Олжас Сәттібаев (52 кг), Қайрат Ералиев (56 кг) және Бекман Сойлыбаев (60 кг) финалға жолдама алған болатын. Ал, 64 келі салмақ дәрежесінде өнер көрсеткен Елдос Сарқұлов жартылай финалда Тунистік Аала Шилиден жеңіліп, біріншіліктің қола медалін місе тұтты.
Ертең финалдық кездесулер күндізгі сағат 14:00- де «Достық» спорт кешенінде басталады. Ал «KAZsport» телеарнасында тікелей трансляция жүргізіледі. Біріншіліктің жеңімпаздарына бағалы сыйлықтар табыс етіледі.