---
title: "Мен – Ұятмен"
description: "Істегені ұят шығар, қарсы шыққандар жөн шығар деп үн қосайын десем, ауызыма аяқтарын тосып тұрғанда..."
author: "Orken_Kenzhebek"
published: "2018-01-27T13:59:21+00:00"
modified: "2018-01-27T13:59:21+00:00"
locale: "ru"
canonical_url: "https://yvision.kz/post/men-yatmen-794254"
markdown_url: "https://yvision.kz/post/men-yatmen-794254/markdown"
site_name: "Yvision.kz"
---

# Мен – Ұятмен

> Істегені ұят шығар, қарсы шыққандар жөн шығар деп үн қосайын десем, ауызыма аяқтарын тосып тұрғанда...

Істегені ұят шығар, қарсы шыққандар жөн шығар деп үн қосайын десем, ауызыма аяқтарын тосып тұрғандай мына ағайын. Былай ғой, Байзақова жайлы білерім – қазір бетімен кеткенмен, басында ұяты түгел, әжептеуір ибалы қыз еді дейді. Анасы намаз оқиды, өзі де намаз оқыған екен, бірақ тұрмыста бір ауыр соққы алып, беті ары ауып кеткен дегенді де естідім. Жын иектеген дейді, анасымен қатты ұрысып, осы жүрісін қасақана істейді дейді, кім білсін. Қоғамға қарсылығы да шығар, бәлкім..

***

Байзақоваға батырып ештеңе дей алмайтыным, өзіміздің Маржан Сұлтанбай есіме түседі осындайда. Ол да шашын тақырлап алып, ашық-шашық киімге әуестеніп, «әй, осы түзелмейді-ау» деп қол сілтегенде, күрт өзгерген бір күні. Орамал тақты. Тұрмысқа шықты. Баланы да, бақытын да тапты. Сондықтан, Байзақова бір күні бұлт етіп құбыла қалса, таң қалмаймын да, тас лақтырмаймын да.. 22-дегі желқыз ғой, әмин, солай болсыншы! Біз Алла тағаладан кімнің қайда баратынына билет үлестіріп отыратын өкілі емеспіз. Алла тағаланың мейірімі сондай, лағынет атқан қандай жауыз, қандай азғын болса да, ақырғы деміне дейін тәубеге келгенін күтемін деп уәде етті емес пе? Әр адам баласы махаббатпен жаралған. Иттің итақайының да адам болғаны үшін ғана мойнында тұрған сый-құрметі бар...

***

Бірақ, оның өзіне жасап алған образы, өткендегі әрекеті (мейлі, басқалар ұйымдастырсын, жай ілігіп кетсін) ақтауға тұрмайды. Айыпталу керек еді. Дәл қазіргідей изоляторға жатқызу болмаса да, қоғам тарапынан оның әрекетіне қарсылық болғанын сезіндіру керек еді. Сондықтан, айналдырған 10-20 қазақ жігіттің бейнемәлімдеме жазып, әлгі клубтың босағасына барып, шарасыздан шырылдап жүргендерін де түсінемін. Айыптамаймын. Сөздерінде «шаңырағын ортасына түсіреміз» деген асылық болған шығар, түрлері сіздерге ұнамайтын шығар.. Тентегі мен телісін арбаның доңғалағына таңып, болмаса киіз туырлыққа орап тастап-ақ тезге салып алатын қазақ едік қой.. Ол уақыт өтті. Қазақ енді бұрынғы қалпына келмейді. Түсінемін. Бірақ, бұндай қарсылық болмаса, мен онда ұлт ретінде қалуымыздан да қорқар едім.

***

Бұрын да жазғам, тағы қайталай салайын. Бізді ұяттың барлығы не көптігі емес, ұяттың жоқтығы не аздығы құртады. Айдос Сарым айтпақшы, бір ұят пох пен нақтан миллион есе артық.

Ақпарат көзі

---

Source: [https://yvision.kz/post/men-yatmen-794254](https://yvision.kz/post/men-yatmen-794254)