Бабалар сөзінің» 100 томдығын шығару арқылы біз ата-бабаларымыздың алдындағы бір парызымызды орындадық — М.Құл-Мұхаммед

МК РК 2014 M02 21
285
0
0
0

ҚазАқпарат, 20.02.2014 «Бабалар сөзінің» 100 томдығын шығару арқылы біз ата-бабаларымыздың алдындағы бір парызымызды орындадық деп ойлаймын. Бұл туралы бүгін Астанадағы Академиялық кітапханада...

ҚазАқпарат, 20.02.2014

«Бабалар сөзінің» 100 томдығын шығару арқылы біз ата-бабаларымыздың алдындағы бір парызымызды орындадық деп ойлаймын. Бұл туралы бүгін Астанадағы Академиялық кітапханада өткен әлемдік деңгейдегі теңдессіз «Бабалар сөзі» атты қазақ фольклорының 100 томдық топтамасының тұсаукесер рәсімінде ҚР Мәдениет және ақпарат министрі Мұхтар Құл-Мұхаммед айтты.

«Өздеріңіз білесіздер, Мемлекет басшысы 2003 жылы халыққа арнаған Жолдауында Үкіметке орта мерзімге арналған «Мәдени мұра» атты арнайы бағдарлама жасауды тапсырды. Осы бағдарламаның шеңберінде қазақ халқының арғы-бергі тарихында жинақталған бай фольклорлық мұрасын жүйелеп басып шығаруды міндеттеді. Содан бері ең алғашқы томы 2004 жылы жарық көрген 100 томдықтың ең соңғы томы биыл оқырманымен қауышып отыр. Бұл үлкен еңбек! Осы арқылы біз ата-бабаларымыздың алдындағы бір парызымызды орындадық деп ойлаймын», - деді ол тұсаукесер рәсімінде.

Оның айтуынша, бүгінде біз дүниенің төрт бұрышына шашылып кеткен қазақтың аса бай мұрасын жинайтын кезеңге келдік.

«Менің білуімше, дәл қазіргі кезеңде дүниежүзі халықтарының ішінде өзінің бай мұрасын 100 том түрінде жіктеп, жүйелеп халқына ұсынып отырған халық өте сирек. Бүгін соның ұшар басында қазақ халқы тұр деп айта аламын», - деді министр.

Айта кетейік, 100 томдықтың 20 томы - батырлар жыры, 13-і тарихи жырлар, 7 томы діни дастандар, 13 томы хикаялық дастандар, 8 томы ғашықтық дастандар, 5 томы ертегілер. Сонымен қатар, 1-3 томнан тұратын шағын жанрлар да жетерлік.

Құрастырушы - М. Әуезов атындағы Әдебиет және өнер иниституты, ал басып шығарған «Фолиант» баспасы.

Фольклор барлық елде бар. Көптеген ел оны жинақтап, жариялап, зерделеуде. Алайда дәл 100 том етіп, ұлттық байлықты бір жерге топтап, жүйелеп, ғылыми шарт негізінде текстологиялық жұмыс жүргізіп, академиялық басылым ретінде 100 том етіп жарыққа шығарған мемлекет әлі жоқ. Кейбір ТМД елдерінде енді басталып жатыр, дейді ұйымдастырушылар.

Шараға Парламент депутаттары, министрліктің басшылары мен белгілі ғалымдар, ақын-жазушылар, қоғам қайраткерлері мен оқырман қауым қатысты.

Оцените пост

0