«Егемен Қазақстан», 17.01.2014
...Жау тоқтатудың орнына, жау жоқ жерде жау шақыратын батырлар да көп болған, дау тоқтатудың орнына дау шақыратын да билер көп болған. Әшейінде құлақ тыныш отырғанда өзі килігетін билер емес, құлақтан маза кетіп, арың төгіліп бара жатқанда сөз бастайтын ділмарлар керек. Ең дұрысы сөзді де, қолды да бастатпауға тырысатын, елдің тыныштығын, ағайынның амандығын сақтайтын елдарлар керек.
Екі жолбарысты соңына ерткен, өзі үшінші жолбарыс сияқты болып, айбынын асырған жау түсіретін батыр Жәнібектің бүгінгі ұрпақ үшін қадірлі болатындығы, кісінің тағдырын бір ауыз сөзбен шешкен би Жәнібектің біз үшін қадірлі болатындығы, ең алдымен, сол батырлығымен, сол билігін елдарлыққа жұмсағандығы – дейді Жәнібек тархан жайлы «Асыл сөз» баспасынан жарық көрген «Шақшақ Жәнібек Қошқарұлы» деген жаңа кітапта дегдар Әбіш Кекілбайұлы.
Қазақстан Республикасы Мәдениет және ақпарат министрлігі Ақпарат және мұрағат комитеті «Әдебиеттің әлеуметтік маңызды түрлерін басып шығару бағдарламасы» бойынша «Ақтабан шұбырынды, Алқакөл сұлама» тұсында қабырға қайысып, тілерсегі майысып, тентіреген ел жерінен ауып, қайыңды сауып, қиналған тұста қол бастаған батырлардың бірі, сөз бастаған шешеннің бірі, қаһармандығы Бұқар, Тәтіқара жыраулардың төгілген жырларына арқау болған Шақшақ Жәнібек батырдың 320 жылдығына орайластырып Жетпісбай Бекболатұлы құрастырған бұл кітапта батырдың өмірі, оның шыққан тегі, жасаған ерлік істері жайында мол мағлұмат беріліпті.
«Ел ұстасаң кек ұстама», «Билік айту оңай, біліп айту қиын», «Ойласып кессең қол ауырмайды», «Байлықтың байламы – бірлік», «Ханның қайырымы – шексіз, халықтың қайраты – шексіз», «Туған жердің торғайы да сүйкімді» дегендей күні бүгінге дейін Шақшақ Жәнібек айтыпты деген қанатты сөздерімен, толғап та тура айтар кесікті де кесімді ойымен, ел тағдырына бойласа тереңге кетер шешімімен, ел қорғаса найзасының қуаты қақыратып сөгер қабырға, айбынды ерлік ісімен халқының жадында жатталған батыр баба есімі жинақты парақтай отырғанда бұрынғыдан да биіктеп, еңселене түседі.
Кітаптың бірінші бөліміне «Шақшақ Жәнібек және оның уақыты» деген Өмірзақ Жолымбетовтің деректі хикаяты берілсе, екінші бөлімінен Иманжан Жылқайдарұлы мен Серікбай Оспанұлының Шақшақ Жәнібек туралы дастандары орын алыпты. Ал соңғы үшінші бөлімде Ғафу Қайырбеков, Сабыржан Шүкірұлы, Болатбек Әлденұлы, Сұлтанғали Оспановтың батыр жайында жазған көңілге ой түйдіріп, сананы селт еткізіп, жаныңа ерлік пен елдікті қадірлеудің қаншалықты үлгі болатындығын көрсеткен ойлы мақалалары жинақталыпты. Сонымен қатар, бұл жинақта батырға қатысты құнды мұрағат деректеріне де орын берілген екен. Қарап отырып, бір батыр тұлғасының биіктігін ғана бағалайтын емес, тұтастай дәуірдің, саясаттың, тарихтың қалай айналғандығын көрсететін құнды құжаттардың кітаптың мазмұны мен мәнін де аша түскенін аңғарасың.
Анар ТӨЛЕУХАНҚЫЗЫ,
«Егемен Қазақстан».