500 миллион теңге қарыз
|
28.09.12.
Алматы қаласының тұрғындары суық су үшін жалпы есебі 500 миллион теңгедей берешек. Оның ішінде заңды тұлғалар мемлекетке 163 миллион теңге қарыз болса, бюджеттік мекемелер 26 миллион теңге қарыз. Өзгесін былай қойғанда, көппәтерлі үйдің тұрғындары да пайдаланған судың ақшасын төлемейді екен. Мәселен, шаһардағы көппәтерлі сектор тұрғындары 285 миллион теңге, ал жеке сектор тұрғындары 100 миллион теңге берешек. Осыған орай, «Бастау» және «Тоспа су» еншілес мемлекеттік коммуналдық кәсіпорны қарызын өтемеген борышкерлерді жазалау шарасын қолға алды.
Мекеме қызметкерлері борышкерлердің қарызы туралы бірнеше ескертпе жіберіпті. Десек те, тұтынушылар ескертулерге құлақ аспайды екен. Бұдан былай берешек тұрғындар қызмет көрсетуден әп-сәтте қағылады. Қазіргі таңда, борышкерлерді қатаң жазалаудың әдісі де пайда болған. Мәселен, өткен жылдан бері екі жедел қимылдайтын бригада бүкіл үйге зардабын тигізбей, тек борышкер пәтердің кәрізін арнайы құрылғымен бекітіп тастайды. Кәріз желісіне өздігімен қосылып, су ұрлайтын алаяқтық әрекеттердің жиілеп кетуі -қалалық су каналының бас ауыртар басты мәселесіне айналды. Соңғы төрт жылдың ішінде Алматы қаласы бойынша қалалық кәрізге қосылып, заңсыз су ұрлаған бес мың алаяқтық жағдай тіркелген. Әйгерім БАҚЫТҚЫЗЫ |