"Жасанды Интеллект" (Artificial Intellect) туралы курс
Ресейлік "Хакер" журналы өз блогында АҚШ-тағы Стенфорд университеті тарапынан ұйымдастырылып жатқан "Жасанды интеллектке кіріспе" (Introduction to Artificial Intelligence) атты курстың ашылғанын хабарлады. Бұл курс тікелей онлайн түрінде биылғы Қазан айының 10-ы мен Желтоқсанның 18 аралығында өтеді. Сабақ тегін. Бұл курсқа қатысудың екі түрі бар.
Бірі - тек қана қатысып, яғни интернет желісінде өтетін онлайн сабақты тыңдау болса, екіншісі - сабаққа қатысудан және үй тапсырмасын орындап, эмтихан тапсырудан тұрады. Екі жағдайда да арнайы құжат беріледі. "Хакер" журналының айтуынша, сабақты Питер Норвиг пен Себастьян Тран жүргізеді. Питер бұрын НАСА-да қызмет атқарып, "Жасанды Интеллект" туралы оқулық жазған. Ал Себастьян болса, арнайы Google үшін әлемдегі ең мықты роботталған автомобиль құрастырумен айналысады.Курсқа тіркелу және курс туралы толық ақпаратты мына сайт бойынша аласыздар: www.ai-class.com/registration/