Гүлназ Әлімгерей, тележүргізуші, мемлекеттік «Дарын» жастар сыйлығының иегері: МӘТІНГЕ ЕШҚАНДАЙ ҚАТЫСЫ ЖОҚ ТЕЛЕЖҮРГІЗУШІНІ КӨЗІНЕН-АҚ АҢҒАРАМЫН

– Таяуда ғана Мемлекеттік хатшы Марат Тәжин журналистер дайындайтын оқу орындары мен жұмыспен қамтамасыз етушілердің арасын жалғайтын шеберлік сыныптары, курстардың тапшы екендігі жөнінде  айтқан болатын. Ақпарат майданы қайнап тұрған бүгінгі қоғамға өз ісінің хас шеберлері қажет. Заман ағымы шеберлік сыныптарына сұранып тұр. Телевизия саласында жүріп, азды-көпті жиған өз тәжірибемізді және телеөнердің туын жықпай, қажырлы еңбегі мен өмірін осы салаға арнаған нағыз мамандардың дәрісін жас буындарға жеткізуді жөн көрдік. Қазір 10-12 адамдық шағын топтарға таланты мен талабы, бойындағы біліміне қарай үміткерлер іріктеліп алынды. Олар екі айдың ішінде телевизиядағы танымалдығы мен таланты талас тудырмайтын журналист аға-апаларымыздан дәріс алып, шеберліктерін шыңдайды. Бұл іске теоретиктерді емес, тәжірибесі мен біліктілігі ұштасқан мамандарды жұмылдырып отырмыз. Олар кімдер? Олар – Сауық Жақанова, Нұртілеу  Иманғалиұлы, Қымбат Досжан, Баян Секербаева, Жайна Сламбек сынды экран шеберлері мен сайыпқырандары. Бүгінде бағдарламаның тақырыбы қызықты сценарийсіз ашылмайды. Міне, осы саланы жіті меңгерген Перизат Мырзахметтен сабақ алу мүмкіндіктерін қарастырамыз. Келесі маусымда тәжірибелі өзге мамандарды да тартатын боламыз.

–  «Шаршы алаңға шығып, сөз бастау қиын» деген. Жауапкершілігі мол бұл бастаманы іске асырудың өзі оңайға соққан жоқ. Ал курс түлектерін жаппай жұмыспен қамту мәселесі мектеп-студияның міндетіне кірмейді. Бұл жерде тек теориялық және практикалық білім беріледі. Дегенмен, бұдан бөлек телеарналарға жобалар дайындап жатырмыз. Бұл істің үдесінен шыға білгендерге, ынтызар шәкірттеріме мүмкіндік жасауға болады. Бәлкім, телеарналардың бұйдасын ұстап жүргендерден ұсыныстар түскенде, ерекше көзге түскен шәкірттерімізді міндетті түрде ұсынатын боламын.

– Аутсорсинг телеарналарға сұраныстан туындаған дүние. Яғни эфирге сапалы хабарларды дайындау. Бағдарламалардың ұлттық бояудан алшақтамай, рейтингі жоғары болуы шарт. Бірақ, әрине көңіл толмайтын тұстары да болады. Аутсорсинг арқылы жүріп жатқан бағдарламаның бәрі жоғары деңгейде деп айтуға болмайды. Осы жайттарды көріп отырып, өзімнің көкейімде жүрген бағдарламаларды мұқият мұғдарлап, жан-жақты саралап, болашақта телеарна басшылығына ұсынсам деген ойларым да бар.

