28.09.12.
Серік Ахметов Премьер ретінде жаңа қалыптастырылған Министрлер кабинетінің тұңғыш отырысын өткізді. Осында ол Үкімет мүшелеріне масайрап, арқаны кеңге салмауға қадап, кеңес берді. Мәсімов Үкіметінде болған министрлердің көбі өз креслоларында қалғаны мәлім. Алайда оларға мұның «мәңгілікке» еместігі ескертілді. «Бүгінгі күннен бастап, Үкіметтің барлық мүшелері үшін жұмыстың жаңа кезеңі басталады! - деді жиынды ашқан Серік Ахметов. - Бізге Елбасы үлкен сенім көрсетіп отыр. Және де тек маған ғана емес, осы отырған барлығымызға! Сондықтан біз мемлекет басшысының биік сенімін ақтауға міндеттіміз».
Ел басшылығы Үкіметтің дәл осы құрамы, дәл осы командамен Қазақстан алдында тұрған жаңа міндеттерді жасампаздықпен шешуге қауқарлы деп шешіпті. Алайда біраз уақыттан кейін әр министрліктің жұмысы жеке-жеке бағаланбақ. Сонда кемшіліктер кездесіп, олқылықтары әшкереленсе, ішінара ауыс-түйіс жүруі мүмкін.
- Біз өз Үкіметіміздің тиімді жұмыс жасауға және Президенттің атқарушы билік алдына қойған міндеттерін ұтымды шешуге қабілетті екендігін дәлелдеуге тиіспіз! - деп шегеледі С.Ахметов. Ол жаңа Министрлер кабинетіне сабақтастықты сақтау жүктелгендігін еске салды. Яғни бұған дейін қабылданған стратегиялық бағдарламаларды жүзеге асыруды жалғастыруы қажет. «Біздің Үкімет алдыңғы Үкіметте түзілген тәжірибені пайдаланатын болады» деді жаңа Премьер.
Серік Нығметұлы «Үкімет мүшелерінің негізгі бөлігі өз орындарын сақтағандығын» айта келе: «Алайда бұл арқаны кеңге салуға себеп емес, керісінше, бұл қызметімізді жандандыруға түрткі болуға тиісті, - деді. - Біз Елбасының барлық тапсырмаларын нақты және жедел орындауымыз қажет!» Осылайша жаңа Премьер бұған дейін түзілген тәртіпті қатаң сақтайтындығын анық аңғартты.
Жаңа Үкімет басшысы Парламентпен, билеуші «Нұр Отан» партиясымен сындарлы өзара іс-қимылды ары қарай жалғастыратындығын атап өтті. Қалаулылар мен Үкімет мүшелері арасындағы осындай тығыз әрі өзара түсіністікке құрылған қарым-қатынас жаһандық дағдарыс тұсында жедел шаралар қабылдап, қиындықтан құтылуға мүмкіндік берді. Қазақстан Көшбасшысы әлемдік күйзелістің келесі толқыны соғады деп күтіліп отырған қазіргі шақта қос билік арасындағы осы ынтымақтастықты құлдыратып алмай, қайта күшейтуді тапсырған. С.Ахметов те «Үкімет пен Парламент арасында қазігі кезде өзара ықпалдастықтың жақсы форматы қалыптасқан» деп бағалады.
- Біз әлемдік дағдарыстың қайталану қаупін жоққа шығармауға тиіспіз, - деді бұл ретте Серік Нығметұлы. - Үкімет қадам-қадам бойынша нақ жазылған дағдарысқа қарсы жоспарды әзірледі, ол экономиканың өсімін сақтауға және тұрақты макроэкономикалық жағдайды қамтамасыз етуге бағытталған. Біз әлемдегі ахуалға мұқият мониторинг жүргізуді жалғастырамыз және жаһандық экономиканың дамуындағы барлық қатерлерге үн қатамыз.
Президенттің жаңа Үкімет құрамын жеделдетіп бекітуі үшжылдық бюджеттің уақытынан кешікпей, іске қосылуына жол ашты. Заң шығарушы билікке 2013, 2014 және 2015 жылдардың басты қаржылық құжатын Мәсімов Үкіметі енгізген болатын. Осыдан бір апта бұрын қалаулылар оны Үкімет мүшелерімен талқылауды бастаған еді. Ал жаңа Үкіметтің тез іске кірісуі арқасында депутаттарға тіпті бюджетті әр сала бойынша қарау кестесін өзгертудің де қажеті болмапты. «Парламентке енгізілген жаңа үшжылдық бюджет жобасы, Президенттің тапсырмасы бойынша барлық қабылданған бағдарламаларды тиімді жүзеге асыруға бағдарланған. Біздің бірінші кезекті міндетіміз - осы құжатты депутаттармен бірлесіп, қабылдау!» деп тапсырды Үкімет мүшелеріне С.Ахметов.
Ахметов басқаратын Үкімет Қазақстанды «жаһандық еркін сауда кеңістігіне» алып кіруі қажет! Осы орайда жаңа Премьер БЭК және еліміздің алдағы ДСҰ-ға енуі аясындағы интеграциялардың тиімділігін қамтамасыз етуді жүктеді.
Ахметов жетекшілігіндегі Үкіметтің еншісіне Қазақстан Көшбасшысының жаңа идеологиясын іске асыруды бұйырып отыр. Осы орайда жаңа Премьер ұлттық заңнаманы өзгерту қажеттігін мәлімдеді. Өмірге жолдама алатын заңдық өзгерістер Президенттің «Жалпыға Ортақ Еңбек Қоғамына қарай 20 қадам» атты мақаласында айтылған қоғамды әлеуметтік жаңғыртуға ықпал ететін көрінеді.
Серік Ахметов 2020 жылға дейінгі Қазақстан дамуының стратегиялық жоспарына сәйкес, бес басты бағыт айқындалғандығын, индустрияландыруға, тұрғын үй құрылысына, білім беруге, денсаулық сақтауға, ауызсуға, жұмыспен қамтуға қатысты барлық қажетті мемлекеттік бағдарламалардың қабылданғандығын Үкімет мүшелерінің есіне салды.
- Біздің міндетіміз - осы бағдарламалардың жүзеге асырылуын қамтамасыз ету, - деді жиналғандарға Серік Ахметов. - Бастысы - олардың қайтарымы болуға тиіс! Егер біз күтілген нәтижені көрмесек, онда уақыт созбай, ол бағдарламаға бөлінген бюджет қаражаттарын басқа салаға қайта бағыттауымыз қажет, - деген ол Үкімет мүшелеріне барлық бағдарламалардың орындалу барысына талдау жүргізу, қажет болған жағдайда, Үкіметке оларға түзетулер енгізу бойынша ұсыныс жасау туралы тапсырма берді.
Жиын соңында С.Ахметов Министрлер кабинетінің барлық өкілдерін, өңірлік дамуға екпін түсіретін жаңа ұстанымдарға сәйкес, аймақтармен белсендірек жұмыс жүргізуге шақырды.
- Үкіметтің қызметіне жататын, күшті сарқа пайдалануды талап ететін басқа да маңызды салалар туралы да ұмытпауға тиіспіз! Президент бізді нәтижеге бағдарлап, нұсқау берді. Бізден нақты жұмыс істеуді күтіп отыр. Біз Мемлекет басшысының осы үмітін ақтауға тиіспіз, - деп жиынды қорытты Премьер-Министр Серік Ахметов.
Жаңа Үкіметтің бірінші жиыны осымен тәмамдалды. Министрлер өздеріне жүктелген істерге қызу кірісетін ынта-ыңғаймен тарасты.
Айхан ШӘРІП
