Полиция қызметін таңдаған егіздер

Полиция ВКО 2015 M06 22
230
0
5
0

Семей қаласындағы Ішкі істер министрлігіне қарасты Оқу орталығында бастапқы оқу курсынан өтіп жатқан егіз жігіттер Нұрсұлтан мен Ерсұлтан Әйіп Қазақстан Республикасының жас қызметкерлері. Егіздер...

Семей қаласындағы Ішкі істер министрлігіне қарасты Оқу орталығында бастапқы оқу курсынан өтіп жатқан егіз жігіттер Нұрсұлтан мен Ерсұлтан Әйіп Қазақстан Республикасының жас қызметкерлері.

Егіздер Нұрсұлтан мен Ерсұлтан Жарма ауданы Былқылдақ ауылының түлектері. Жеке шаруашылықпен айналысатын ата-аналары қос қанаттарын ел қатарынан қалдырмай өсіріп, тәрбиеледі.

«Ұяда не көрсең - ұшқанда соны ілесің» демекші, әке-шешеміз бала күнімізен екеуімізге дұрыс, адал жүруді үйретті. Әрқашан тату, бірлікте, бауырмал болу жайлы жиі айтып отырды. Әсіресе, әкеміздің "екеуің бірге болыңдар, сонда мықты боласыңдыр" деген өсиеті жадымызда жатталып қалды дейді, жас жігіттер.

Орта мектепті аяқтағаннан кейін алғыр жігіттер жұптарын жазбастан Семей қаласындағы Р.Байсейітов атындағы қаржы-экономикалық колледжіне оқуға түсіп, бағдарламашы мамандығын алып шығады. Егіз жігіттер Отан алдындағы борыштарын да қатарласа өтеп келді.

«Әкеміз әрдайым әскерге барған бала өмірді көреді, көп дүниені түсінеді», деп айтып отыратын. Сол кісінің айтқаны бізге түрткі болып, әскерге баруды жөн санап, шекара қызметіне түстік. 2013-2014 жылдары отан алдындағы борышымызды өтеп, кіші сержант шенімен елге оралдық», - дейді Нұрсұлтан.

Нұрсұлтан мен Ерсұлтанға өздері әскери борыштарын өтеген шекара қызметінде қалуға да болар еді. Ондағылар бірнеше мәрте ұсыныс та жасаған екен. Алайда, ауылда жалғыз қалған ата-аналарын ойлаған егіз жігіттер елге оралуды шешеді. Ағайындылар әскер қатарында есейді, болашаққа жоспар құрды. Ата-ана борышын өтеп, ел игілігіне жұмыс атқаруды ойлады.

«Бізде екі бағдар болды - шекара қызметіне немесе ішкі істер органдарына жұмысқа кіруге. Ойлана келе полицияға жұмысқа орналасуды шештік. Біріншіден ел тыныштығын сақтап, заңды тәртіп сақтауға атсалысамыз, сонымен қатар, туған-туыстардың жанында боламыз. Әкеміз төрт қыздан кейін ұлды армандаған ғой. Сондықтан өз өлкемізде болуды ойладық. Соңғы шешімді ағам айтты. Менен 15 минут үлкен болса да оны өзімнің ақылшым санаймын. Оның айтқанын орындауға тырысамын», - дейді Ерсұлтан.

Сол мақсатта Семей қаласындағы Оқу орталығында бастапқы оқу курсынан өтуде.

Бала кезгі армандары орындалып, ағайынды Әйіптер Шемонаиха аудандық ішкі істер бөлімінде қызметке қабылданды.

- Жас күнімізден көшеде тәртіп сақшыларын көріп жүретінбіз. Олардың қызметіне қызыға қарайтынбыз. Жұмысқа орналасқалы тыныштық сақтаудың оңай міндет емес екеніне көз жеткіздік, полицейге қойылатын талап өте жоғары. Дегенмен, өмірде бір жетістіктерге жету үшін белгілі бір қиындықтардан өту керексің. Барлығына шыдасаң, кейін өзіңе сенімді боласың. Бізге қызметтің қыр-сырын үйрететін тәлімгерлер тағайындалған. Жастайымыздан спортқа бейім болдық, жеңіл атлетика, бокс, күрес сынды спорт түрлерімен айналыстық. Осының бәрі жұмысымызда себін тигізері сөзсіз. Адамдардың қорғанышы болатын сақшы қызметін таңдағанымызға қуаныштымыз, дейді ағайынды Нұрсұлтан мен Ерсұлтан.

Егіздер бүгінде Семей қаласындағы Оқу орталығында бастапқы дайындық курсынан өтуде. Ішкі істер саласының нағыз маманына айналып, алдындағы аға буыннан үйреніп, өз қалауларымен таңдаған мамандығының қыр-сырын барынша зерделей түспек. 2011 жылдан бастап еліміздің түкпір-түкпірінен келген полицияның офицерлері мен сержанттарын алғашқы дайындықтан өткізетін аталмыш оқу орталығынан терең теориялық, жетік птәжірибелік білім алған қос сақшы жақын арада қызметке кіріседі.

Оцените пост

5
Дальше