10 қыркүйекте қазақстандық боксшы — жеңіл салмақтағы еуропа чемпионы — Жанат Жақиянов Минскіде грузин Гага Едишерашвилимен кездеседі. Бұл туралы Еуразиялық-Тынық мұхиттық бокс кеңесінің (EPBC) ресми сайтынан хабарланды.

Жекпе-жекте WBC нұсқасы бойынша жеңіл салмақтағы  EPBC чемпионы титулы сарапқа салынады. Бірақ, Жақияновтың Еуропа чемпионы белбеуі ойнатылмайды.

Атап өту керек, Грузия спортшысы кәсіби шаршы алаңда осыған дейін жеңіліп көрмеген. Едишерашвилиде 7 жеңіс жазылған, оның 6-ауы уақытынан бұрын аяқталған. Жерлесіміз болса 22 мәрте жеңімпаз атанған, 15 жекпе-жек нокаутпен аяқталған. Бір рет жеңілген.

Осыған дейін хабарланғандай, сәуір айында Жанат француз боксшысы Гуерфиді 5-ші кезеңде  нокаутқа жіберіп, Еуропа чемпионы титулын тартып алған болатын.

Басты сөздер: Спорт

АСТАНА. ҚазАқпарат