Адамзаттың алаңдауына не себеп?

 Мұндай сұмдық деректі DARA гуманитарлық орталығы жариялады. Миллиондаған адамның шейіт болуы мемлекетаралық соғыстан емес, әлемдік жылынудың кесірінен болғалы тұр. Ауаға тым көп жайылған парникті газдың кесірінен, мәңгілік мұз жамылған солтүстіктегі мұзтаулардың еруі, соңғы кезде жедел жүріп жатқанға ұқсайды. Күннің күрт жылуы онсыз да шөлді-шөлейтті аймақ­тарда отырған мемлекеттер үшін үлкен қасіретке айналамақшы. Қуаңшылық­тың арты аштыққа, түрлі аурулардың таралуына алып келері айқын. Оның үстіне жұтым судың да табылмауы жұдырық үстіне жұдырық болары белгілі. Мұның арты адамдардың мил­лиондап қырылуына жол ашпақ.
Қазірдің өзінде ауаның ластануынан, аштықтан, түрлі аурудан және климат­тың өзгеруінен жыл сайын 5 миллион адам дүние салады екен. Бұл дерек жылдан-жылға ұлғайып, 6 миллионға жетуі ықтимал. Сарапшылардың есебін­ше, алдағы он жылдықтың соңына қарай қайтыс болатындардың 90 пайызы ауа райының өзгеруінен болмақ. Кли­маттың құбылуы әлемдік экономикаға да айтарлықтай әсер етпекші. Өнер­кәсіптік өндірістің деңгейі жылына 1,6 пайызға (1,2 триллион долларға) тө­мендейді. Бұл көрсеткіш жыл өткен сайын шарықтай бермекші.

Сейсен ӘМІРБЕКҰЛЫ