– Біз қазір диктор емеспіз. Ең алдымен осыны түсінуіміз керек. Кезінде қатаң саясаттың басшылығымен дайын мәтінді оқып беріп отырды. Олар орта жастағы, иықты, денелі болуы керек болды. Әрлендіргенде қырықтың шамасында болса, халық сонда ғана сенеді деген түсінік қой. Ал қазір мүлдем өзгеше сипатта. Эфирге жастар келіп, ерлеріміз ұсақталып барады. Бәрібір ірілік сезілмейді. Меніңше, жүргізуші – жазғаны жанарында оты арқылы сезіліп тұратын болуы керек. Сюжетке бара алмасам да, жүргізушінің айтар сөзін өзім жазып, жаңалықтар тізбесін жасаймын. Мәтінге ешқандай қатысы болмаған тележүргізушілерді көзінен-ақ аңғарып отырамын. Кейбір телеарна жүргізушілерінің жұп болып жүргізгендеріне таң қалам. Бір-бірімен арада диалог жоқтың қасы. Бүгінгі күннің жүргізушілері суфлердан мәтін жоқ болып шықса, жаңалықты жүргізіп отырғанда жедел ақпарат жетсе, аңдатпа айтылу керек болғанда сасқалақтамай, абдырамастан эфирді алып шығуы қажет.

– Мектеп-студия ашу менің емес, осы жұбайымның идеясы. Нұрділдә бір сұхбатында «болашақта тележүргізушілердің стилін қалыптастыратын мектеп ашқым келеді» деген болатын. Міне, осы ойтүрткіні жүзеге асыратын уақыт туды. Сенгендіктен болар, осы бастаманы маған тапсырып отыр. Екеуміз де бір мамандықтың иесі болғандықтан, қызығушылығымыз да бір бағытта тоғысады. Белгілі бір мақсатқа біріге отырып, білек сыбана іске кірісуіміздің бастамасы. Шегелеп тұрып айтамын, Нұрділдә – үлкен стратег. Жан-жақты зерделеген кезде, ойының жартысына да жете алмаймын.

– Қандай деңгейде ардақты келін, асыл жар, аяулы ана бола алдыңыз? Үй шаруасына қаншалықты ептісіз?

– Үй мен жұмыстың арасында шапқылап жүрмін. Қоғамдағы жұмыстар мен үй шаруасына үлгеруге тырысудамын. Арнайы күтушім жоқ. Бір отбасының түтінін түтетіп отырған келін болғандықтан ас мәзірін өзім дайындаймын. Жолдасымның таңертеңгі асын әзірлеп, жұмысқа жіберемін. «Бизнес-леди» болып жатсам да, барлық мәселені отағасы шешеді. Әжелеріміз ыстық суы, жарығы, газы жоқ үйде тұрып-ақ барлығына үлгерген. Біз де үлгеруге тиіспіз. Шүкір, ата-енем қасымда. Бірі қызымыз - Ділназымды бала-бақшадан, бірі ұлымыз - Нұрасылды мектептен  алып келеді. Бірақ, ұлымның сабағын өзім қадағалаймын. Қазір 2-сыныпта оқып жатыр. Қытай тілі мен ағылшыншаны игеру қиынға соғуда. Сонда да өз бетінше сабақ оқуға үйретіп жүрмін.

– Өмірдің өзі – спорт. Шынын айтқанда, мен өте арық болғанмын. «Аздап толыпсың» деген сөзге мәз болатынмын. Қазір өзімді еркін сезінемін. Мүмкіндігім болса да, ешқандай салонға, фитнеске бармаймын. Уақытымды текке жұмсағым келмейді.

– Сынды Нұрділдә екеуміз бір-бірімізге айтып, бойымыздағы қателіктерді осылай түзетіп отырамыз. Қазір кемшіліктерді тұстарды өзім іштей сезіп отырамын. Кейбір жандар ұсақ сындар айтып жатады. Алайда менің өзіндік стилім бар. Сынды бұлтартпай айтатын Нұртілеу Иманғалиұлы, Намазалы Омашұлы сынды ұстаздарымыздан ауыр сын естімегенім, мен үшін үлкен қуаныш. Жастайымыздан еліктеп өстік. Уақыт өте келе адам өзін таба алмаса, өзінің «менін» жоғалтып алады. Аянбай еңбек етіп, тер төккен журналист ретінде халықтың көкейінде қалғым келеді.