Қазақстанның жаңа тұлғалары: Ауыр атлетикадан Азия чемпионы Максим Лактионовпен сұхбат
М.Лактионов Теміртауда туып-өсті, гимназияны бітірді. Биыл ол 18 жасқа толды. Спортшыны өзінің әкесі Геннадий Лактионов жаттықтырады.
ҚазАқпарат тілшісінің М.Лактионовпен сұхбатында оның патриоттығы және жетістіктері туралы баяндалады.
- Азия чемпионатындағы өзіңнің жеңісіңді Қазақстан елордасы Астананың 15 жылдығына арнағаныңды атап өттің. Сен үшін патриоттық сөзінің мағынасы қандай?
- Бірінші кезекте, спортшы үшін патриоттық — өзіңнің Отаныңның, еліңнің намысын қорғап отырғаныңды білгеніңде. Құраманың сапында бола тұра, өз еліңді сүюің керек деп санаймын. Жеңіс тұғырына шыққанда сен Қазақстаннан екеніңді мақтан тұтасың. Жеңіске жетіп, сенің құрметіңе өз еліңнің әнұраны шырқалғанда, кейбірі көз жасына ерік береді. Сеніммен айта аламын — мен патриотпын. Нақты Қазақстанда, Қарағанды облысында туғанымды мақтан тұтамын. Еліміз Астананың 15 жылдығын атап өтіп жатқан күні жеңіске жеткеніме қуаныштымын. Спортшы өз еліне жасай алатын ең жақсы сыйлықтардың бірі — халықаралық жарыста жеңіске жету деп білемін.
- Қазір сен ауыр атлетикада болашағынан үміт күттіретін спортшылардың бірісің. Сырт жақтан қандай да бір ұсыныстар да болған шығар?
- Әзірге ондай ұсыныстар болған жоқ. Егер болып жатса-дағы мен Қарағанды облысына, Қазақстанға берікпін.
- Спортты таңдағаның үшін, балалық шағың жаттығулармен өткеніне өкінген жоқсың ба?
- Әртүрлі кезеңдер болды. 13 жасымда жаттығуды мүлдем қаламадым. Спорт шебері атағын алғаннан кейін қызығушылығым оянды. Екі жыл бұрын спортсыз, ұдайы болып тұратын жаттығуларсыз өмір сүре алмайтынымды түсіндім. Меніңше, спортпен айналысатын жастар өмірде әлдеқайда үлкен жетістіктерге қол жеткізеді.
- Спорттан бөлек өзіңді қандай салада көресің?
- Әрине, мен де тұлға ретінде дамып, өзіме қызықтыны игергім келеді. Мысал үшін, жиындар барысында кітаптарды оқып та үлгеремін. Бір бағытта ғана даму — бұл дұрыс емес. Адам көп нәрсеге қауқарлы, тек ерінеді. Мысал үшін мен қытай тілін меңгеруді қалаймын. Онымен қоса ағылшын тілінен білімімді жетілдіргім келеді. ЖОО-да оқу үшін «дене шынықтыру және туризм» мамандығын таңдадым. Бірақ шашыраңқылықтың да қажеті жоқ. Егер назарды қандай да бір басты іске аударсаң, егер мақсатың болса — оған тура жол іздеп, барыңды салуың қажет.
- Қазір сен үшін басты мақсат не?
- Бұл — Рио-де-Жанейродағы олимпиада. Қалғанның барлығы — әлем чемпионаты, Азия ойындары өтпелі сөрелер. Ең бастысы Риоға дайындық. Оған алдағы төрт жыл бойы дайындалатын боламын. Қалай өнер көрсететінімді, жеңістер болатынын не болмайтынын әзірге айта алмаймын.
- Ол үшін қанша тер төгу керек?
- Оны сізге нақты айта алмаймын. Бірақ меніңше, егер сен жаттығу залына бірінші болып келіп, ең соңғы кетіп отырсаң нәтижеге қол жеткізесің.
- Сенің пікіріңше, ауыр атлетиканың дамуына неғұрлым жоғары назарды аударту мүмкін болды ма? Себебі Қарағандыға ауыр атлетшілерге мамандандырылған арнайы залды құру мәселесін шешуді алға жылжыту үшін Олимпиада чемпионы Ильин арнайы шақырылған болатын.
- Қазір ауыр атлетикада жақсы жас спортшылар көп, бірақ оларға назар жеткіліксіз. Егер қаржыландыруды арттырса, Қазақстан бұған дейін көрмеген жетістіктерге жетер еді. Залға қатысты айтатын болсам, шыны керек, мәселе қалай шешіліп жатқанын білмеймін. Өзім Теміртауда жаттығамын, база көңілімнен шығады. Маған үйде ұнайды.
- Спортшыларға жеңістері үшін әдетте темір тұлпар мінгізеді. Сенің көлігің бар ма?
- Әзірге жоқ, маған 18 жаңа толды ғой. Маған ұнайтын көліктің маркасы бар — Audi-4 немесе Audi-6. Ақша пайда болғаннан кейін және жүргізуші куәлігін алуға уақыт болғанда оған кірісемін деп ойлаймын. Әзірге ондай мақсатым жоқ. Жалпы, ақша өмірдің мәні емес. Ақшамен біз сұраныстарымызды қанағаттандырамыз, бұл мақсаттарға жету құралы. Қаражатты өзіңді дамытуға салу қажет.
«Спортшы М.Лактионовтың жетістігінің басты факторы не?» деген сұраққа оның тәлімгері, бапкері және әкесі Г.Лактионов жауап берді.
«Жетістік көп жылдарғы жаттығуларда. Бұл үнемі еңбек ету. Егер құрбы-құрдастар серуендеп, демала алса, спортты таңдағандар аула дегенді білмейді. Олар мектеп және спортзал дегенді ғана біледі. Және әрине, талант болу қажет. Дарындылық, еңбек және сауатты жаттықтырушы үйлесімділік тапқанда — нәтиже болады.
Бапкердің сөзіне қарағанда, жарыстарға дайындық кезінде зілтеміршінің жүктемесі күніне 30 тоннаға дейін құрайды. «Жалпы алғанда күнделікті жарты вагон жүк түсіреміз», — деп салыстырып өтті ол.
- Тәрбиеленушіңіз — ұлыңыз болғанда қандай да бір психологиялық жүктеме бар ма?
- Жалпы алғанда, психологиялық қиындықтар жоқ. Бір ғана, ұлың ретінде әкеге анағұрлым көп нәрсені және батыл түрде айтуға болады. Егер өзге тәрбиеленуші бапкерге қандай да бір мәселелерді айта алмаса, ұлыңыз үйде әкесіне барлық өкпе-реніштерін білдіріп алады. Бірақ, Максимге де көп таяқ тиеді. Жаттығу барысында сынға алып, оны үйде де жалғастыра аламын.
ҚАРАҒАНДЫ. ҚазАқпарат