Өңірлік кадр резерві: Маңғыстаудағы жас көшбасшылардың тағайындаулары
Мемлекет басшысының 2023 жылғы 15 маусымдағы №255 Жарлығымен облыстардың, республикалық маңызы бар қалалардың және Астананың өңірлік кадр резервін қалыптастыру және резервтен тағайындау қағидалары бекітілді. Бұл бастама өңірлердегі белсенді, білімді жастарды қолдауға және оларды мемлекеттік қызмет саласына тартуға бағытталған маңызды қадам болып табылады.
Өңірлік кадр резервінің басты мақсаты — аймақтық деңгейдегі талантты, жауапкершілігі мол жастарды анықтап, оларды мемлекеттік басқару ісіне белсенді араластыру. Бұл жоба жас көшбасшылардың әлеуетін ашып, тәжірибе жинақтауға мүмкіндік береді, сондай-ақ олардың қоғамдағы рөлін нығайтуға ықпал етеді. Жобаның жүзеге асырылуы ҚР Мемлекеттік қызмет істері агенттігінің ұйымдастыруымен жүзеге асырылуда, және жаңа қағидаларға сәйкес, резервке алынған жастар жергілікті атқарушы органдардың «Б» корпусының әкімшілік лауазымдарына конкурссыз тағайындала алады.
Жаңа біліктілік талаптары
Агенттік Төрағасының 2023 жылғы 5 сәуірдегі №71 бұйрығымен бекітілген біліктілік талаптары өңірлік кадр резервіне енгізілгендердің D-2, D-О-2, D-R-1, Е-1, E-R-1, E-G-1 санаттарындағы лауазымдарға сәйкестігін қарастырады. Бұл талаптар мемлекеттік қызметке қойылатын негізгі стандарттарды қамтиды және жас мамандардың өз міндеттерін жоғары деңгейде орындауына жол ашады.
Өңірлік кадр резерві: алғашқы тағайындаулар
2023 жылы өңірлік кадр резервіне іріктеу барысында 25 үміткер таңдалып алынды. Олардың барлығы екі жылға дейін резервте болады және «Б» корпусының әкімшілік лауазымдарына тағайындалу мүмкіндігіне ие. Бұл мерзім ішінде олар өздерінің кәсіби біліктілігін арттырып, қоғамға қызмет етуге дайын болады.
«Мемлекеттік қызмет туралы» Заңның 15-бабының 2-тармағына сәйкес, резервтен іріктелген үш үміткер жергілікті атқарушы органдардың басшылық лауазымдарына тағайындалды. Атап айтқанда:
Закарин Ақылбек Берденұлы — Маңғыстау облысы әкімі аппаратының құқық қорғау органдарымен жұмыс және жұмылдыру дайындығы бөлімінің басшысы;
Өмірбаев Ерлан Әмірбайұлы — Маңғыстау облысы әкімі аппаратының әлеуметтік-экономикалық даму және талдау бөлімінің бас инспекторы;
Курманғалиев Ғани Дәулеткерейұлы —Ақтау қалалық білім бөлімінің басшысы болып тағайындалды.
Жастарға жүктелген жауапкершілік
Өңірлік кадр резерві — бұл жастар үшін кәсіби өсуге, жауапты мемлекеттік қызметке кірісуге және өз білімін еліміздің өркендеуіне арнауға берілген тамаша мүмкіндік. Аймақтарда талантты жастардың жаңа толқыны қалыптасып, олардың көшбасшылық қасиеттері ашылуда. Бұл бастама жастардың аймақтық және республикалық деңгейдегі қоғамдық өмірге белсенді араласуына жол ашады. Еліміздің дамуына өз үлесін қосуға ниетті осындай белсенді жастардың арқасында өңірлердің тұрақты дамуы мен әлеуметтік-экономикалық жағдайының жақсаруы күтіледі.