Шағын қаладағы робототехниканың үлкен жеңісі
Қосшы қаласының оқушылары робототехника мен жаратылыстану ғылымдары, технологиялар, инженерия және математика бағыттарын біріктіретін сала STEM бойынша халықаралық зияткерлік жарыстарда жеңіске жетіп, туған жерінің атын әлемдік аренада танытып жүр.
Yvision.kz Қосшы қаласы қоғамдық мәдени-спорт орталығының робототехника жаттықтырушысы Даниял Мұсахметпен сұхбаттасты.
– Даниял, командаңыздың робототехника мен STEM саласындағы басты жетістіктері туралы айтып өтсеңіз. Қандай деңгейдегі турнирлерде жүлде алдыңыздар? – Біздің команда республикалық және халықаралық STEM, робототехника турнирлеріне тұрақты түрде қатысады. Оқушыларымыз халықаралық деңгейдегі жарыстарда жүлделі орындарға ие болып, әлемдік кезеңдерге сәтті іріктеліп, бағдарламалау, инженерия және құрастыру бағыттарында жоғары нәтижелер көрсетіп келеді. Мысалы, Түркияның Анталья қаласында өткен турнирде оқушыларымыз Алтын мен Қола жүлдені жеңіп алып, биыл 20-26 қараша аралығында Италияның Рим қаласында өтетін «Fibonacci International Robot Olympiad» байқауына жолдама алды. Біз Қазақстан құрамасын таныстырамыз. Ірі жарыстарға қатысу балаларға сенім беріп, әрі қарай даму мотивациясын қалыптастырады.
– Мұндай жетістіктерге жету үшін қандай жаттығу әдістерін қолданасыздар? Халықаралық тәжірибеге жүгінесіз бе? – Біз тәжірибеге негізделген: роботтармен жұмыс, жинақтау, бағдарламалау, мини-жарыстар мен жобалық тапсырмалар сияқты тәсілді қолданамыз. Оқыту құрылымы STEM-нің халықаралық стандарттарына негізделген: LEGO Education, Arduino платформалары, жобалық әдіс және нақты міндеттер арқылы инженерлік ойлауды дамыту. Мұндай тәсіл балалардың жас инженерлерше ойлануына мүмкіндік береді.
– Қазақстандық оқушылардың деңгейін қалай бағалайсыз? Орталықта бұл бағытты дамыту үшін қандай жоспарларыңыз бар? – Қазір орталықтағы оқушылардың деңгейі қарқынды өсіп келеді. Қызығушылық жоғары, технологияны тез меңгеру қабілеті таңғалдырады. Айта кету керек, балалардың заманауи жабдықтың толық спектріне қолжетімділігі бар. Біз сапалы дайындық жүргіземіз, жобалық жұмысты енгіземіз, балаларға турнирлерге қатысуға және кәсіби түрде дайындалуға мүмкіндік береміз. Негізгі мақсат – халықаралық жарыстарда сенімді түрде бәсекелесе алатын жаңа буын қалыптастыру.
P.S. Айта кетейік, қараша айында Қазақстанның ұлттық құрамасы Панама-Ситиде өткен FIRST Global Challenge 2025 дүниежүзілік олимпиадасында екі алтын медаль жеңіп алды. Бұл – 190 елдің жас инженерлері қатысатын чемпионаттағы еліміздің қатарынан төртінші жеңісі.
Сурет: қоғамдық мәдени-спорт орталығы