Серік Ахметов Сочи қаласының олимпиадалық спорт нысандарында болды

Ресей Федерациясына Мемлекет басшысының тапсырмасымен ҰҚШҰ ұжымдық қауіпсіздік кеңесінің сессиясына қатысуға келген ҚР Премьер-Министрі Серік Ахметов Сочиде саммит басталар алдында бірқатар олимпиадалық спорт нысандарында болды.

Бұл туралы primeminister.kz сайты хабарлады.

С.Ахметов «Үлкен» мұз айдыны сарайын, «Адлер-Арена» жабық коньки тебу орталығын және «Айсберг» мұз айдыны спорт сарайын аралап көрді.

Премьер-Министр спорт құрылыстарының сапасын және жобалардың ауқымын жоғары бағалады.

«Біз Сочидің Олимпиадаға даярлығының ауқымынан зор әсер алдық. Ойындар жоғары деңгейде өтетініне күмән жоқ. Қысқы Олимпиадалық ойындарды өткізуде табыстар тілеймін» — деді ҚР Премьер-Министрі.

Еске сала кетейік, ХХІІ қысқы Олимпиадалық ойындар Сочиде 2014 жылғы 7-23 ақпан аралығында өтеді.

АСТАНА. ҚазАқпарат