Алаш арыстарының бірі саналатын, ұлы жазушылар биігіне көтерілген классик-жазушымыз Социалистік Еңбек Ері Ғабит Махмұтұлы Мүсіреповтің шығармалары сондай аласармас биіктерге көтерілген. Ғабең бұл биікке алғаш жарық көрген «Тулаған толқында» хикаятымен және «Қос шалқар», «Алғашқы адымдар», «Шұғыла», «Талпақ танау», тағы басқа әңгімелеріндегі тосын да қуатты сөз өрнегімен көтеріліп, оқырманды да, әдебиетшілерді де елең еткізген-ді. Ғабең сол шыққан биіктерінен төмендеп, аласарып көрген емес, керісінше Ғабең ұрпаққа «Әдебиет ұлы болмай, халық ұлы болмайды» деген ұлы өсиет сөзін қалдырды.
Ғабеңнің иронияға, уытқа толы өзіндік стилі оқырман назарын аударумен ұдайы тәнті қылып келе жатыр.
Сүйікті жазушымыздың таңдамалы шығармалары жинағының бір томдығы таяуда «Қазақпарат» баспасынан жарық көрді. Жинаққа автордың аталған әңгімелерімен бірге, ана туралы аңыздары - «Адамның анасы», «Өлімді жеңген ана», «Ананың анасы», «Ашынған ана», «Ананың арашасы», «Ер ана», «Ақлима», «Әмина», «Екі дүние - екі әйел», «Ана ажары», «Жиырма төрт сағатта», «Өмір шырағы», «Бірінші би аға», «Сыр жыры», «Этнографиялық әңгіме», «Тарғыл қауын», «Жапон балладалары» және «Көркем очерктері», аудармалары топтастырылған. Жинақтан оқырман автордың «Қазақ солдаты» романы мен «Ұлпан» хикаятын, күнделіктерін оқи алады. Жалпы, жинақ көркем, берекелі, толымды түрде шыққан. Бұл ретте алғысымызды баспагер, журналист бауырымыз Қонысбек Ботбаевқа айтар едік.
Осы баспадан бұрынырақта ақиық ақынымыз, жыр жампозы Мұқағали Мақатаев жырлары да осындай берекелі басылым үлгіде болып шыққан еді. Алдағы уақытта ұлы Абайды, классик ақындарымыз - Сұлтанмахмұт Торайғыров, Ілияс Жансүгіров, Қасым Аманжолов еңбектерін де осындай берекелі ұсынса, абзал болар еді демекпіз.
Төлен ҚАУПЫНБАЙҰЛЫ,
жазушы, Жамбыл атындағы
халықаралық сыйлықтың лауреаты,
Мұқағали Мақатаев атындағы әдеби сыйлықтың иегері.
