«Ақжайықтан» Қазақстан ұлттық құрамасына қос ойыншы алынып отыр
Команданың бас бапкері Дмитрий Иванниковтің айтуынша, «Ақжайықтың» капитаны Ескендір Нұғманов пен Петр Грибанов биыл Иркутск қаласында 26 қаңтар — 2 ақпан аралығында өтетін әлем біріншілігінде ел намысын қорғамақ. Онда Қазақстан ұлттық құрамасы (бас бапкері Алексей Никишов) Ресей, Швеция, Финляндия, Норвегия сынды командалармен күш сынасады.
«Ақжайық» ойыншыларының әлем чемпионатына қатысуына байланысты кездесулер кестесіне өзгерістер енгізілді. Воткинскінің «Знамя-Удмуртия» командасымен ойын 24 қаңтардан 23-іне ауыстырылды. Ал Орынбордың «Локомотивімен» өтетін матчтар 1-2 ақпаннан 8-9 ақпанға шегерілді.
Қазіргі кезде «Ақжайық» жоғары лига командалары арасында Ресей чемпионатының екінші тобында 30 ұпаймен екінші орында келеді. Бұл топтан алғашқы үш орынды еншілеген командалар финалдық сайыстарға қатысады.