Л. Н. Гумилев атындағы Еуразия ұлттық университетінің «Дала сазы» қазақ халық аспаптары оркестрінің домбырашылар ансамблі 24-28 - наурыз аралығында Мәскеу қаласында өткен «Жаңа ғасыр таланттары-2017» байқауында бас жүлдеге ие болды. Домбырашылар ансамблі "Аспапта орындау" номинациясы бойынша өнер көрсетті.
«Жаңа ғасыр таланттары» дәстүрлі түрде ұйымдастырылатын бүкілресейлік жас таланттар фестиваль-сайысы болып табылады. Биылғы фестиваль өткен жылғылардан ерекше өткендігінің бір белгісі - бес номинация ішінен тек «Аспапта орындау» номинациясында ғана бас жүлде тағайындалған. Бұл мәртебе Астана қаласының намысын қорғаған «Дала сазы» қазақ халық аспаптары оркестріне бұйырды.
Сайыс барысында домбырашылар ансамблі «Жұмыр қылыш» және «Мелодии мира» туындыларын бүкіл Мәскеулік көрермендерге паш етті. Сонымен қатар, оркестр мүшелері Ғасырбек Қайратұлы мен Темірлан Махметов үздік орындаушылар өнер көрсете алатын гала-концертке қатысу мүмкіндігіне ие болды. Олар қазақ күйлерінен «Күй тартыс» орындап, барша көрерменнің көңілінен шықты.