Н. Назарбаев: Индустрияландыру Қазақстанның негізгі мақсаты дамыған 30 елдің қатарына кіруі үшін қажет
Қазақстанның әлемдегі бәсекеге қабілетті 30 елінің қатарынан көріну мақсатына жетуі үшін индустрияландыру мен шағын және орта кәсіпкерлікті дамыту керек, деді Мемлекет басшысы Нұрсұлтан Назарбаев жалпыұлттық телекөпір барысында.
«Қазақстан қашанда шикізат елі болған. Ол шикізат тасымалдаумен айналысқан, ал енді бүгінгідей заман өзгерген тұста біз тек осы кәсіппен ғана күн кеше алмайтынымызды түсіндік. Шикізат әрдайым сұранысқа ие болмайды және шикізаттың бағасы да осындай жоғары болып тұра бермейді, біз де тек шикізаттың есебінен өмір сүре бермейміз. Тап осы индустрияландыру мен шағына және орта бизнесті дамыту, орта таптың үлкен үлесі –бізге керегі осы. Осының барлығы да біздің басты мақсатымыз – әлемдегі бәсекеге қабілетті 30 елдің қатарынан көрінуіміз үшін керек»,-деді Елбасы.
Ұлт Көшбасшысының айтуынша, қазір қызмет етіп тұрған кәсіпорындардың тиімділігі мен өнімділігін арттыру керек. «Істеп тұрған кәсіпорындардың өнімділігін арттыру үшін өндіріс үнемділігін қамтамасыз ететін жүйе, роботтау элементтері, автоматтандыру, технологиялық желілерді жаңғырту керек, ал бұл көрсеткіштердің енгізілуі жұмыс орындары қысқарады дегенді білдіреді. Артық адамдар қысқартылады, роботтар келеді, бүгінгі таңдағы көптеген мамандықтар болашақта керек болмай, жоқ болып кетеді. Мен бәсекеге дайындалыңдар деп әрдайым айтып келген болатынмын, бүгінде соны айтамын, тап осындай технологиялық жаңғыртуға дайындалыңыздар»,-деді Президент.
«Индустрияландыру – елдің бүкі экономикалық саясатының діңгегі іспеттес. Біз сіздермен өнеркәсіптік секторларды айқындадық. Олар: тағам өнімдері, құрылыс материалдары және машинақұрылысы, осы салаларда сыртқы нарықтарға шағарып, бәсекеге қабілетті өнім өндіруге болатын, сөйтіп отандық бизнесті ілгерілететін әлеует бар»,-деді Елбасы.
Президент «Бәйтерек» холдингіне «Атамекен» ұлттық кәсіпкерлер палатасымен бірлесіп, «Ұлттық чемпиондар» жобасын жүзеге асыруды тапсырды. «Мен әзірге бұл чемпиондарды байқамай тұрмын. Маған осындай 32 жоба бар деп мәлімет берді. Бастапқыда бірден 32 чемпион болуы мүмкін емес. Чемпион тек біреу ғана болады. Маған сол чемпионды көрсетіңіздер, ал қалғандары соның соңынан ерсін»,-деді Н.Назарбаев.
Елбасы Қазақстанның қандай да бір тауар түрімен ерекшеленіп, әлемдік деңгейде өзгелерден оқ бойы озып шығуы керек екендігін айтты. «Мысалы, Францияның қандай әтірлер шығаратынын бәрі біледі. Бүкіл әлем жапондықтардың шикі балығын жейді. Нидерландыны біз эйрбастар мен бойнгтары арқылы білеміз. Неге бізге осындай мүмкіндіктерді байқап көрмеске»,-деді Мемлекет басшысы.