Астанада Көз аурулары қазақ ғылыми-зерттеу институты филиалының жаңа ғимараты ашылды
Бүгін Астанада Жеңіс даңғылы 16/1 мекен-жайында орналасқан Көз аурулары қазақ ғылыми-зерттеу институты филиалының жаңа ғимаратының ашылу салтанаты болды.
Іс-шараға ҚР Денсаулық сақтау және әлеуметтік даму министрлігінің, «Нұр Отан» партиясының, депутаттар корпусының, Астана қаласы әкімдігінің өкілдері қатысты. Шетелдік офтольмолог мамандар: Ресей глаукома қоғамының вице-президенті, Санкт-Петербург қаласының бас офтальмологы, м.ғ.д. профессор Ю.С.Астахов (Ресей), Офтальмологтардың Еуропалық Коллегиясының Бас хатшысы, профессор Э.Мидена (Италия) құттықтау сөз арнады.
Көз аурулары қазақ ғылыми-зерттеу институты – 80 жылдық тарихы бар еліміздің бас офтальмологиялық орталығы. Институттың елордадағы филиалы 4 жылдан бері Солтүстік Қазақстан, Шығыс Қазақстан, Қарағанды, Ақмола, Қостанай, Ақтөбе, Павлодар облыстары мен Астана қаласы тұрғындарын тегін медициналық көмектің кепілдік берілген көлемі шеңберінде жоғары мамандандырылған офтальмологиялық көмекпен қамтамасыз етуде. Филиал шала туылған нәрестелердің көз ауруларын емдеуде және скрининг жүргізуде қалалық перинаталдық орталықпен ынтымақтаса жұмыс істейді.
Ауданы 3200 шаршы метр болатын жаңа ғимаратқа көшу офтальмологиялық емдеу-диагностикалау қызметтерін кеңейтуге, сондай-ақ, шел хирургиясы және көз жанарын түзету сияқты салаларда ең озық технологияларды ендіруге мүмкіндік береді. Астанадағы филиалға 400 млн. теңгенің заманауи қондырғылары: шел хирургиясына және рефракциялық хирургияға жоғары рұқсат етілген оптикалық когерентті томограф сатып алынды.
Көз аурулары қазақ ғылыми-зерттеу институты филиалының құрамына ересектер мен балалар бөлімі, күндізгі стационар, диагностикалық-консультативтік бөлім, лазерлік орталық, офтальмологтарды оқыту зертханасы кіреді.
Дүниежүзілік денсаулық сақтау ұйымының мәліметінше, әлемде 285 млн. адам көз ауруларына шалдыққан, олардың ішінде 39 млн. зағип жан бар. Қазақстанда көз аурулары бойынша 56 мың мүгедек тіркелген.