Yvision.kzYvision.kz
kk
Разное
Разное
399 773 постов41 подписчиков
Всяко-разно
0
03:49, 16 февраля 2014

Біздің елді білесіз бе?

Біздің елді білесіз бе?!

Әлемге таныламыз деп әлек болып жүргенде, Қазақстан жайлы өзге елдердің не білетіні, не ойлайтыны біз үшін, әрине, таңсық дүние. Әр түкпірдегі бірнеше мемлекеттің жас буын өкілдерінің біз жайлы білетіні мен өздері жайлы берген өзекті деректерімен таныс болыңыздар!

  1. Қазақстан мен қазақтар жайлы не білесіздер?!
  2. Өздеріңіздің туған жерлеріңізге тоқталып, ерекше деген салты-дәстүрлеріңіз жайлы не айтар едіңіздер?
  3. бос уақыттарыңызды қалай өткізесіздер? Алдыға қойған мақсаттарыңыз қандай?

Blog post image

Ианг Чан, Қытай, Санья

  1. Менің саяхаттау барысында танысқан бір-екі ғана қазақ танысым бар. Соларға қарап түйгенім, қазақтар туған тілімен қоса орыс, ағылшын тілдерін жетік меңгерген екен. Сонымен қатар сыпайылығымен ерекшеленеді деп білемін.
  1. Қытай туралы қызық дерек айтар болсам, бізде 4 саны өлімнің саны есептеледі. Біз сыйлыққа аса мән береміз. Сыйлық бағасымен емес, ойымен, мақсатымен құнды. Сонымен қатар сыйлық ретінде сағат сыйлауға болмайды. Ол біз үшін жерлеу рәсімінің символы іспеттес.
  2. Мен бос уақытымда ағылшын тілін жетік меңгеру жолында еңбектенемін. Музыка тыңдап, кітап оқығанды ұнатамын. Алайда бос уақытым бола қалса көбіне таза ауада серуендеймін. Қазір Хайнань университетінде білім алудамын. Болашақта қонақ үй менеджері деген мамандығыма сай білікті маман болғым келеді. Өзімнің қонақ үйім болса екен деген арманымды алдыға қойған мақсатым дей аламын.

Blog post image

Вакакюеки Мали (Пуэрто-Рико)

1. Мен қазақтардың туын білемін. Қазақстанда тұратын 2-3 танысым бар болғандықтан, сөздік қорымның қоржынында қазақша бірнеше сөздер бар. Сонымен қатар қазақ әндерін естігенмін. Қазақстанның Ресеймен шектесетінін және екінші тілдерінің орыс тілі екенін білетінімді нық сеніммен айта аламын. Америкада қазақ жастарымен жұмыс істегенім бар. Сонда олардың өзара тілдесіп отырғандарынан байқағаным, қазақтар өздері ғана жиналғанда өз тілдерінде аса көп сөйлей қоймайды екен. «Сендер сөйлесіп отырған тіл қазақ тілі ме?», - деп сұрағанымда, олар орыс тілінде  тілдесіп отырғандарын айтқан болатын.

2.Мен Кариб теңізіндегі Пуэрто Рико аралдарынанмын. Өзім Нью Йоркте оқимын. Пуэрто-Рико мәдениеттер тоғысқан жер дер едім. Біздің мәдениетімізге Тайно үнді тайпалары, Испания және Африка ықпал еткен. Көптеген жер-су атаулары, үй тұрмысына қажетті заттардың атаулары тайно тайпаларынан қалған. Ал испандық католицизмнен біз негізгі құндылықтарымызды мұра етсек, 'Bomba, 'Plena' сынды би түрлерін, сонымен қатар барабан мен маракас сияқты ұрмалы аспаптарды  африкалықтардан алдық. Пуэрто Рико 1898 жылдан бері АҚШтың құрамына кіреді, яғни содан бері біздің мәдениетіміз де соған сай өзгерістерге тап болды. Америкалықтармен тығыз қарым-қатынастармыздың нәтижесінде пуэрториколықтар испан сөздерін ағылшын сөздерімен бірлестіріп, Spanglish-ті меңгерді.

