Қарым-қатынастар мүмкіндігі артып келеді
Парламент Мәжілісінің Әлеуметтік-мәдени даму комитетінің төрайымы Гүлнар Ықсанова бастаған бір топ депутат Ауғанстан Ислам Республикасы Парламенті төменгі палатасының (Волеси Джирга) делегациясын қабылдады, деп хабарлады Мәжілістің баспасөз қызметі.
Делегация жетекшісі Ауғанстан Парламентінің Әйелдер мен балалар істері жөніндегі комиссия төрағасының орынбасары Шукрия Пайкан Ахмади болды.
Кездесуде негізгі әңгіме Мәжіліс ұйымдастырған Қазақстан халқы Ассамблеясының 20 жылдығына арналған халықаралық конференцияға арналды. Жүздесуде Қазақстандағы ұлтаралық келісім тәжірибесіне көпұлтты Ауғанстан тарапы қызығушылық танытты.
Сонымен бірге, Г.Ықсанова Мәжіліс өткізген конференция оған қатысушылар үшін барлық жағынан пайдалы болғанын айтты. Және де Қазақстан Президенті Н.Ә.Назарбаев пен біздің халық бейбітшілікті және соған ұмтылған барлық елдерді қолдайтынын, соның ішінде Ауғанстан да бар екенін атап өтті. Сол мақсатқа жету үшін екі ел арасындағы жан-жақты ынтымақтастық, әсіресе, мәдени-ізгілікті бағытты қамтитынын мәлімдеді.
Шукрия Пайкан Ахмади конференцияға шақырылғаны үшін алғысын айтып, Ауғанстанға жасалып жатқан барлық көмекке, әсіресе, қайырымдылық көмегіне ризашылық білдірді. «Біздің елімізде болған соғыстарда, соның ішінде талибтермен соғыста әйелдер қатты зардап шекті. Ауғанстан өз достарының көмегіне зәру», – деп мәлімдеді Ауғанстан парламентшісі. Сондықтан мұндай жиындар, парламенттік дипломатияны жандандырады, халықтардың ынтымақтастығын арттырып, бейбітшілік пен өсіп-өркендеуге негіз қалайды.
Парламентаралық мәселелерді кең ауқымда қарастырған жүздесуге Мәжіліс депутаттары У.Бишімбаев пен М.Қазбекова және Ауғанстан Ислам Республикасы Парламенті Волеси Джиргасының бюджет бойынша комиссия мүшесі Баз Мохаммад Джаузджани, Ауғанстан Ислам Республикасының Қазақстан Республикасындағы Төтенше және өкілетті елшісі Мохаммад Фарук Бараки қатысты.
Анықтамалық: Ұлттық ассамблея — Ауғанстанның екіпалаталы мүшесі және заңнамалық биліктің жеткізушісі. Ауғанстан Конституциясына сәйкес қабылданатын заңдар ислам ережелеріне қайшы болмауы керек. Ұлттық ассамблея құрылған 13 қазан Ауғанстанның ұлттық мерекесі болып табылады.
Ассамблея Мешрано Джирга (Ақсақалдар үйі) және Волеси Джирга (Халық үйі) атты екі палатадан тұрады. Барлық заңнамалық бастамалар екі палатамен бекітілуі тиіс. Жоғарғы палата 102, төменгі палата 249 депутаттан тұрады. Ақсақалдар үйі мүшелерінің үштен бірін президент, қалғанын аймақтық кеңестер сайлайды. Халық үйін ел азаматтары дауыс беріп сайлайды.