ІШКІ ІСТЕР ОРГАНДАРЫНЫҢ АРДАГЕРЛЕРІНЕ ҚҰРМЕТ КӨРСЕТІЛДІ

Бүгін облыс әкімі Қырымбек Көшербаев «23 маусым – «Қазақстан полициясы күні» мерекесіне орай ішкі істер органдары саласында сан жылдар бойы қызмет етіп, бар күш-жігерін облыс көлемінде құқық бұзушылықтың алдын алу мен қылмысқа қарсы күрес шараларының сапасын арттыруға жұмсаған бір топ ішкі істер органдарының ардагерлерін қабылдап,  алдағы мерекелерімен құттықтады.

– Сіздер санаулы ғұмырларыңызды еліміздің тыныштығына, қылмыспен күресуге арнадыңыздар. Облысымыздың өсіп-өркендеуіне, әлеуметтік тұрақтылығына үлкен үлес қостыңыздар. Қазірдің өзінде еңбек демалысында жүргендеріңізге қарамастан, әртүрлі шараларда қолдан келген көмектеріңізді жасап, әсіресе қоғамдық өмірге белсене қатысып, өскелең ұрпаққа өздеріңіздің аталық тәлім-тәрбиелеріңізді беріп келе жатырсыздар. Осы үшін сіздерге үлкен ризашылығымды айтамын, - деді облыс әкімі.

Сонымен қатар, кездесу барысында Қ.Көшербаев жас полиция қызметкерлеріне үлгі-өнеге көрсетіп, жас қызметкерлерді тәрбиелеуге ат салысқандары үшін ішкі істер органдарының бір топ ардагерін  Қызылорда облысы әкімінің «Құрмет грамотасымен» және «Алғыс хатымен»  марапаттап, сый-құрмет көрсетті.

Жалпы қоғамдық тәртіптің сақталу жолында ұзақ жылдар бойы қызмет атқарып, Қызылорда облысы ішкі істер департаментінен құрметті еңбек демалысына шыққан 1436 ардагер бар. Ардагерлердің атынан ішкі істер органдары ардагерлер кеңесінің төрағасы Мылтықбай Пеисов көрсетілген құрметке ризашылығын білдіріп, алғысын айтты.

Қызылорда ОІІД баспасөз қызметі