Мемлекеттік хатшы Г.Әбдіқалықова Халықаралық дзюдо федерациясының президентімен кездесті
Қазақстан Республикасының Мемлекеттік хатшысы Гүлшара Әбдіқалықова Халықаралық дзюдо федерациясының президенті Мариус Визермен кездесті, деп хабарлады Ақорданың баспасөз қызметі.
Кездесу барысында Халықаралық дзюдо федерациясымен арадағы Қазақстанның өзара іс-қимылының өзекті мәселелері және спорттың осы түрін республикамызда дамыту перспективалары талқыланды.
Мемлекеттік хатшы келесі әлем чемпионатын өткізуші ел ретінде Қазақстанға таңдау жасағаны үшін Халықаралық дзюдо федерациясына ризашылығын білдірді. Чемпионат 2015 жылғы 24-30 тамыз аралығында Астанада өтетін болады.
Г.Әбдіқалықова Мемлекет басшысының дене тәрбиесіне, бұқаралық спортқа және жоғары жетістіктерге жеткізетін спорт түрлеріне айрықша мән беретінін атап өтті. Бүгінде Қазақстанда халықаралық талаптарға сай спорттық нысандар бой көтеріп, әлемдік деңгейдегі спорт шаралары өткізілуде.
Дзюдо республикадағы ең танымал спорт түрінің бірі болып саналады, онымен 80 мыңнан астам қазақстандық тұрақты айналысады. Спортшылардың шеберлігін жетілдіру мақсатында барлық қажетті жағдай жасалған. Мәселен, бүгінде Қазақстанда елдің құрама командалары жаттығу шараларын өткізетін, Спорттық жекпе-жек және күш қолданылатын спорт түрлері конфедерациясы аккредиттеген 15 спорттық база бар.
Естеріңізге сала кетейік, тәуелсіздік жылдары дзюдошыларымыз олимпиада ойындарында 1 күміс медаль, әлем чемпионаттарында 1 алтын, 2 күміс, 3 қола медаль, Азия ойындарында 1 алтын, 10 күміс және 21 қола, Азия чемпионаттарында 4 алтын, 6 күміс және 30 қола медаль иеленді.
Алдағы әлем чемпионатында Қазақстан спортшылары жеңіс тұғырының жоғары орындарын иелену үшін сайысқа түсетін болады.
Әлемдік біріншілікке дүние жүзінің 140 елінен 900-ден астам спортшы қатысады және ерлер мен әйелдер арасында 7 салмақ дәрежесі бойынша 14 медаль жиынтығы сарапқа салынады.
Қазақстаның намысын ұлттық құраманың бірінші нөмірлі спортшылары қорғайтын болады. Олардың қатарында, әлем чемпионы Максим Раков (Роттердам, 2009 жыл), әлем чемпионатының күміс жүлдегері Азамат Мұқанов (Рио — де — Жанейро, 2011 жыл), Азия ойындарының чемпионы Елдос Сметов (Инчхон, 2014 жыл), Олимпиада ойындарына қатысқан Александра Подрядова (Лондон, 2012 жыл), Олимпиада ойындарына қатысқан Гүлжан Исанова (Бейжің, 2008 жыл және Лондон, 2012 жыл) және т. б. спортшылар.
Естерінізге сала кетейік, өткен жылы Челябі (Ресей) қаласында өткен әлем брінішілігінде Халықаралық дзюдо федерациясының президенті Мариус Визер халықаралық ұйымның туын Қазақстан дзюдо фдерациясының Президенті Кеңес Рақышевқа табыс етті.