Пуэрториколықтар, әсіресе,  рождество мерекесін қатты жақсы көреді. Бұл кезде бізде дәстүрлі  Parrandas болады. Яғни пуэрториколықтар отбасымен,   достарымен жиналып әнұран айтады. Бұл көбіне көп таңғы уақыттарда болады. Себебі ұйқыда жатқан таныс-туыстарын көруді мақсат етеді. Біз рождествоны әлемде ең ұзақ тойлайтын елміз. 23-қарашада басталған мерекеміз қаңтардың соңына дейін  жалғасын табады.

3. Бос уақытымда мен тренажер залына барамын, кино және казиноға да барып тұрамын. Маған  парапланмен ұшқан ұнайды. Ең жақсы көретін ісім – саяхаттау және тамақ әзірлеу. Болашақта круиз капитаны болуды алдыма мақсат етіп қойдым.

Blog post image

Виллиам Генри (Ұлыбритания)

1.Қазақстан жайлы білетінім өте аз. Ұлыбританияда шыққан бір бюллетеньді көргенім бар. Онда «Kazakstan» деп жазылып тұрған болатын. Содан кейіннен казак емес, қазақ екенін сізден білдім. www.global.britannica.com сайтында қазақтардың туының астында да «Kazakstan» жазуын көрген едім. Содан да болар, мен Қазақстанды ұзақ уақыт бойы Казакстан деп танып жүрдім. Шынымды айтсам, аса құмартып қызығушылық та танытқан емеспін.

2. Мен Лондонда туғанмын. Көпшілік қазір біздің ел туралы жан-жақты хабардар деп ойлаймын. Көбіне бізде жеке Конституцияның жоқтығына таң қалып жатады. Ұлыбританияда қалыптасқан ерекше дәстүрлердің бірі ретінде «бесін шайды» атар едім.

3. Мен болашақта мамандығым бойынша Малайзияда жұмыс жасағым келеді. Ал бос уақытымда кітапханаға барғанды ұнатамын. Әр түрлі тақырыптағы суреттерді жинаумен әуестенемін.

Blog post image

Мариса Осборн, Филиппин аралдары

  1. Жалпы, мен азияттықтардың келбеті кескінді, сұлу деп білемін. Қазақ қыздары әдемі, ал жігіттері келбетті болып келеді. Сонымен қатар Қазақстанға барып көруді қатты армандаймын. Қазақтар да біз сияқты асықпай, көбіне кешігіп жүреді деп естігенім бар.
  2. Мен Америка азаматына тұрмысқа шыққанмын. АҚШта тұрамын. Алайда туған жерім – Филлиппиннің астанасы Манила қаласынанмын. Біздің елде 80 түрлі диалект бар дегенді көбі қызық көріп жатады. 30-желтоқсан күні Рисаля күні деп аталып, ұлттық мерекеміз тойланады. Сол күнді ерекше деп атап өте аламын. Ал ең қызығы, адам қайтыс болғанда 3 күн бойы туған-туыстар жиналып, шошқаның етін әзірлеп, тойлатады. Бұл да бір қалыптасқан дәстүріміз.
  3. Мен ең алдымен жақсы жар, аяулы ана болғым келеді. Жанұяммен саяхатқа шығуды армандаймын. Тамақ әзірлегенде сан алуандылықты жақсы көремін. Соған сай ізденіп, бос уақытымда түрлі елдердің ас мәзірін даярлауды қатты жақсы көремін.

Ойымызды таразылап, нәтижесін түйіндей келе, Қазақстанды танытатын да, жақсы жақтарын  жаңғыртып жаһанға паш ететін де біз екенімізді ұмытпағанымыз абзал.

Сұхбаттасқан Гүлнұр Кәкімжанова

0
802
0